【純愛】想要成為你的一半: 第二十七章

比賽經已步入白熱化階段，淘汰賽接下來就要展開，我們都不敢鬆懈，努力備戰。 

 

「兄弟，聽講下場對手好撚勁，有個叫咩清水灣道KD，成米9高，打乜位都mismatch，場場20＋，大檸樂啦。」呀添跟我們說。 

「好似話係今次籃兒當自強邀請賽Top 3選手，仲有幾個球探黎睇佢打波。」輝仔找到一份報道。 

「咁我地下場點打？」呀添問道。 



「理撚得佢啫，打返我地家波得啦。」Lue Sir神不知鬼不覺地走過來。 

「呀Sir有無咩要我地練？」我問Lue Sir。 

「唔使，其實知唔知點解我好少要你地練基本功同啲技巧野？」 

我們全部人搖頭。 

「我就係唔想你地練死呢啲招，打波係要變化，唔好俾招式規範左打法，老實講打開波都識呢啲技巧，但係有幾多人可以做到融會貫通，有陣時你自己摸下摸下又可能創到新招，好似Olajuwon將踢波嘅技巧用落籃球，咁就俾佢整到個夢幻步。招式唔一定要跟人，可以自己創造出黎，個個都一樣咁打，又有咩意思？好似呀肥仔望落亂咁黎但又俾佢打到，所以我放手由你地自己打，明唔明？」 



 

枉我以前一直質疑他的執教功力，平常都在場邊玩電話、看股票，甚至在比賽時叫暫停問我們點甚麼外賣，直至現在才明白Lue Sir的用心良苦，思維更勝一眾NBA的名教練。 

 

練了一會，我彎着身軀在場邊稍作歇息。突然間有一隻纖細的手把水遞到我面前，我滿心歡喜地抬頭一看，怎料看見的竟是她。 

「你…做咩係…係度嘅？」我先是愣住，然後接過瓶子。 



「點解我唔可以係度？」小柔皺皺眉。 

「無話唔得，不過未係比賽喎。」 

「咁我想睇你地練波，順便有啲野要俾返你吖嘛。」她從背包裏拿出一件襯衣。 

「唔使咁急俾返我，又唔係咩緊要野。」 

「要嘅要嘅，同埋上次好多謝你煮粥俾我，陪我睇戲，又幫我冚返件衫。」 

「唔使客…」話口未完，我感覺到面上有東西貼了過來。 

 

小柔踮腳，輕輕吻了我的臉頰，然後含羞答答地低着頭。 



「你…」我目瞪口呆，聲線也有點顫抖。 

「好衰㗎，唔係要人講出口呀嘛！」 

 

有個人把這一切看進眼內。