當我同Kelly跟住偵探去到隔離房嘅時候,情況繼續係Brian講緊嘢,而承心喺度無助咁喊緊。
 
「要同分手嘅人做翻朋友我相信唔係一朝一夕嘅事,但其實今日你可以坐喺呢度同我對話,已經係一個好開始。我覺得我哋……喂你哋做咩事入哂嚟?」
Brian講講下嘢見到我哋三個入咗房,即刻指住我哋。
「今晚嘅和頭酒結束,我係老闆,我話嘅。」偵探踏前一步,望住Brian。
「Serious?老闆大哂?我有簽約㗎!」Brian原來早有準備,一手喺衫袋度抽出份合約放喺枱度,然後一臉囂張咁望住偵探。
 
偵探望住得勢不饒人嘅Brian,非常冷靜咁回應咗一句:「老闆唔係大哂。」
然後,佢舉起咗手上面嘅鐵水樽。
Brian見到偵探呢個認真樣,終於有少少緊張咁講:「你…你想點啊?」




偵探用銳利嘅目光釘實Brian,然後慢慢咁講:「對我嚟講,承心先係大哂。
講完呢句之後,偵探衝前一步,用力用水樽對準Brian個肚一下打咗落去!
 
呢一下,快到我同Kelly兩個企得咁近嘅人都阻止唔切。
因為我哋都無諗過偵探真係會打咗落去。
承心都俾呢一下嚇到停止咗喊聲,企咗喺偵探隔離,望住慘叫一聲痛到彎哂腰嘅Brian。
 
「你…我要報警,告到你破產……」
Brian講呢句嘢嘅時候我仲未見到佢個樣,因為佢仲係痛到未企得翻直個身。
雖然我都知偵探打呢一下嘅後果將會好嚴重,但係睇到Brian呢個賤人咁痛其實又真係幾心涼。




 
「喺你報警之前我勸你諗清楚,如果真係報警,到底邊個後果會嚴重啲。」偵探一邊講,一邊行去彎哂腰嘅Brian面前,然後一手勁快咁伸咗入Brian件西裝褸度。
「你……!」Brian仲痛緊,所以阻止唔切偵探嘅動作。
偵探隻手一入一出,伸出嚟嘅時候手上面多咗一樣嘢。
係一部爆咗鏡頭嘅針孔攝錄機。
 
「你要搞真人示例,仲要收得咁貴,無段片邊有說服力啊?所以我已經估到,就算你肯唔表面開Live,但暗地裡一定有做手腳。啱啱你一邊講嘢,一邊係咁整你件西裝褸,我已經覺得好奇怪。然後我細心啲睇,我發現你著到身光頸靚,但係竟然無扣到西裝褸嘅第三粒鈕,成件事實在太可疑,所以我就估到,你一定係收埋咗隱藏鏡頭喺件衫度,所以先要成日整件衫嚟調整翻好個角度。」
偵探一邊講,Brian塊面一邊變色。
「所以我啱啱係專登瞄準部針孔攝錄機嚟打嘅,佢雖然拍唔到嘢,但係sd card入面有哂你偷拍嘅證據。而我哋公司電話亦都有你應承過唔錄影嘅電話錄音,所以而家你係犯緊偷拍罪。如果呢單嘢揚咗,你唔單止要俾人告,你嘅生意應該都會大受影響。」
偵探就好似一個出色嘅棋手,非常冷靜咁將Brian逼入死局之中。




 
「我做生意又關你咩事?」Brian終於企翻直個身,一臉憤怒咁望住偵探。
「第一,你傷害咗我愛嘅人;第二,你無資格教人愛情。」偵探完全唔怕Brian嘅惡形惡相。
「無資格?你拍過幾多次拖啊?我食女多過食菜啊,你憑咩話我無資格?」Brian應該係見反正呢刻無哂錄影,索性原形畢露。
「你所做嘅,只係畜生一樣嘅性慾發洩行為,呢樣唔係愛情。你當年完全無關心一個因為你而為情受傷嘅人,仲要為一己私利而逼佢接受你做朋友,你連尊重一個人都唔識,你絕對無資格去教、甚至係提起愛情。」偵探踏前一步,氣勢強到Brian不自覺後退一步,「我拍拖嘅經驗係唔夠你多,但係,我對承心嘅愛一定比你多。
莫講話Brian,就連我同Kelly都估唔到,平日文質彬彬沉默寡言嘅偵探,竟然可以有咁嘅氣場。
 
Brian指住偵探,凌空指咗幾下但咩都講唔出,最後留低咗一個狠樣,一手搶翻部爛針孔攝錄機就開門走咗。
偵探好細聲咁呼出一口氣,然後好溫柔咁同身邊嘅承心講咗一句:「無事啦。」
承心雙眼都紅哂,但同時露出咗一個欣慰嘅微笑,然後攬住咗偵探,將個頭埋咗喺偵探嘅心口前面。
我同Kelly睇住佢兩個嘅互動同埋偵探趕走Brian嘅一幕,心裡面都戥佢哋開心。
 
因為大家咩都未食,所以偵探建議大家一齊食埋晚餐先走。
「咁食咩啊?」Kelly對於呢啲團體活動總係特別有興致。
「我哋而家喺大埔,我之前食過一間喺廣福街附近嘅雞煲幾正。」偵探主動建議。




「吓,但係我嘴入面生咗兩粒飛滋喎,不如……」我講咗兩句,然後自己就停咗一停。因為我諗到其實偵探雖然同我哋識得耐,但佢好少會同我哋一齊食飯,即使以前大學,好多時佢都係自己帶飯。
而今晚佢會建議大家一齊食,仲要食雞煲呢啲熱鬧嘢,某程度上反映緊佢今晚真係好開心。
所以我都係決定唔好打擾佢嘅好心情。
「一於去食雞煲啦,我去以毒攻毒!」我肯定咁點咗一下個頭,然後喺心入面為個嘴默哀。
 
結果,我哋一行四人就去咗食個任食雞煲。
除咗偵探之外,同樣開心嘅人仲有Kelly。
成餐飯佢同偵探對飲咗兩三罐啤酒,然後狂讚偵探英雄救美又型又man,跟住又用盡佢識嘅詞匯嚟狂鬧Brian,隔離枱聽到分分鐘會以為Brian係佢前度。
而承心喺成餐飯入面都笑得好開心,睇嚟佢心情都無俾Brian影響到好多。
 
「咳咳……」呢餐飯食咗一個鐘左右,承心突然舉高咗手笑一笑:「我有啲嘢想講。」
我哋三個即刻專心咁望住佢。
「其實,我真係好多謝大家今晚幫助我,無你哋呢星期嘅支持,我估自己連見Brian嘅信心都無。所以,呢杯係我敬大家嘅。」承心舉起酒杯,大家亦相當配合咁即刻同佢碰杯。
「而我其實今晚仲有一件事要同大家宣佈嘅。」承心一邊轉身喺自己個袋搵嘢,一邊繼續講:「呢件事我應承咗自己,只要順利過到Brian呢關,我就一定要做。」
講完呢句之後,承心攞咗一張紙出嚟,放喺枱面。




 
我一眼就覺得張紙好面善,再睇清楚啲,呢張竟然係一份「分手和頭酒」嘅合約。
我未睇完,Kelly已經一手攞咗張紙,然後叫咗出嚟:「呢張咪你同偵探簽嘅合約?」
一聽到呢句,我同偵探一齊望住承心,而承心點一點頭。
 
「無錯,大家而家食緊呢一餐,就係我同阿知嘅『分手和頭酒』。」承心好冷靜咁講。