我將奕民嘅資料同埋關於Kelly嘅事話咗俾偵探聽,偵探聽完都覺得係有多少奇怪。
「放心,盡快幫你查下。」雖然而家其實已經凌晨十二點,但係偵探知道Kelly聽日就走,所以佢都明白儘快搵出真相對大家都好。
有偵探呢句,我當然放心,同時亦都好感謝呢個好兄弟隨時都肯幫手。
 
當然,即使有偵探幫手,我都覺得有需要同Kelly傾下,所以我就即刻whatsapp佢,打算過去佢屋企,叫佢落嚟傾一傾。
點知,過咗十五分鐘,我send嘅whatsapp依然係一個灰剔。
成件事十分奇怪。
我愈諗愈有啲擔心,所以決定都係咩都唔好理,直接去佢屋企度搵佢好似比較好。
 
點知就係我啱啱收起電話準備出發嘅時候,電話就開始震。




而家咁夜無可能有客打俾我,唔通係偵探咁快手?
當我攞部電話出嚟嘅時候,我望到電話上面嘅聯絡人名,成個人一時之間呆咗。
 
因為電話上面顯示嘅人名係一個單字,「媽」。
 
大概喺我十六歲嘅時候,我有咗人生第一部手提電話,而當年都仲係用緊nokia 3310嘅年代。
當我老豆買咗電話俾我之後,佢第一時間攞咗部電話,然後入咗兩個號碼入去。
「我入咗我同埋你阿媽電話入去。」老豆嗰時講咗呢句,就俾翻部電話我。
「我阿媽死咗啦喎。」我好冷淡咁答咗佢一句。
「我其實每次行船翻香港都有見一見你阿媽,佢生活幾好,佢成日都有問起你。呢部電話都係佢出錢買俾你嘅,佢話佢可以俾佢電話你,到你想聯絡佢嘅時候就可以隨時打俾佢。」老豆講完之後,我先知原來佢同阿媽仲有聯絡。




「我阿媽死咗㗎啦。」雖然我咁講,但係其實當我聽到我阿媽仲有問起我嘅時候,唔知點解,我個心有一陣好似被人用力捉住嘅感覺。
呢種感覺,好痛。
我以為由我阿媽離開咗嗰一日開始,我個心一早就已經對佢無咗感覺。
但去到老豆提起佢嘅時候,我先發現原來我依然會因為佢而覺得痛。
 
經過買電話嗰一日之後,我一直都無打俾我阿媽,但同時之間,我亦都無刪走佢嘅電話號碼。
結果,呢個號碼就咗喺我電話卡入面,一直跟住電話卡去到我唔同嘅電話。
 
而時間去翻現時嘅呢一刻,當我望到電話上面出現「媽」嘅電話,我感覺到自己嘅呼吸同心跳加速,同時連手亦都開始有啲震。
我無諗過,驚恐症竟然會喺呢個情況之下都有反應。




可能因為我實在太耐無接電話,所以呢個來電就咁停咗。
但係唔到三秒,「媽」嘅來電又再次出現,睇嚟佢搵得我好急。
 
我猶豫咗一陣之後,因為好奇心,我最後都係用微微震緊嘅手嚟揀咗「接聽」。
「喂?」我嘗試保持冷靜,掩飾自己隔咗十幾年無同佢聯絡過嘅緊張。
「喂,你係咪咩『分手和頭酒』嘅負責人?」
雖然隔咗十幾年,但係我一聽就已經認得出呢一把係我阿媽把聲。
但係,佢講電話嘅語氣同埋呢一句開場白,感覺好似係同緊一個陌生人講嘢。
 
「係。請問咩事?」因為佢語氣嘅陌生感,所以我決定都保持冷靜,睇下佢到底搵我咩事。
「咁就好,即係無搵錯。我想見一見你。」聽埋我阿媽講呢一句,我都幾肯定佢應該唔知同緊佢講電話嘅人係佢個仔,而佢打電話嚟嘅目的亦都唔係搵我,而係搵「分手和頭酒」嘅負責人。
「我唔係好得閒,或者後日再聯絡你?」我諗起聽日要送Kelly上機,所以最快亦都只可以約佢兩日後。
「我想而家見你。」我阿媽嘅語氣好強硬,唔打算俾選擇我。
「唔好意思,而家我唔太得閒。」聽到佢咁唔禮貌,我都決定直接拒絕佢,反正本來我都唔太想見佢。
 




「你應該唔想我用法律嘅方法嚟邀請你見一面㗎可?」我阿媽保持強硬態度咁樣講。
我本身就好唔鍾意俾人逼,而且而家對象仲要係一個自己本身憎嘅人,成件事當然更加討厭。
「我想問下,到底點解你想見我。」我決定問出心底最唔明白嘅問題,想知佢到底無啦啦打嚟咄咄逼人嘅目的係咩。
 
「我係XXX老婆。」
當我聽咗我阿媽講出呢一句之後,我心入面嘅震憾比起啱啱突然見到佢打嚟嘅時候更加大。
因為,佢口中所講嘅XXX,就係差啲俾二線女星殺死嘅官員。
當我知道佢嘅身份之後,我更加明白點解佢要見得我咁急。
 
「好,我可以俾半個鐘你。」我知道呢場見面睇嚟係無可避免嘅,所以索性開出條件。
其實我並唔驚佢用法律嚇我,我肯見佢亦唔係因為佢係嗰個官員嘅老婆而同情佢。
我個心,對於我阿媽依然充滿恐懼同抗拒。
但係,我記起翻Kelly曾經同我講過嘅嘢。
「我知道係你心裡面嘅秘密對你來講好重要,甚至可能會係一個傷害。但係我更加想你面對佢,而家呢個秘密根本就係你身體入面嘅腫瘤,你只係怕開刀會痛所以唔敢做手術。但係你一日唔做手術,你就一日唔會好返。所以我寧願你痛一次,因為你咁先可以俾自己好得返啊。」
 




唔面對過,唔痛過,根本就唔會好得翻。
我知道即使我當我阿媽死咗,但係其實佢一直都係我心中嘅傷口。
我想好翻,所以,我要面對佢。
 
「好,你而家喺邊?」我阿媽爽快答應。
「瑪嘉烈醫院附近。」我心入面覺得好彩自己仲未上到車走,如果唔係到時就仲嘥時間。
「好,我都喺醫院度,咁十分鐘後醫院Canteen等。」講完呢句之後,我阿媽已經好快咁收咗線。
 
當呢一則電話完咗之後,我嘅世界好似突然間靜哂。
我感受到一陣暴風雨前夕嘅平靜。
我本身已經為咗Kelly嘅事而有多少煩惱,但係估唔到一件更煩嘅事會接住出現。
對於呢一個一直以嚟我都當佢死咗嘅人,突然之間就要見面,我完全感受到成個身體都話緊俾我自己聽我依然未準備好。
可惜嘅係,命運永遠都唔會等你準備好先為你帶嚟下一個安排。
 
我唔知自己見到我阿媽嘅時候會點。




我亦都幻想唔到我阿媽見到我嘅時候會點。
我淨係知道,呢一刻,我需要暫時放低Kelly嘅事,然後走上命運無可抵抗嘅安排之中。