[中學][純愛]讀男校嘅我，到底係咪真係咁難識女仔？: 意不冷

喺佢走咗之後，我有諗過IG Direct佢，正當我執緊檯嘅時候，有張其貌不揚嘅紙飛咗出嚟，我望一望，啲字跡跟本就唔係我啲字，上明寫住： 

「賢仔，好多謝你收留我，你真係好好人，我之前都無比男仔真正關心過，佢哋一嚟就係想同我拍拖，因為可以同啲frd曬命，你係為數不多嘅好男仔，如果我老竇冇反對嘅話，我真係好想淨係屬於你一個，其實我老竇唔係幾識表達情感，我細個成日都比佢趕出嚟，次次都係第二日先接返我。可不可以你也剛好喜歡我？Isabella」

Isabella鍾意我？我咁大個仔都無諗過，畢竟自己由細到大都係讀男校，同啲同輩女仔相處機會唔大，但係Isabella真係第一個令到我想用盡一切去保護嘅女仔，即使唔係情侶，我淨係想默默保護佢。 睇完呢張紙條，我決定IG Direct佢，因為我好想回答佢，我好想同佢講我嘅感受，同佢講我永遠係佢身邊。 就喺呢個時候，我收到個Whatsapp，

「Hi，係唔係賢仔呀？」

「係呀，你又係邊個？」



「我係Isabella呀，你晏啲得唔得閑呀？」

「得閒呀，12點等？」

「Okie」

 而家佢約我出嚟仲好，可以當面講。其實我自己比較被動，唔係好夠膽主動講出自己嘅情感，但係而家Isabella講咗先，我係咪好應該答佢呢？ 話咁快就到咗12點，我行出去見到佢著咗一條白色連身裙加件牛仔褸，一齊就好似返番去禮拜六，一切都無變，

「行啦傻仔，仲企喺度！」



成件事同禮拜六好似，不過佢變咗主動嗰個，仿佛佢老竇唔存在一樣，

「其實我哋依家去邊？」

「晏啲咪知囉，跟住我啦！」

就係咁我就跟住佢，我哋行咗去地鐵站，去到太古嘅時候佢落咗車，佢帶我行咗去戲院，嘢都無講過就入咗去House2，佢企咗喺門口度，我睇一睇個牌，「幻愛」12：20 「我哋入去啦！」 其實我真係好想同佢講，｛我睇到你張紙條呀，其實我都鍾意你呀！｝可惜一直都唔敢，同埋未有機會。 我哋行咗入去，坐喺最前排嘅情侶位，正當我想開口嘅時候，套戲開始咗。 其實《幻愛》係我一直都好想睇嘅作品，我亦都好好奇點解佢會帶我睇，點解佢知我想睇。 我哋睇完套戲之後，就去咗行下街，食下飯，就好似普通情侶一樣，

「點解你會帶我睇幻愛嘅？」



「我見到你喺IG度話想睇呀嘛，唔鍾意呀？」

「唔係，不過我想知你點過你老竇個關㗎？」

「唔話你知。」

今日嘅佢比起之前嘅佢更加活潑同熱情，個感覺好舒服，呢個世界冇嘢可以制止我哋喺埋一齊，但係如果我哋最終冇喺埋一齊，一定係自己唔夠膽。

「你有冇嘢想講呀？」

我好想而家講，但係咁突然又好似唔係幾好，

「有呀，不如我哋再行下先？我想帶你去一個地方。」

我帶咗佢去太古個邊嘅海皮，佢一面疑惑，完全唔明點解，我哋坐咗喺張長凳度，佢望住個海，



「其實我想講嘅係，....」

{加油呀賢仔，快啲開口啦，佢而家好期待呀！臨門一腳啦！}

「...Isabella，雖然識咗你唔算好耐，但係同你相處係最開心㗎，我哋之間無所不談，而且我睇到你留俾我嗰張紙，我想講嘅係，Isabella其實我都鍾意你呀！可唔可以做我女朋友呀！」

我講曬我嘅心底話之後感覺一身輕，但係佢點回應又係一個問題，

「衰人，你知唔知我等咗你呢句幾耐呀！我嗰晚一直喺到諗你幾時會開口，但係以你嘅性格我知你唔會夠膽去同我講。所以我就決定寫張紙條去俾暗示你。」

 聽到依一句我感覺自己好傻，要一個女仔去做主動，真係覺得自己好冇膽、好自卑，但係佢啱啱係唔係Say咗Yes。 成個世界靜曬，我好清楚咁聽到自己嘅心跳聲，我個口不自覺咁講咗句，

「咁你係唔係應承咗做我女朋友？」
=================


無奈你 無奈我 還是有點勇