「其實,你見到嘅呢封信就係你琴晚見到嗰一封。我都要講聲對唔住,因為我琴晚呃咗你。裡面其實唔係咩相,而係呢一封入學證明書。
呢一間係一間喺美國好出名嘅花藝學校,可以話係全世界第一,基本上做花藝師嘅人都會想入呢間學校。其實我以前喺美國讀書嘅時候,每年都會寄信去報呢間學校,但最後當然一直都失敗啦。後來我翻嚟香港,都有繼續叫奕民幫我寄,因為始終本土寄本土會方便啲。
而琴晚奕民就係特登拎咗呢封信俾我,話我知一星期前佢喺美國收到呢封信,然後就順便帶翻嚟香港俾我。佢估有回信應該就係代表呢間花藝學校終於收咗我。我收到嗰一刻其實好驚訝,但唔知點解心入面更多嘅傷心同擔心,因為如果我去到讀書,就代表我要同你分開一段時間。所以琴晚我嘅心情好複雜,一邊諗緊點樣同你講,另一邊亦都諗緊好唔好放棄呢個機會,因為始終我都未經你同意就報咗名。」
 
聽完Kelly講嘅嘢,大致上其實同我估嘅差唔多。
因為我今朝入房所睇到嘅就係信嘅上半部分。
信係用英文寫嘅,而且又有logo又有格式,睇落相當認真。
當我認真去睇下個標題,我個心已經有啲驚訝。
因為封信嘅標題係「Confirmation to your application of our Floral Programme」。
中文翻譯過嚟,就係呢封係一封確定Kelly申請花藝課程嘅信。




由嗰一刻開始,我已經估到少少,而呢刻聽埋Kelly解釋,我就明白哂。
 
「咁其實你要讀幾耐?」我決定問最重要嘅問題。
「一年。」Kelly好認真咁望住我講。
聽完之後,其實我個心係放鬆咗少少嘅。
「我知一年可能唔算長,但係我知你本身就安全感唔多,我怕你呢一年自己一個好辛苦,我亦都唔希望呢個決定會影響到我哋嘅關係。對我嚟講,你真係好重要。」Kelly好溫柔咁摸住我塊面,然後竟然流咗幾滴眼淚。
 
望住佢喊緊嘅樣,我完全無嬲佢琴晚呃我,我反而好明白佢呢一刻心情好矛盾。
一邊係難得嘅夢想,一邊係珍惜嘅關係。
而其實我知道,其實一切嘅決定權都喺我手上。




如果我一句「唔想佢去」,我相信Kelly真係會即刻放棄。
 
但係,呢個並唔係我想要嘅結果。
我一直以嚟愛嘅,都係嗰個我行我素,勇敢去追求佢所鍾意嘅嘢嘅Kelly。
如果我迫佢留低,其實我亦都只係抹剎緊我自己鍾意嘅佢。
我知道,喺呢一件事入面要作出改變嘅唔係佢,而係我。
我要學識放低對關係嘅恐懼,俾啲信心Kelly,等佢可以放心追夢。
 
當我心意已決嘅時候,我一手將Kelly拉咗埋身邊,然後從後攬實咗佢。
Kelly個頭向後挨住我個膊頭,一直喺度喊緊。




我用手慢慢抹走佢嘅眼淚,喺佢耳邊慢慢咁講:「傻妹,去追夢啦,我會支持你。」
但係Kelly嘅喊聲無停過,佢斷斷續續咁講:「我…好驚…會無咗你啊……」
我加強咗攬住Kelly嘅力道,然後講:「所以我會努力加油,乖乖地掛住你,同埋學識信任呢段關係,唔好成日俾自己嘅恐懼嚇親。」
Kelly一個翻身就跪咗喺梳化度,然後正面咁攬住咗我,喊住繼續講:「我怕我以後都見唔到你啊!」
聽到呢句,我忍唔住笑咗出嚟,然後即刻扮翻認真咁講:「傻妹,去讀書啫,同埋你放心,我一定會喺香港等你翻嚟。」
 
Kelly暫停咗喊聲,用一對紅哂嘅眼望住我問:「真係?唔會乘機溝女?」
我反咗佢一個白眼,然後講:「點敢啊,一陣你又拎較剪出嚟我咪死!」
Kelly指住我,扮嬲咁講:「哦……即係唔敢,但係你想!」
我伸手兩隻手指夾住咗佢隻手指,然後講:「你都唔好諗住食鬼仔啊!我香港人都唔係東亞病夫嚟㗎!」
Kelly笑咗一聲,然後講:「咁為免你被鬼仔打死,我都係唔好溝鬼仔啦!」
「你睇少我,就等我俾你見識我嘅功夫啦!接我一招龍爪手!」
「死咸濕仔!今日你死梗啦!」
……
 




嗰一日,結果又喺快樂嘅歡笑聲之中渡過。
而由嗰日開始,我同Kelly正式為為期一年嘅暫別做好準備。