「因為承心失過憶,啲四年兩年兩個月呢啲時間觀念對佢嚟講仲未整理好哂,有時佢自己都會搞錯哂啲年份,所以先令到你哋覺得咁亂。」偵探作出最後總結。
 
聽完偵探嘅故事,雖然本身嘅疑團已經解開,但係我同Kelly一時間都俾唔到反應,成個office嘅氣氛亦都異常地沉重。
我無諗過,原來一直認識咗差唔多七年嘅偵探,背後有一個咁震撼同令人難過嘅愛情故事。
而佢嘅故事亦都解釋咗點解佢近排會需要成日無啦啦走咗,就係因為近呢兩個月承心嘅抑鬱症同自殺傾向復發。
 
「啪」一聲,Kelly企咗起身,好嬲咁講:「個Brian咁仆街,當日飛咗承心都算啦,而家承心情況先好少少佢又無啦啦搵人,都唔知背後有咩居心嘅!一於唔好理佢啦!」
我搖一搖頭咁講:「唔得,對方有合約在手,如果強行唔理,對方告我哋同埋承心,件事分分鐘搞得更耐。」
Kelly聽到,都明白真係無辦法,唯有無意義咁咆哮幾句發洩。
而其實我哋三個都好明白,大家都知承心要走出情傷已經好唔容易,所以絕對唔想佢再喺「分手和頭酒」入面見到Brian受多一次傷害。




 
「或者,既然問題係合約,或者我哋可以喺合約上面落手。」偵探咁講,「而家對方要求係食飯同埋開live,某程度上暗示緊佢其實期望承心出席嘅。我哋試下用呢一點同Brian傾,要求將見面時間縮短到例如十五分鐘,同埋唔接受開live,否則承心就唔去。我估以佢想承心出席嘅心態,佢可能會接受讓步。咁樣,至少可以減少令承心受苦嘅時間。」
偵探講出呢段分析嘅時候,無咗平日嘅睿智,反而似一個坐困愁城嘅軍師。
而作為佢七年朋友,我一直以嚟都以為佢係一個偏向理性嘅人,但係睇住佢講承心嘅經歷同埋呢一刻嘅表情,我感受到其實偵探只係好少將心情喺人哋面前表露。
其實,佢心底入面一樣對自己在意嘅人充滿感情。
 
聽完偵探嘅建議之後,我哋決定由偵探聯絡承心,睇下承心嘅反應。
承心聽完,雖然依然好唔願意,但係我估因為佢本身好關心人嘅性格,所以為免令我哋有麻煩,佢都勉為其難咁答應咗。
跟住落嚟,就到我同Brian嘅對壘。
 




「Hello,你好,請問係咪Brian?」
「Hi,你係阿濤?有結果?」聽得出Brian有啲雀躍。
「係,我哋同承心傾過。你知道承心之前出過意外啦,佢而家精神狀態麻麻,所以佢個人想向你提出反建議,包括唔開live,唔食晚餐,成個見面只出席十五分鐘,同埋需要一個星期時間做好心理準備。」我提出咗我哋為承心提出嘅條款。
 
Brian嗰邊靜咗一陣,應該係考慮緊,然後隔咗無耐就講:「我要見三十分鐘,other terms are fine。」
其實我呢一刻係開住speaker同Brian傾嘅,所以偵探同埋Kelly同時都聽到。
Kelly聽到Brian咁高傲嘅回應,當然係無名火起,口型已經將粗口念到好似咒語咁詛咒緊Brian。
而偵探合埋眼諗咗一諗之後,終於無奈咁點咗頭。
最後,承心同Brian呢一場「分手和頭酒」定咗喺一星期之後舉行。
 




「到底呢個Brian想做咩呢?好地地做咩要開live呢?又講到咩開心又重要。」Kelly收咗線之後一直好似怨婦一樣不斷吟吟尋尋,感受到佢對Brian嘅怨氣真係好重。
不過佢講嘅的確好有道理,到底Brian本身想喺「分手和頭酒」度開live嘅目的係咩呢?
 
呢個時候,偵探喺佢部電腦面前講咗一句:「過嚟望下。」
我同Kelly即刻行咗過去,然後就係偵探電腦度見到一大個著住西裝,梳咗平頭裝,成補習天皇look嘅Brian。
偵探知我哋睇緊,所以慢慢將個網頁向下碌,然後我同Kelly就見到Brian張相下面寫咗幾個大字。
我哋忍唔住一齊讀咗出嚟:「戀愛學導師 Brian Yu!」
 
偵探點一點頭,然後click咗落去張相隔離嘅一條link度。
條link一下就轉咗去youtube,然後我哋就睇到一段片。
段片嘅開頭,係Brian個頭,係差唔多有半個畫面都係佢個頭,好明顯佢係自拍緊。
「好多朋友問我,Brian啊,點解你可以有咁多女?我話你聽,無人一出世就識拍拖,而我之所以可以教你嘅原因,係因為我拍拖俾你多。
你係咪依然未有拖拍?你係咪錯過咗好多段愛情?你覺得自己係咪一個喺愛情入面失敗嘅人?我知,你呢刻嘅答案可能係yes,但係我好有信心咁講,你睇到呢一條片,就代表住你嘅答案將要俾我改寫。
我係Brian Yu,係一個戀愛經驗豐富嘅戀愛學導師。你有冇諗過自己可以每日交友Apps上面有過百個match?每星期可以換一條女?每個月都可以有唔同嘅追求者?
無論你係男定女,你都值得去買我個course。我會教你一個自動吸引異性嘅方式,同埋點樣喺唔同嘅情況下同異性建立好嘅關係。喺呢條片嘅最後,我會送俾你一條免費嘅教學影片,呢條教學片將會係限時嘅,所以如果你仲睇到,你記得把握機會去睇。」




 
睇完呢條片,我同Kelly對望咗幾眼。
「佢條仆街都可以教人拍拖?」Kelly已經由嬲變到呆咗。
「百貨應百客啫。」我一邊答,一邊諗,唔通Brian突然搵翻承心係同佢嘅course有關?
 
呢個時候,我諗到一個好可怕嘅可能性。
「唔通,佢想利用承心嚟示範佢嘅所謂溝女技巧?」我一講出嚟,嗰邊嘅Kelly已經粗口連珠炮發。
「唔會。根據佢ig,Brian已經有一個公開嘅女朋友。」偵探已經好快咁起咗Brian底。
 
到底Brian想點呢?
呢個問題連偵探都未諗得到。
而我哋可以做嘅,就只有喺呢個星期入面多啲陪承心做好心理準備,然後迎接充滿不穩定嘅一日嘅來臨。