[中學][純愛]讀男校嘅我，到底係咪真係咁難識女仔？: 完美

其實除咗嗰一晚，我哋平時都有傾吓偈不過每次傾傾吓佢就話要溫書，咁人哋讀Band 1學校可能學業壓力大啲掛，我呢啲Band 2又點會明吖。其本上我係過住啲一模一樣嘅生活，不過中三嘅學業冇我諗得咁辛苦，至少呢嗰學期都Chill嘅。經歷咗呢幾日上堂發吓夢，玩吓咁，話咁快就到咗禮拜六，我一早起身執好曬啲嘢，帶定幾包紙巾就萬無一失啦！喺出門口之前，我仲特登照一照鏡，希望個頭唔好炒啦！

「媽，我出門口啦！」

「使唔使俾錢你呀，唔好嚇親人喎，人哋好女仔嚟㗎！」

「得啦，帶吓佢食飯同熟悉呢頭咋嘛！」

講完我就頭也不回沖出去，開門嗰一刻，



「早晨呀賢仔！」

我呆一呆，成碌木咁企咗喺度。喺呢短短三秒，我望住佢，佢真係好靚，五官標緻，帶少少混血嘅味道，同時帶點呆氣，真係好可愛。

「望夠未呀，變態仔，再望要你請食飯呀！」

「咁你係靚，我先望㗎嘛。」

「口甜舌滑，咁而家去邊呀！」



佢扮嬲真係好可愛，望住佢特登谷起塊面，我個心跳得好快，不過佢咁可愛令到我笑咗一聲，

「去等𨋢囉！」

「笑咩笑，晏啲你請！」

「得啦！請靚女食嘢絕對係我嘅榮幸。」

佢靦腆咁笑一笑，捲一捲起自己嘅頭髮。我哋行去𨋢口度等𨋢，佢全程望住部手機，而我望到佢嗰側面，正所謂「唔同角度，唔同感覺」，佢嗰側邊個感覺完全同正面唔同，即使唔同但係一樣完美。



「有𨋢啦，傻妹。」 

佢岳高個頭，望一望左，再望一望右，

「你就傻，我不知幾咁聰明呀！」

「得得得，你最聰明，OK？」

「我緊係最聰明啦！我係最完美㗎嘛！」

「係啦係啦，唔使係咁讚自己嘅。」

之後我哋就入咗𨋢 。行吓行吓，我哋行咗去東大街，佢就好似一個細路仔咁，望住五花百門嘅食肆，

「食咩好呀？咁多餐廳點揀呀...」



「不如我帶你去我最鍾意嘅餐廳呀！」

「好呀！」

我哋行咗入去一間泰國餐廳，佢望一望個Menu，不出三秒，佢就放低返份Menu，

「我都係跟你啦，好難諗呀！」

「好呀，唔該兩個海南雞飯呀。」

我哋喺成個食飯嘅時候講咗好多以前嘅嘢同埋一啲返學嘅嘢，喺我哋就嚟食完個飯嘅時候，

「學校有個男仔想追我，但係我對佢真係無Feel囉。」



佢咁樣講一講，令到我有少少呷醋，畢竟我對佢都有少少Feel，不過我唔敢表達我對佢有少少Feel，因為我好驚呢種感覺一瞬即逝。
================
仍不夠耐性 幸運還要等待