喺呢程車入面,我同Kelly嘅手一直都無分開過,而且其實仲拖得有啲緊。
可能對我嚟講,呢一隻手係我好唔容易先有勇氣去拖住,所以既然拖起咗,我就唔想放。
所以直到落車嘅一刻,我哋都係拖住手落嘅。
 
只不過,我哋唔係即刻上我屋企,而係去買咗啲過夜一定要準備嘅嘢。
嗱,唔好諗歪,我哋只係去買牙刷同一啲女仔要用嘅清潔用品啫。
老實講我係唔介意同佢share牙刷用嘅,但係Kelly堅持呢件事好嘔心,加上佢話上次留宿一晚嘅時候第二日無得卸妝好唔方便,所以就捉咗我去間開到好夜嘅雜貨舗買嘢。
「連牙刷都買埋,咁快想進駐我屋企?」我笑一笑咁講。
「你個心我都進駐咗,入埋係屋企有幾難?」Kelly一貫嚚張咁答我。
 




終於搞咗一輪之後,我哋翻到我屋企。
呢次亦都係,我哋第一次拖住手咁入嚟。
成個感覺,就好似翻到我同佢嘅屋企一樣。
 
我哋就咁入咗屋,拖住手企咗喺度。
即使靜到一粒聲都無,但係,空氣之中都充滿咗無聲嘅甜蜜同曖昧。
「我…我去沖個涼先。」
雖然間屋黑到我唔係好睇到Kelly呢刻嘅表情,但係從佢把聲聽得出,其實佢有啲怕羞。
可以令到平日厚面皮到不得了嘅佢怕羞,我都忍唔住笑咗出嚟。
原來,呢一種咩事都無發生但係都可以笑嘅感覺,就係我久違嘅幸福感。




 
因為我阿爸間房其實係套房,所以我都唔執輸去沖咗個涼。
沖完之後行翻出房,見到Kelly已經坐咗喺廳個梳化度吹緊頭。
我即刻坐咗去佢身邊,然後拖住咗佢隻手。
 
「喂,得一隻手點吹頭啊!」Kelly笑住咁問我。
「合作咪得囉。」我笑住伸隻手上去Kelly個頭上面,跟住佢個風筒幫佢撥頭髮。
「你真係諗清楚要同我一齊?我啲分手黑歷史好多㗎喎。」Kelly一邊吹頭,一邊問我。
「又係你話我哋過去都有好多不完美嘅,既然係咁咪一齊努力成長下囉。定係你想反悔啊?」我乘機督咗佢個頭一下,Kelly亦都唔執輸咁好大力拍落我大脾度反擊。
 




就係呢一刻,屋入面突然響起咗一啲聲。
風裡笑著風裡唱 感激天意碰著你
 
原來係鬧鐘聲,時間已經嚟到十二點。
喺「今生今世」嘅伴奏之下,我輕輕攞走咗Kelly手上面嘅風筒,然後熄咗佢。
然後,我靠到好近咁望住Kelly,近到可以聞到佢頭髮上面嘅洗頭水味。
 
我想,呢一首歌,以後都唔再代表歐雪,而係代表我同Kelly。
諗到呢度,我情不自禁咁望住咗Kelly。
而Kelly亦都望住咗我。
 
呢一刻,空氣都好似靜止咗。
成間屋嘅空間入面好似只係淨翻Kelly一個人,其他所有嘅傢俬、物件,全部都消失咗。
唯一能夠進入我雙眼入面嘅,就只有Kelly一個。
 




我哋雙眼好似有磁力一樣,慢慢,慢慢,將對方吸引靠近自己,同時間亦都令自己逐步靠近對方。
直到,感受到對方嘅氣息。
Kelly嘅氣息,係短促嘅,代表佢有啲緊張。
我嘅氣息,係緩慢嘅,代表我為自己做緊準備。
 
我哋兩個將靠近嘅距離維持喺彼此差啲用鼻尖掂到對方鼻尖嘅距離,用唔同節奏嘅氣息挑誘對方,睇下邊一個首先按捺不住。
而我哋雙眼,一直都無離開過對方,就好似非常認真咁去確認緊,到底對方嘅雙眼之中,係咪真係放得落自己。
 
終於,呢一場拉鋸戰,我輸咗。
我抵受唔住Kelly近在咫尺、彷似有生命力咁一直呼喚我嘅嘴唇。
所以,我錫咗落去Kelly度。
Kelly嘅嘴唇好軟,錫落去,就好似用嘴唇掂緊一粒橡皮糖咁。
Kelly對於呢一吻並無抗拒,反而輕輕攬住咗我,一下將我拉到訓咗喺將梳化度。
我哋錫嘅動作,由試探式嘅輕吻,到逐漸熟習對方嘅節奏,然後再到深情嘅長吻卜。
 




而好自然地,我根據大家嘅反應,條脷慢慢伸出去想試下Kelly嘅反應。
點知一伸脷,我感受到個肚遭受到強勁嘅衝擊,成個人即刻向後彈開。
原來,我係俾Kelly一腳伸開咗。
 
「咸濕仔,邊個話咁快俾你得手。」Kelly一臉得意咁望住我。
雖然喺情到濃時俾人踢一腳的確係大剎風景,但係望住Kelly呢個可愛嘅刁蠻樣,又真係嬲佢唔落。
「咁唔知邊個良辰吉日我哋先可以打翻個茄輪呢?」所以,我都係乖乖地爬翻上梳化問佢。
Kelly眼珠一轉,然後笑住答:「等你啲飛滋好翻先啦。」
聽完之後,雖然知佢係講笑,但係我恨不得立即入廚房用一樽鹽「喇」翻好哂啲飛滋。
正所謂,為咗茄輪,你可以去到幾盡?
 
由於呢一日實在發生得太多事,最後我同Kelly都係各自入翻房訓。
某程度上,其實大家都真係需要各自靜一靜,去諗下今日到底發生咗咩事。
一日之內,承心同偵探捱過咗一關。
一日之內,我已經見咗Kelly家長。




一日之內,我就同咗Kelly一齊。
 
所有嘢都發生得好快,但係又非常之咁美好。
我曾經以為當歐雪離開咗我生活之後,佢帶走埋我一生人嘅幸福。
但係直到Kelly出現,我先發現其實幸福一直都喺我眼前,只係我唔敢去執起佢。
而今日,我終於做咗呢個咁重要嘅決定。
重拾幸福。
而我發現自己,或者真係有資格去擁有幸福。
 
朝早八點,我起咗身。
刻意咁早起身嘅原因,係我想煮個早餐俾Kelly食,當係慶祝下我同佢終於一齊咗都好。
果然當我起身嘅時候Kelly依然未醒,所以我都好順利咁成功為佢準備到呢個早餐嘅驚喜。
Kelly一起身見到一枱煮好哂嘅早餐,好高興咁錫咗我一啖,然後就陪我坐低食嘢。
呢一種一起身就見到大家,可以坐喺餐枱前面閒話家常嘅生活,其實係我夢寐以求嘅。
 




細個嘅時候,因為爸爸行船,所以一家人可以一齊食飯嘅機會根本少之又少。
而同歐雪一齊嘅時候,大家都係中學生,根本就唔會有機會可以喺對方屋企留宿。
直到而家,我終於可以享受呢一種咁平凡嘅幸福生活。
望住Kelly食早餐食到津津有味嘅樣,真係,好幸福。
 
食完嘢,Kelly話想翻屋企換件衫再翻工。
點知兩個鐘之後,Kelly竟然攞住個喼翻咗嚟。
原來佢話一翻到去,佢阿媽竟然喺度等佢門,仲鬧咗佢一獲。
Kelly眼見根本就解釋唔到啲咩,但係又唔想聽佢阿媽啲無理性嘅漫罵,所以決定搬過嚟我度暫住幾日,等佢阿媽冷靜少少再翻去講數。
就係咁,我同Kelly就開始咗半同居嘅生活。
 
我哋每日都一齊翻工,一齊放工,有時仲會邀請埋偵探同承心一齊嚟食飯。
對於我同Kelly一齊咗,偵探都表現得非常開心,仲表示自己一早有慧眼預知到我同Kelly有可能。
但係最後,佢無得到我同Kelly嘅感謝,反而係換嚟承心笑佢認叻。
我哋四個人,各自都帶住唔同嘅故事,但係走到今日竟然可以帶住幸福咁一齊坐低圍埋食飯。
 
我相信,咁係因為大家用盡全力去打開咗自己嘅幸福之門。
就好似「求婚大作戰」一樣,靠女主角最後推開大門,先可以搵到幸福。
而今日嘅我哋,亦都係咁樣各自克服咗自己嘅挑戰先可以走埋一齊。
 
呢一個幸福而和諧嘅畫面,如果作為一個故事嘅結局,其實已經相當美滿。
可惜嘅係,呢刻嘅故事原來只係結局篇之前嘅序幕。