Desmond同女朋友Chloe係大學音樂教育系嘅同學,Year 3正式拍拖。
畢業之後,Chloe好正路咁成為一位音樂老師,而Desmond就選擇追求夢想,同朋友一齊夾band,靠住去唔同地方表演賺取外快,同時希望有機會得到唱片公司經理人嘅垂青,令夾band由興趣成為畢生嘅事業。
Desmond隊band曾經贏過好幾個嗰啲咩「十八區慶回歸音樂比賽」,而且靠住不斷嘅表演儲落咗少量嘅fans。
可惜嘅係,呢個世界有無懷才不遇真係好難講,但Desmond隊band一直都未能夠成功出道就係事實。
 
雖然夢想之路走咗六年都未達成功,但Desmond好慶幸自己身邊有一個全力支持自己追夢嘅女朋友。
Chloe自從畢業之後就成為咗老師,而佢知道Desmond想要追夢,所以一直保持財政獨立,希望唔會加重Desmond嘅壓力。
同時之間,每逢星期五六,佢都會跟Desmond去唔同餐廳,成為Desmond嘅永遠捧場觀眾。
 
Chloe從來無怨過Desmond無正職嘅收入,亦都無質疑過Desmond嘅夢想之路。




對Desmond嚟講,Chloe係一個無可挑剔嘅女朋友。
所以Desmond為咗唔想令Chloe擔心,佢喺唔洗夾band嘅日子,都會著起粉紅色衫去做送餐嘅步兵。
佢曾經試過送餐嘅時候遇到聽佢隊band嘅fans,嗰一刻真係好尷尬,但係無令到Desmond放棄送餐。
因為當Chloe連自己無正職都唔介意嘅時候,自己仲點可以為咗少少面子而介意呢?
 
拍拖呢六年嚟,Desmond同Chloe已經成為咗心照不宣嘅伴侶。
雖然大家見嘅時間唔多,但大家都明白大家嘅路,所以喺心底入面,Desmond依然無時無刻都咁愛Chloe。
 
而佢選擇喺呢個時候向Chloe求婚嘅原因,係因為佢收到咗一個消息。
佢隊band,終於得到唱片公司嘅回音。




有一位經理人聯絡佢,話有一間台灣唱片公司有意同佢哋簽約,想幫佢哋喺台灣出道。
當Desmond講咗呢個消息俾Chloe知嘅一刻,Chloe亦都感動到喊咗。
雖然呢次簽約意味住Desmond需要去台灣發展,對佢同Chloe嘅生活點都會有影響,但係佢同時相信,支持咗自己咁耐嘅Chloe一定好明白呢個機會有幾重要。
 
因為Chloe見證住佢捱咗咁多年,終於捱到出頭天。
Desmond好開心,亦想借呢個機會同Chloe求婚,實行雙喜臨門。
之後無論係搬去台灣,或者兩地來回,Desmond相信結咗婚都係對大家一個最好嘅承諾俾大家繼續互相支持。
 
聽完Desmond同Chloe嘅故事,我覺得係一個充滿鼓勵性同埋感動嘅經歷。
兩個互相體諒嘅人,互相遷就,互相配合,成就咗呢六年唔容易嘅旅程。




 
「放心,我一定會幫你搞好佢。我幫你約餐廳同埋Chloe,之後有消息再通知你。」我語氣好肯定咁講,因為我內心入面真係好想幫呢一對情侶搞好佢哋嘅慶祝晚餐。
「多謝你啊,咁我等你消息啦!」Desmond把聲繼續好積極。
而我都開始明白點解佢把聲成日都聽落咁有朝氣,因為有夢想嘅人,生活總係會多啲正能量嘅。
當然,呢份正能量嘅背後,仲有Chloe呢個差電器。
 
「Kelly,唔該幫我mark一mark,王迪文、馮昭兒,book Mayday Cafe。」我喺我個位嗌出去。
「Ok,一陣幫你搞。」Kelly行咗嚟我個位前面做咗個「OK」嘅手勢,然後再補多句:「我轉咗個電話入你條線啊,你聽埋佢啦,而家parttime員工要休息。」
望住Kelly呢個樣,本身我想寸翻佢幾句,但係聽到仲有客人喺電話度,唯有接埋客一陣先去反擊。
 
「喂,你好,我係『分手和頭酒』負責人阿濤,請問有咩幫到你?」我把聲𣊬間變到好有禮貌,呢啲就係高EQ。
「你好啊,我想問呢,如果我想同男朋友分手,你哋係咪可以幫我約佢出嚟?」
電話嗰邊,係一把聽落幾溫柔嘅女聲。
「係啊,咁請問你之前係咪有簽約嘅?因為如果無簽約都可以幫你,但過程會複雜啲。」我如常咁回覆。
「有啊,以前簽過。」對方答我。




「好啊,麻煩你講一講你哋嘅名,等我對一對資料。」我打開電腦,準備睇合約。
 
「我叫馮昭兒,我男朋友係王迪文。」