【純愛】想要成為你的一半: 第二十三章

朦朧間我隱約看到一隻手伸過來，我下意識遞手，讓那個人拉起我。 

 

「無事啊嘛，你面色唔係幾好喎。」女孩把臉哄過來。 

「無咩，你係…」 

「下，你唔認得我呀，我係呀文個妹小柔，我地之前見過㗎喇。」她對我笑了笑。 



這時我才回過神，看着眼前這張臉，談不上熟悉，也談不上陌生，好像不知在那裏見過。 

「做…做咩…眼甘甘望住人…」小柔面頰忽爾變得泛紅。 

她算不上甚麼國色天香，相貌平平，還矮我大半個頭，不過她的笑容有種不能抗拒的魔力，很有親切感，很溫暖。 

「無，望真啲，你同呀文又幾似樣。」 

「哈哈，兩兄妹點會唔似，係呢你頭先係場上真係幾型，射波又靚又準。」 



「你咪玩我啦，好彩㗎喳，上半場射極都唔入，你呀哥勁我好多啦！」 

「算吧啦佢，淨係識屈速，點都係你勁啲！」 

「講呢啲！」我耍手擰頭。 

「你肚唔肚餓啊，一齊食啦不如。」小柔興奮地捉住我的手臂。 

「一齊…」 



「你諗左去邊，我地成班人一齊食啊！」 

「哦，原來係咁。」 

「死！我唔記得有野要做添！」我現在才醒覺自己忘記了一件很重要的事。 

 

我環顧場館也找不到Chloe，到底她去了哪裏。 

「Sorry，我要走先，下次再食過。」我說完便9秒9跑出去。 

 

原來Chloe站在場館門口，她一看到我就轉身急步走，我立刻追上去。 



「韓小姐，等埋我啊。」 

「你過黎做咩，唔使陪人地啊陳生！」Chloe西口西面。 

「佢係我隊友個妹，我同佢無野架，冤枉啊！」 

「無野又掂手又笑得咁開心？」 

「你呷醋呀？」 

「邊有呀！關我咩事喎！」 

「咁佢伸手無理由唔俾佢拉吖嘛，出於禮貌啫。」 



「真係嘅？」 

「梗係啦，我心入面剩係得你一個喳。」 

「又口花花。」 

「下次我唔會理佢㗎喇，靚女唔好嬲啦。」我搣了一下她的臉。 

「今次算你啦。」 

「咁係咪做唔到都算啊？」 

「睇你有無誠意囉。」 

「跟我黎啦！」我拖着Chloe的手跑往遠方。 



「喂，去邊啊？」 

「一陣你就知。」