你曾經分過手嗎?
你用過咩原因嚟分手呢?
感情淡咗?性格不合?有新對象?
得罪問句,其實呢啲,係咪你心底真正嘅分手原因?
 
「分手和頭酒」,聽落好似係一樣幫人復合嘅嘢,但其實唔係。
「分手和頭酒」係俾一對情侶可以喺分手前或後同對方食一餐飯,坦白了解分手嘅真正原因。
當然,可能你會質疑,如果一個人要唔坦白,佢又點會嚟到之後就肯坦白呢?
講真,其實好多人嚟到都係唔會坦白㗎,所以搞「分手和頭酒」嘅我有一個好重要嘅工作,就係會喺「分手和頭酒」之前,細心研究調查一下參加者嘅背景。
而通常呢個調查,往往都會搵出好多意外嘅結果。




有感人嘅、有刺激嘅、有卑鄙嘅、亦有皆大歡喜嘅。
 
我有一個信念,就係,所有分手一定有原因。
而我相信一個坦白嘅分手原因,其實可能都係俾對方嘅一個祝福,或者一個放低嘅理由。
所以,「分手和頭酒」就咁出現咗。
 可能你會問,究竟有乜嘢動力驅使我要搞呢一個「分手和頭酒」呢?簡單嚟講,係因為我都等緊一個屬於我嘅分手原因。
呢個原因,我等咗就快五年。
喺呢五年裡面,我成為咗一個俾「愛情」拒絕嘅人,我完全無能力進入任何嘅關係入面。
 
我想要一個原因。




但係我可以做嘅,就只有等。
 
無論如何,呢個就係一個有關「分手和頭酒」嘅故事。
當你睇落去嘅時候,你會開始明白,點解需要「分手和頭酒」。
你可能會發現,有啲分手嘅故事、對白或者經歷會有你自己嘅影子。
因為分手唔止係代表住兩個人嘅分開,更加係代表住一啲感覺嘅消失、一啲信念嘅破滅,又或者係一啲傷痕嘅形成,所以喺唔同故事入面,我相信你總會可以搵到自己共鳴之處。
 
如果你睇完呢個故,發現自己都有需要「分手和頭酒」嘅服務,歡迎你可以聯絡我。
我叫阿濤,我專門幫人搞「分手和頭酒」。