[中學][純愛]讀男校嘅我，到底係咪真係咁難識女仔？: 考試

「嗱，攞住，應承我唔好再hea啦，唔係嘅話我好瘀㗎嘛。」

如是者我就攞住佢俾我嘅筆記簿，我返咗屋企，攤咗喺張床度，佢連簿都買埋比我，無理由呃佢㗎嘛。

當然改變唔易，但係如果為咗鍾意嘅人而去改，多少都會有返啲動力嘅，所以我決定為咗Isabella日日上堂勁專心又抄筆記。

話咁快已經去到學期大考，啫係又無波打又無機打連飛機都無時間打，不停咁讀書讀書同讀書。真係可悲。

「唉，又無得打機啦小！」



阿謙一返到嚟就喺度呻，

「都無計架…今次學期大考嚟架。唔係咁易架葉師傅」

我無奈咁搖一搖頭道，

「係喎Argon，你今次大考諗住點算。你今年先轉過嚟，無經歷過我哋嘅大考係幾咁恐怖！」

我講完就嚇一嚇佢，佢亦都彈一彈開，



「有幾恐怖呀，咪又係考教過嗰啲。」

「少年你太年輕了，只要一望住份卷三秒你就會懷疑人生，因為你會發覺啲嘢好似冇教過咁。」

佢擺出一副樹熊咬樹葉嘅樣，唔敢相信呢，年年出卷個啲老師都古靈精怪， 

「喂！唔好嚇佢啦！雖然都真係幾難，總平均分上唔到86。」 

熟悉嘅聲音，係佢啦，歐冠文！



人稱學霸冠軍嘅歐生，係試場嘅怪物，乜科都難佢唔到，除左體育。 

「係喎！你搵冠軍惡補咪得囉！」

「咁好啦，大不了辛苦啲啫！」 

就係咁，Argon就報讀咗冠軍嘅「私人補習」，日以繼夜，夜以繼日咁讀書同讀書。 

而我就報讀咗最適合我自己嘅補習班，屬於我同Isabella嘅二人世界，因為佢要考嘅野同我差唔多，所以我哋就一齊溫書。 

「Geog點讀呀？睇到啲英文到頭暈，又乜嘢renewable又乜嘢fossil fuels，好難呀！」 

我望住本Geog書三分鐘嘅結論。 

「你到底上堂嘅時候做緊乜㗎，呢啲好簡單㗎咋！」 



Isabella好唔耐煩咁講， 

「掛住你囉，無時無刻都掛緊。」

我挨埋去佢到， 

「唓，口甜舌滑，同埋唔好挨咁埋啦，你好重呀！」 

佢一路笑一路推開我。

就係咁我哋打打鬧鬧咁喺圖書館個自修室度過咗一整日，走嘅時候已經七點， 

「食咩呀，食咩呀？橫掂聽日放假，唔洗咁早返去。」 



「你話事啦，你係我女朋友嚟㗎嘛！」 

「咁不如我哋去打邊爐囉！」 

「好呀好呀！」 

如是者，我哋就手拖手行咗去利舞臺。 

話咁快就食完個晚飯，我哋行咗一陣銅鑼灣。

我哋行吓行吓，唔驚唔覺對手已經充滿住一袋又一袋嘅戰利品， 

「哎呀，又破費啦，又窮咗啦！」 

「傻啦，你仲有我呀嘛，我養你呀！」 



「你？你搞掂自己啲成績先啦，仲話養我喎，自己都未搞掂。」 

「咁我養唔到你，你就搵過第二個囉。」 

「唔會囉，最多一齊捱嘅啫，要不然我養你咯！」 

我望住眼前呢位絕世大美人，再望吓身邊啲港女，呢種感覺，冇得彈！ 
============================
還喜歡我，我這種無賴，是話你蠢還是很偉大。