[中學][純愛]讀男校嘅我，到底係咪真係咁難識女仔？: 行街

「我拒絕咗佢，但係感覺自己做緊壞人。」

佢好認真咁同我講，同時對眼流露出一種無奈嘅感覺，我睇得出佢唔想做衰人，唔想傷害人，

「個社會係咁㗎啦，我喺學校都做唔少衰人啦。」

「係啦係啦，你最多經歷啦，埋單啦，你請呀啱啱講好咗。」

我笑一笑就去咗埋單，跟住就到咗今日嘅戲肉：行街。我一直沉思緊佢啱啱講嘅嘢，點解我個心會有少少唔係幾Gur，我又唔係佢邊個，而且我唔敢話真係好鍾意佢，畢竟我淨係識一個禮拜，呢種感覺係咩我都唔知，



「我哋去邊度呀而家？」

佢把聲叫醒咗沉思緊嘅我，

「吓？帶你行下東大街先啦，有排行啊！」

「諗咩諗到咁入神呀？」

佢碌大對眼，用一個期待嘅眼神望住我，但係我唔夠膽去表達自己嘅情感，唯有即場作個大話出嚟，



「無...無嘢，諗緊揀咩科好啫。」

佢嘅眼神一秒由期待轉到失望，我察覺到，但係我唔願意講出嚟，因為我驚，我驚我一講出我嘅諗法我哋之間嘅關係會好唔同，可能變好，可能變差，但係我真係唔敢冒呢個險。

「你真係咁想知？」

「咁我哋Frd嚟㗎嘛。」

佢再擰個頭埋嚟，用嗰個期待嘅眼神望住我，



「遲啲話你知啦！」

「咁我遲啲問嘅話你一定要答喎！」

「好呀！」

「咁我而家問喎。」

你條友仔，全心玩我啫，不過我講得出做得到，應承咗嘅嘢，就一定會答嘅，認真，佢個眼神根本令人無法抵擋，我望住住佢對眼，完全俾佢吸引住。｛呀！！唔好再用呢個眼神望住我啦！我受唔到啦！｝我哋白白對望咗三秒，

「Isabella，其實....」

突然有塊柔軟嘅咀唇貼咗落我塊面，佢錫我呀！佢錫我呀！我個心跳得好快，

「賢仔，我.......」



「咇咇咇咇，現時為朝早十時三十分」我小！點解係夢嚟㗎！俾我發多陣夢得唔得啫，不過好彩係夢境，如果發展得咁快我都會嚇親，算啦算啦，我都係快啲準備好，費事晏啲要人等。