冬去春來,又係萬物煥然一新嘅季節。
當然,我依然係搞緊「分手和頭酒」。
而今日和頭酒都遇上咗一件新鮮事,就係我今日眼前嘅客人,係一位明星。
 
雖然稱佢為明星又有少少誇張,因為其實佢只係三色台入面一個二三線嘅女星,即係你會認得佢但係又總係叫唔出名嗰種。
而今日嘅會面佢刻意約咗喺一間高級酒店嘅餐廳度,加上喺室內戴埋太陽眼鏡,應該好擔心有人認得出佢。
雖然我好想話佢知,其實你只要唔化妝就無人認到你,不過既然佢係我個客,就無謂得失佢。
 
「我想同我男朋友有一個夠保密嘅地方,然後名正言順地去分手。我聽聞你哋可以代人安排地方加埋做好事前準備,所以我先搵你哋幫手。」二線女星毫無表情咁樣講。
「嗯……我手頭上有幾間相熟嘅餐廳係做私人booking嘅,遠到大美督、深水灣、馬灣都有,只要出得起錢,我都可以擔保無人會知你哋去過嗰度食飯。」我有好信心咁講,畢竟我都搞咗和頭酒唔止六年,同類型想要保密嘅客人其實我都接過幾個嘅。




 
「好,咁你幫我安排啦。另外,我只係想有一餐飯同我男朋友講分手,所以我唔想有人打擾,最好嗰日連你都唔在場就最好啦。」二線女星又講,呢個咁冷淡直白嘅態度完全唔似佢喺電視前面性感熱情嘅定位。
「嗯……因為我始終係呢一餐嘅負責人,即使我可以唔在場睇住你哋食,我都會喺餐廳等到你哋食餐完畢嘅。如果你哋擔心用餐內容會外洩,合約上面我可以加翻個保密條款。」我好客氣咁答。
「就咁吖。唔該哂你。」二線女星好爽快咁同意。
 
之後,二線女星同我確認咗啲個人資料,包括埋佢要分手嘅對象嘅資料。
我一聽,就明白點解佢咁著重保密。
因為佢嘅分手對象,係一位官員。
雖然呢份官員同佢一樣都係二線,即係記者會會企最後排嗰種。
但係重點係呢位官員係有家室嘅,所以唔怪得要咁保密。




 
其實近年「分手和頭酒」的確多咗呢類型嘅客。
即係佢哋係一心一意嚟分手,而搵我哋只係為咗有一個比較儀式性嘅過程。
對於呢類型嘅客,我哋通常都會有兩個做法。
基本上,大部分嘅客我哋都會照做下資料搜查,睇下當中會唔會有咩內情,呢個亦都係我哋分手和頭酒嘅原意。
但係少部分好似今次二線女星呢啲case追求高度保密嘅,咁我哋就唔方便做太多,純粹幫佢做個晚餐搞手就ok。
 
搞掂哂基本嘢之後,因為佢要嘅餐廳需要高度保密,所以需要一啲時間。
我最後幫佢安排咗晚餐喺一個半星期後,而佢亦都相當滿意地點,然後就離開咗。
我估唔到呢個女星都幾爽快,成個會面時間只係用咗我廿分鐘,比我想像中快咗好多。




不過,呢件都係好事,因為我可以提早去接Kelly收工。
 
無錯,自從歐雪事件之後,我見識咗Kelly嘅主持人功力,覺得其實以佢把口都可以勝任到主持職位,所以只要佢唔洗做花藝師嘅嘢,偵探都會將一啲經過調查後覺得相對簡單嘅job交俾佢。
而今晚,佢嗰邊就處理緊一對將要分手嘅情侶。
聽偵探講,嗰邊嘅分手係由誤會導致嘅,咁所以我提早過去,就可以順便望下Kelly嘅功力救唔救到嗰pair情侶喇。
 
而喺過去呢四個幾月入面,除咗Kelly嘅工作多咗之外,我同佢嘅感情都係不斷升溫緊嘅。
雖然之前說好的見佢媽媽拖到今時今日都未見到,但係我同Kelly嘅關係已經發展得相當穩定。
簡單啲咁形容,就係大家已經習慣咗生活中有大家嘅存在。
 
有Kelly嘅生活,我先發現自己原來實在收埋得自己太耐。
當然,收得耐,先會特別珍惜而家有Kelly一齊嘅幸福。
而係Kelly身上,我都見到佢成長咗好多。
雖然我哋有時都會因為生活或者工作而嘈交,但係我從未喺佢口中聽到過「分手」兩個字。
佢確實做到佢自己講過嘅認真同埋陪我一齊成長,而呢樣嘢亦都係令我哋感情升溫嘅原因之一。




 
變化的確有好多,但一樣有啲嘢係無咩變化嘅。
我講緊嘅,係我嘅驚恐症。
我起初以為歐雪件事解決咗之後,我應該就可以完全擺脫到驚恐症。
但係我發現我依然對人群密集嘅地方有唔舒服嘅感覺,坐巴士亦都唔太想坐上層。
 
上星期啱啱好係4月8號,亦都係我每年嘅「分手悼念日」,今年我刻意叫埋Kelly陪我做下實驗,睇下自己克服到恐懼未。
結果,的確三個項目都有好轉,例如好輕鬆上到上層、可以入到赤柱pizza店、可以入到3號戲院坐最前排一陣。
但係,當我想再進一步嘅時候,驚恐症就會出嚟阻住我。
我同Kelly問過醫生,醫生話原因可能有兩個。
一、時間尚早,我需要多啲時間嚟復元;
二、歐雪只係起因,但唔係我心底最大嘅恐懼,所以我依然未消除哂所有問題。
 
本身我以為驚恐症未處理好哂,但其實我日常生活都正常人無分別,應該無咩大礙嘅。
但我發現自己有幾次Kelly遲咗覆我電話,又或者講到一啲將來結婚計劃嘅時候,我都會出現呢種驚恐症嘅反應。




咁即係代表,喺我心入面,其實對關係或者婚姻仲未可以完全放心。
我有諗過,到底驚恐症會唔會阻到我結婚呢?
呢個問題,當然係無答案嘅。
 
講下講下,我已經嚟到Kelly今晚做嘢嘅餐廳外面。
當我行到入去,我就見到佢同佢兩個客喺餐廳嘅一角傾緊計。
為咗唔阻到佢做嘢,所以我呢啲廿四孝男朋友都係縮埋一邊,遠遠地咁眺望佢俾個驚喜佢接佢收工算啦。
 
人始終都係有好奇心嘅,所以雖然我企得好遠,但係我都有望住佢哋嗰邊做緊啲咩。
首先我見到嗰兩個客都一直喊緊,然後企咗起身,男嘅走咗去錫咗個女仔一啖,然後就攬住個女仔。
我企到好遠都見到佢兩個喊到好似電話震機咁,咁睇嚟Kelly應該幫到佢哋兩個破鏡重圓喎。
 
之後佢兩個稍為平靜咗,個女仔離咗席,根據我睇人復合咁多次嘅經驗,我已經估到呢個女仔準備要做咩。
呢個女仔九成係去補妝。
大佬啊,既然有翻個男朋友,又喊到豬頭咁,梗係要補個妝賀一賀佢先啦,如果唔係一陣點影記念相。




 
當個女仔走咗嘅時候,我本身已經想出去俾個驚喜Kelly。
點知,我見到個男仔喺佢個袋入面遞咗一個信封俾Kelly,然後口嗡嗡咁同Kelly講咗啲嘢。
我見Kelly聽得好認真,然後一邊接咗個信封,一邊竟然好似喊緊。
我好好奇到底佢哋傾緊啲咩,但係又唔想喺呢一刻打斷佢哋,所以唯有繼續睇。
就喺呢個時候,本身嗰個女仔翻咗嚟,然後個男仔對個女仔講咗幾句嘢,女仔個樣睇落有啲意外,然後都拍一拍Kelly,好似想俾鼓勵佢咁。。
 
睇到呢度,我用喺偵探身上學到嘅觀察入微得出到幾個總結。
第一,Kelly同呢個男仔客人應該本身係識嘅。
第二,呢個男仔客人會將佢同Kelly嘅嘢話俾佢女朋友知,即係代表至少唔係個男仔同Kelly暗地裡有路。
憑我凡人嘅智慧,我只係諗到呢兩樣嘢,但既然我信關係應該要坦白,所以我決定趁住佢哋而家準備走嘅時候,直接問下Kelly。
 
「喂靚女,今晚得唔得閒啊?」當Kelly一行三人傾住計想行出餐廳嘅時候,我就彈咗出嚟。
「阿濤……你嚟咗好耐啊?」Kelly一見到我,比起驚喜,反而似驚慌多啲。
「一陣啦,我嚟接你放工嘛,你同兩個客傾得咁開心嘅,唔通你哋本身係識嘅?」雖然我自己平時都會同客傾計,所以我呢個問題其實有少少唔合理,不過呢個時候為咗問清楚,就唔好太計較內容喇。




「吓...... 咁都俾你發現咗。」Kelly呆咗一下,然後就笑住咁指住個男仔講:「佢係奕民,係我以前喺美國讀大學時候識嘅同學,佢而家仲喺美國讀緊書㗎,只係佢同女朋友有啲事想分手,而又咁啱放假喎,我咪叫佢帶埋女朋友翻嚟試下參加分手和頭酒傾下囉。隔離呢位就係佢女朋友,佢叫做阿June。」
Kelly一邊介紹,奕民同我握咗下手。
而阿June就同我揮手微笑,睇佢小麥色嘅健康膚色同埋幾深嘅輪廓,都感受到佢身上有異國風情嘅味道。
 
「你男朋友嚟咗,咁我唔阻你啦,保重,之後再聯絡。今晚唔該哂你。」奕民向我哋點一點頭,就拖住女朋友走咗。
而我拖起Kelly準備離開。
當我想拖落去Kelly隻手度嘅時候,發現佢隻手仲揸住封信,而Kelly一見到我留意到封信,就即刻將封信收咗入袋。
我咩都無講,淨係拖住咗Kelly,因為我信佢會自己同我講。
 
果然行咗幾步,Kelly就問我:「你......頭先有冇見到我喊啊?」
我「嗯」咗一聲。
「其實啱啱奕民同我講咗個消息,我有一個都係喺美國度識嘅同學過咗身,而啱啱你見到嘅信封,入面裝嘅係幾張我同佢嘅合照。」Kelly一講,個樣都有啲黯然神傷。
我一聽完,我就明白咗點解佢會喺餐廳度喊。
於是,我將佢攬實咗俾一啲安慰佢,而Kelly一俾我攬住,即刻喊到收唔到聲,而我唯有好似氹小朋友咁摸住佢個頭安慰佢。
 
就喺我安慰嘅時候,突然一個畫面閃過我嘅腦海。
就喺我啱啱想拖Kelly而佢又未收好個信封嗰一刻,我見到個信封係薄身嘅。
如果信封裝咗幾張相,應該會有翻少少厚度吖。
 
換言之,信封入面應該唔係相,而真係一封信。
到底係一封咩嘅信,先要令到Kelly隱瞞我呢?