我係俾嘢食嘅味道香醒嘅。
我起身嘅一刻,望一望身邊嘅手機,原來已經十二點。
除咗時間之外,我仲發現電話竟然有十幾個miss call,而且仲要嚟自同一個陌生嘅電話。
就咁睇,似乎有個客搵得我好急。
 
不過我不嬲都係一個唔急住做嘢嘅人,所以我只係將部手機收好,然後出去睇下啲香味喺邊度嚟。
一出到廳,我已經見到廚房入面有一個背影喺度煮緊嘢食。
有一刻錯覺,我以為嗰個係歐雪,因為以前嘅歐雪好鍾意一到假期就上嚟我屋企煮早餐俾我食。
但係我諗一諗,先記得琴晚Kelly喺度過夜,所以呢個應該係Kelly嚟。
 




我見佢無發現我,嗱嗱聲去廁所洗個臉刷個牙,廢事俾佢見到我啱啱起身個頹樣。
呢個時候我記翻起一個都市傳聞,就係當一個男仔同一個女仔去旅行,女仔永遠都會早起身過男仔。
因為個女仔要快一步去執翻自己啲眼耳口鼻。
照Kelly今日嘅情況咁睇,呢個都市傳說真係無錯。
 
當我搞掂哂所有嘢之後出咗廁所,枱上面已經多咗兩份早餐。
「早晨,終於捨得醒啦?」Kelly唔等我,自己坐低開始食。
「唔該哂你煮埋早餐喎。」我望到碟上面嘅煎蛋同腸仔,心入面有一種平凡嘅溫暖感。
「當交翻琴晚房租囉!」Kelly好爽快咁笑住講。
正所謂一日之計在於晨,而今個早晨可能就係我呢幾年入面一日最好嘅開始。




 
食完嘢,我同Kelly一齊出咗門口翻office。
「喂,你好,我係負責『分手和頭酒』嘅阿濤,請問你係咪搵過我?」我一上車,第一時間打翻俾搵咗我好多次嘅嗰個客。
「Hello,我係Desmond啊,你好啊,我有少少嘢想問翻㗎。」對方係一把聽落幾有朝氣嘅男仔聲,而且有趣地,感覺有啲熟悉。
 
「你問啊。」我嘗試將把聲chok得正常翻少少。
「我想問,係咪只要拍拖夠五年零六個月,就可以有一餐免費嘅晚餐?」對方感覺幾期待。
「係啊,只要你簽約到而家夠五年零六個月就可以。」我之所以答得咁爽快,係因為自從子成嗰次之後,我都經歷咗另外兩pair成功達到五年零六個月嘅情侶,所以我已經見怪不怪。
 
「咁就好啦!餐廳係咪會跟翻當初喺簽約嘅時候寫嗰間?」對方又問。




「無錯,我一陣翻到公司幫你check翻份約,無問題嘅話再覆你吖!」我答完呢句之後,對方講低咗自己個名,然後就好滿意咁收咗線。
 
當我翻到office嘅時候,偵探都已經喺度。
偵探如常地喺電腦前面查緊佢要查嘅嘢,而Kelly就翻埋自己個位度幫手聽唔同嘅電話。
無錯,因為Kelly出現嘅次數太多,多到我都唔好意思唔俾嘢佢做,所以兩個月前我已經索性請咗佢翻嚟幫我parttime接下啲查詢電話。
 
「琴晚點啊?」我一坐低,偵探就若無其事咁行過嚟細細聲問咗我一句。
「有咩點啫?」雖然其實無咩發生,但唔知點解我有啲心虛。
「用反問句回應問題,通常係代表回答者喺嗰一刻有意逃避問題。」偵探好冷靜咁講完,然後繼續企係度望住我。
「唔好阻住我做嘢啦,我要幫個客睇約啊!」我決定用工作打發偵探走,然後即刻就喺電腦上面㩒咗幾下,輸入咗「王迪文、馮昭兒」兩個名,即係Desmond同佢女朋友個名。
然後一份白紙黑字嘅合約就出現咗。
「五年零六個月......真係啱啱好。睇埋間餐廳先.....咦?」望到合約上面嘅餐廳名,我忍唔住發出咗驚訝嘅叫聲。
而呢一聲,亦都吸引埋偵探嘅目光。
「Mayday Cafe?!」偵探都有幾分意外,然後我再碌落少少份合約,見到兩個簽約人嘅合照。
 




「呢個男仔!」我一望到張合照,即刻明白點解今朝我聽到對方把聲嘅時候覺得有啲熟悉。
因為相入面嘅男仔Desmond,就係琴晚Mayday Cafe入面唱歌嗰隊band嘅主音。
 
我確認咗份約無問題之後,就打翻俾Desmond。
「喂?Desmond你好,我係阿濤啊!想通知翻你,你份約無問題啊,我可以幫你安排翻一餐免費嘅晚餐喺Mayday Cafe度慶祝!」
「唔該哂你啊,咁實在喺太好啦,因為呢,其實我想趁今次嘅慶祝晚餐,順便同我女朋友求婚㗎!」Desmond把餐依然有啲興奮,當然我係完全明白佢嘅心情嘅。
 
「正喎,咁你到時咪可以憑歌寄意唱歌求婚囉!」我已經幻想到到時感動嘅場面。
「咦!你點知我想咁做嘅?」Desmond把聲有啲愕然。
「我琴晚先去完Mayday Cafe,我知你喺Live Once嘅主音嘛!」我講出原因,Desmond聽到有人記得佢隊band都好開心。
 
然後,為咗了解一下到時有咩需要配合Desmond,所以我都循例邀請佢分享一下佢同女朋友嘅戀愛故事。
佢嘅故事,係一個幾勵志嘅同渡患難嘅愛情故事。