[中學][純愛]讀男校嘅我，到底係咪真係咁難識女仔？: 保密及未來

{又要返學，可唔可以快啲放假呀！}每朝嘅清晨我都諗緊同一樣嘢，但係今日唔同，我終於可以以情侶關係同Isabella一齊出門口。

{出事，7點20分啦！}我一攞起部手機，就發現Isabella打咗過嚟，

「喂，傻瓜，起身啦。」

 佢把聲真係好溫柔，簡直係天籟之音，佢叫走咗我心中嘅睡魔，我即刻衝去洗漱，

「係呀，好快好快，你比五分鐘我。」



講完我就以閃電俠嘅速度，九秒九換好曬衫。

就喺呢個Moment有人撳鐘，我一打開門就見到Isabella好開心咁衝埋嚟我個懷抱度，

「早晨呀傻豬，我買咗早餐俾你呀。」

 你話天下間咁好嘅女仔去邊度搵呀，人又靚，心地又好，仲識關心人添。

我哋快快手就食完個早餐，跟住就一齊出門口，入到𨋢之後佢就突然之間問我，



「你想唔想比你啲同學知你拍緊拖？」

哇，佢無啦啦咁問都有嘅，一時三刻我真係唔知點答，但係一諗起學校班友一定會起哄所以，

「遲啲先啦，費時佢哋又起哄。」

「好呀。」

就係咁我哋就一齊行返學，我哋一路講一路笑，話咁快就到咗分叉路口，佢間學校就喺山上，我間學校就喺山腳，



「好啦，我返學啦，晏啲喺電車站等啦。」

「bye bye啦傻妹，晏啲見啦。」

{太急出門口，冇帶水返嚟添，去一去小食部買支水先}正當我行去排隊嘅時候Argon行咗埋嚟，

「喂！賢仔早呀，我以為你會直接返課室添。」

「我今日唔記得帶水呀嘛，所以咪嚟買咗先返去囉。」

「話時話你係唔係同緊我家姐拍拖呀？」

哇，你喺學校咁問，好想全世界都知咁喎，

「係...係呀，不過唔好同呀謙佢哋講住喎，我驚佢哋又起哄跟住全世界都知呀，幫我保守呢個秘密呀。」



「得啦，我明呀，兄弟嘅嘢在心中啦。」

Argon哥好彩有你明我咋，識到你真係好好彩。其實我好少講我同Argon嘅關係，因為佢做嘅嘢同呀謙做嘅嘢冇乜分別，都係打吓機，打吓波，不過佢派少啲膠咁囉，但係我真係好好奇佢到底有冇女朋友呢？不過佢對所有人都係咁細心，只要有少少變化佢都察覺到，唔講以為佢有超能力。 我哋兩個就一路傾一路行返課室。

點解今日又有中文連堂㗎！不過唔好睇我哋班係精英班，上堂基本上都係玩手機同埋瞓覺，但係我未有膽量去挑戰校規，所以我都係選擇後者。

「黃灝賢，你又瞓！」

就係我一僕低，鄭Sir又用佢個把帶有催眠屬性嘅聲線大嗌咗句，我即刻抬返起個頭，

「呀Sir我未瞓㗎！」

「黃同學，你每次一伏低就瞓，點唔叫你呀！」



咁佢又無錯嘅，我由中二開始每堂中文堂都瞓。

就喺我同周公大戰完三百回合後，話咁快就放學。 

「喂！呀賢，你晏啲打唔打波呀？」

「唔啦，有嘢做，遲啲先！」 

講完我就一支箭衝咗出校乜，當我行到電車站嘅時候，Isabella已經喺到等緊我， 

「傻妹，等咗我好耐呀？」 

「唔係呀，我都係啱啱先到，有車啦喎。」 

我哋一上到架電車就走咗去上面嗰層，佢坐咗喺個窗口位，而我就梗係坐佢隔離啦， 



「不如我哋聽歌囉。」 

我連答嘅機會都無佢就攞咗個耳機出嚟，塞咗落我隻耳仔度，跟住佢就播咗首《不許你注定一人》。

當其時嘅我甚少聽廣東歌，主要都係聽啲咩Ed Sheeran咁囉，佢係第一個令到我聽廣東歌嘅人。 

就係咁我哋一路聽住Dear Jane嘅歌坐到去太古，佢繞住我隻手一齊行入去書局，佢攞起咗本《幻愛》望兩望，就行咗去比錢， 

「我哋唔係睇咗套戲呢咩？做咩買書嘅？」 

我又諗返起幾日前， 

「書有多啲細節呀嘛，我又唔係你，咁鬼懶。」



 佢又冇錯嘅，睇書呢啲活動係用嚟喺學校解悶，不過我已經放棄咗，因為太懶同埋瞓覺仲有意義。 

「睇書呢啲活動都係唔啱我。」 

佢笑一笑咁搖頭，跟住就帶咗我去無印，佢睇一睇啲簿，又問吓我咩Size嘅簿我鍾意， 

「你要買簿呀？」 

「係呀，不過唔係比我，係比你」 

我呆咗，因為由小學到而家我啲所謂嘅筆記都只係用嚟畫畫，毫無實質作用， 

「做咩買比我嘅？我啲筆記簿係用嚟畫畫㗎咋。」 

「應承我呀，比心機讀書呀，唔係嘅話第時我哋點算呀，我唔想一世捱麵包呀。」 

佢鼓起泡腮，叉住條腰咁望住我講，我攬一攬佢，我哋對視咗五秒， 

「得啦傻妹，我應承你我以後都會抄筆記同埋專心上堂。」 

我都唔知點解我會咁講，其實我係連寫字都覺得煩嘅人，但係為咗佢，我改晒自己啲習慣又如何。 
================
願我可花足一生和你甜蜜