原來,我同Kelly可以準備分開嘅時間唔多,只喺得兩個星期,佢就要去美國嗰邊預備入學嘅事。
對於呢個嚟得咁突然嘅分開,我都無其他辦法,唯有將可以推嘅job都推咗,最後只係剩翻二線女星嗰一餐秘密晚餐我要出席。
而好彩呢一餐喺係Kelly走之前嗰一晚發生,咁即係我第二日都仲可以陪到Kelly食埋個早餐先出發去機場。
 
我曾經諗過,呢一年可以將所有工作放低,然後陪Kelly過去美國。
但係我又諗到,一來其實「分手和頭酒」嘅booking分佈咗喺嚟緊半年唔同日子,無咗我同Kelly,如果要偵探一腳踢又實在係太強人所難。
而且Kelly都同我講,「分手和頭酒」呢件事好有意義,佢都贊成我可以一心喺香港打理好呢件事,而佢會喺美國專心讀好書,定期同我聯絡。
 
所以當一切都準備好之後,我開始咗同Kelly差唔多無時無刻都一齊共處嘅兩星期。
呢段時間入面,我陪佢去哂海洋公園同迪士尼,然後俾佢逼咗我上我最唔鍾意嘅機動遊戲;




佢又搵咗唔少打卡café,要我陪佢影咗好多ig女神相,話要去到美國都有足夠嘅相可以慢慢po下呃Like;
佢又同我差唔多去哂十八區,每個區都跟足嗰啲網上指南又食又行,搞到自己好似遊客咁。
我哋亦都同偵探承心食咗幾餐飯,都係佢哋幫Kelly踐行。
呢段時間差唔多每一日我同佢嘅日程表都係填滿嘅,雖然係好攰,但係對我嚟講一樣過得好開心。
因為,而家每一刻見佢嘅日子我都總係覺得好奢侈。
我發現,原來即使Kelly未走,我已經開始掛住佢。
 
轉眼間,時間嚟到Kelly臨走前最後三日。
由於聽日我要去幫二線女星搞和頭酒,所以今晚將會係我同Kelly嘅最後晚餐。
而今日嘅朝早同晏晝,Kelly就捉咗我去長洲。




 
「唉,都唔知去到美國無得再食魚蛋點算啊!」Kelly一邊含住咗兩粒大魚蛋喺個嘴度,一邊講。
睇住佢塊面漲卜卜咁,真係好鬼死可愛。
「你自己帶定一包魚蛋過去囉!」我飲住手上嘅梯枝甘露咁答佢。
「痴線啦,我連啲衫都未放得哂啊……嘩!」Kelly嘢都未講完,就俾前面嘅嘢吸引咗,然後一步就衝咗去。
我跟咗上去,原來佢睇中嘅係一個由四邊鐵絲網整成嘅屋仔。
四面鐵絲網上面都綁咗好多塊木牌,而木牌上面就係俾啲情侶寫下啲情話綿綿嘅嘢。
簡單嚟講,都係用嚟搵食嘅。
 
「我要寫!」Kelly好興奮咁講。




「真心咩?呢啲係呃下啲中學生初戀嚟寫㗎喎。」我望住眼前嗰塊寫住「雯B醉噯然囝」嘅木牌講。
「呢啲嘢,係睇寫嗰個人嘅心嘅啫。我哋寫完,睇下下一年再嚟嘅時候呢塊牌仲喺唔喺度都好啊!」Kelly隨手抽起咗一塊,上面寫住「願 往後幸福 歲月靜好」嘅木牌。
聽住Kelly咁講,我都好順攤咁去買咗一塊木牌,然後同佢坐埋咗一邊寫。
 
「你寫先!」Kelly一手將枝筆都塞埋俾我。
我諗咗一諗,然後喺塊牌上面寫咗:「祝Kelly學業順利。」
「頂,而家拜年啊?再寫過!深情啲唔該。」Kelly一臉嫌棄咁搶咗我枝筆,然後刪走咗我寫嘅嘢。
「諗唔到喎,你示範下喇!」反正我真係未諗到,我索性連塊牌都俾埋Kelly,睇下佢寫咩都好。
 
Kelly攞起塊牌,諗咗一諗,然後就咁喺上面寫咗「平安」兩個字。
我見到,忍唔住笑咗出聲咁講:「你都唔係好我好多囉唔該。」
Kelly無好似我預期中咁駁翻我,佢繼續耷低頭望緊塊木牌,然後講咗一句:「你知唔知我最放心唔落就係你啊?」
我聽到佢咁認真嘅聲,即刻停咗無再笑,然後我見到木牌上多咗幾滴眼淚。
 
我即刻攬住咗佢,俾佢喺我膊頭度盡情喊。




「係我唔好啦,成日要你擔心。放心喎,香港有偵探同埋承心陪我,我ok㗎,一年咋嘛。」我好溫柔咁慢慢掃下Kelly個頭安慰佢。
「我好唔捨得你啊……我唔想去美國啊……」Kelly嘅喊聲好大,大到好似可以由我身體傳入我心臟,令我個心都因為佢嘅喊聲而痛。
「我都好唔捨得你,但係呢個係你嘅夢想嚟㗎嘛,我一定會支持你㗎。」我攬得佢好實,其實係因為唔想俾機會佢擰翻轉頭,見到我自己都忍唔住流緊眼淚。
 
「阿濤。」Kelly突然好冷靜咁叫咗我一聲。
「嗯?」我應咗佢一聲。
 
「你係咪真係想我同一生一世㗎?」
聽到呢個問題,我已經唔理得我自己喺咪喊緊。
我將喊緊嘅Kelly拉翻去我面前,嗰一刻佢見到我喊緊,佢都有少少驚訝。
「由我拖起你嗰一刻開始,我已經決定要同你一生一世。」
Kelly聽完我嘅答案,又再次開始停唔到咁流眼淚。
我一邊安慰佢,一邊攞咗佢手上面充滿佢淚水嘅木牌,翻轉咗去佢未寫嘢嗰一邊,然後寫低咗一句:「一生一世。」
 
如果「平安」係Kelly對我最大嘅祝福,咁「一生一世」就係我對Kelly嘅最大願望。




呢一塊充滿眼淚嘅木牌,最後我哋無將佢掛起鐵絲網上面,而係自己帶走咗翻屋企掛。
以Kelly嘅講法係,祝福,應該係要成日睇到先可以激發宇宙間嘅「吸引力發則」,最後令佢成真。
 
由於今日算係我同Kelly嘅最後晚餐,所以我哋決定跟翻習慣,就係自己煮。
我同Kelly先去咗附近春秧街街市買餸,因為我哋其實成日都自己煮嘢食,加上Kelly又鍾意聊啲街市老闆傾計,所以唔少老闆都認得佢,甚至同佢幾熟。
 
「你要走啦靚女?送幾棵菜俾你啦!」
「放心啦,我見到你條仔溝女,我幫你用豬肉刀劈死佢!」
「條魚計平啲俾你啦,去到外國無呢啲魚食喇!」
「買多個木瓜煲湯啦,外國無湯水飲㗎啦!」
 
睇住連街市嘅檔主都咁唔捨得Kelly,我突然覺得自己心入面有嘅感覺都唔算太過份。
老實講,其實我日日夜夜都喺度掙扎緊到底好唔好叫佢唔好去,一來我唔捨得佢,二來都怕自己頂唔順嗰種long d嘅不安全感。
但係我亦都知道,夢想,對一個人真係好重要。
我亦都記得,Desmond同Chloe呢一對,就係因為一方想追求音樂夢,而一方有唔同志向,所以分開咗。




而家既然我可以支持到Kelly去追夢,其實真係值得俾佢一試。
 
呢一刻,我望住廚房入面煮緊餸嘅Kelly,再諗翻起差唔多一年前佢喺呢個廚房整咗一餐化學廢料出嚟嘅災難。
又有邊個諗到,一年之後,佢依然喺我個廚房入面,但係整出嚟嘅嘢食可以令偵探同承心食過都話唔錯呢?
人,係會變好嘅,而Kelly確實一直喺我身邊成長緊。
 
我唔否定,我心入面最擔心嘅唔係香港無人陪我嘅不安感,而係佢去到外國會遇到比我更好嘅人。
我亦都怕,佢去到嗰邊就會固態復萌。
但係,人,係會變嘅。
我覺得嚟到呢一刻,其實我要學習相信,相信眼前嘅佢已經變好咗。
亦都相信,佢同我一樣,期望緊一生一世。
 
枱上面,放咗四碟家常小菜,而且仲有一個湯。
即使呢啲菜色再平凡,但係我視之為最珍貴嘅美食。
因為呢一年嚟,我一星期起碼有四日都係食緊呢啲有溫度又好味道嘅嘢食,而我知好快我就要食翻發泡膠盒入面嗰啲無感情嘅嘢食。




所以,呢一餐,我一定要好好享受埋佢。
只不過享受之前,仲有一件事要做。
 
我叫咗Kelly坐低等一等我,同埋唔好食嘢住,然後就衝咗入房。
轉個頭我就走翻嚟,手上面拎住咗一支結他。
「你識彈結他㗎?」Kelly有啲驚喜咁望住我,因為佢識咗我咁耐,佢都唔知我其實識彈結他。
 
我笑咗一笑,然後用手開始掃起和絃。
如果呢一餐飯係Kelly留俾我臨告別之前嘅最後溫暖,咁呢一首歌就係我回贈俾佢嘅安心。
「最後晚餐」。
 
人無法走過每天 為求沒有帶著遺憾活到終點
就是你 讓感覺從此不再簡單 平凡
到處也是彩色 只因歲月印有你我的足跡
情從未變 歷練了多少變遷
還記得 當初的手臂 滿載了浪漫與歡喜
好比櫻花盛開日期 我會替你統統儲起
願你沒有牽掛遠飛 在地平線上也有我為你打氣
去吧 我會永遠珍惜你 直到下世紀

 
呢一首歌每一句歌詞,都好似提起翻我同Kelly所經歷嘅每一個片段。
最初,一個愛一個上一課,另一個完全唔敢投入愛情。
然後,Kelly闖入我嘅生命,看似係佢打破嘅我嘅生活節奏,但係反而係改變咗佢嘅愛情觀。
而當佢嘅愛情觀改變嘅時候,佢開始用行動、用認真、用心機,一下下咁敲碎我嘅心牆,幫我面對過去,面對傷口。
直到,我有勇氣去面對幸福,甚至主動伸手去捉緊呢一份幸福。
 
愛情係生活,但更加係感受。
我同Kelly的確喺生活入面留低咗好多回憶,但係去到呢一刻,最可以留喺腦海入面深刻記住嘅,原來係所有佢帶俾我嘅成長同改變。
因為呢啲嘅成長同改變,我更識得去愛佢。
而當我更加愛佢嘅時候,你會好想令到自己成長同改變更多。
 
一個可以令你成長嘅另一半,確實好難得,亦都好值得珍惜。
為咗令Kelly好好珍惜我,我都會好好成長。
所以,我要幫自己克服安全感嘅問題。
所以,「願你沒有牽掛遠飛 在地平線上也有我為你打氣」。
所以,「去吧 我會永遠珍惜你 直到下世紀」。