【純愛】想要成為你的一半: 第二十八章

怎麼Chloe也在這裏，我是不是眼花了？

不，我揉揉眼，眼前的景象沒有絲毫變化，依然是她，但又仿佛不是她。

這刻的Chloe看來很陌生，從未見過她那空洞的眼神和落魄的神情，靈魂像是被攝去一樣，只剩餘黯淡無光的軀殼。 

 

Chloe先是凝望住我，雙手微微顫抖着，然後頭也不回的跑掉。 



 

「喂，你做咩唔講野啊？」小柔在我面前揚揚手。 

我佂一征，沒有回應她。 

「我係咪嚇親你，你面都青埋。」 

「唔…唔…係…」 



「你唔使咁快答我，我俾啲時間你諗吓。」她嫣然一笑，用手指封住我的嘴唇。 

我還是沒有反應。 

「我等你呀。」她在我耳邊輕聲細語，接着便離開了。 

 

我久久未回過神來，呆站在原地，直至呀文走過來搭着我的肩膀。 



「醒未啊，拿拿臨追返條女啦，我呀妹嗰度我會搞掂㗎喇。」 

「你信我無…咩…？」 

「你有病呀，咁你都哽得落。」 

「我對佢無野㗎。」 

「知啦知啦，行啦！」呀文推着我走。 

Lue Sir也示意我可以先走。 

 

我跑出街上，四處張望，也看不見Chloe的蹤影，只好到處碰碰，最後在附近的公園找到她，看到她抱頭痛哭的樣子真讓我很心痛。 



「Chloe，唔係你諗咁樣。」我慢慢走上前。 

「你走呀，我唔聽呀，我唔聽呀！」Chloe掩着面嚎叫。 

「真係無野㗎我地，我對佢無意思㗎，佢要咁做我都控制唔到。」 

「咁點解…佢會錫你，你地咩關係啊！」 

「無啊無啊，我都唔知點解佢會鍾意我㗎。」 

「你肯定做左啲野，唔係佢又點會鍾意你啊，你到底…有無愛過我㗎？」 

「我梗係愛你啦，我都估唔到會搞成咁，我…」我捉住Chloe的手。 



「你講呀！你做咩搞到漏左件衫係佢度！」Chloe一把鬆開我的手。 

「上次佢病左，呀文叫我上去睇住佢。」 

「做乜你唔同我講呀？係咪做左虧心事呀？」Chloe的語氣越來越重。 

「我諗住好小事啫，點知佢會…」 

「你地係咪搞嗰味野呀？」 

「無啊，我剩係攞野俾佢食同陪左佢一陣，之後見佢瞓着咪幫佢冚件衫。」 

「係咁多？」 

「係呀，你信我吖。」我輕輕擁着她。 



「剩係得你講，我點知係咪真㗎。」她推開了我。 

「我剩係鍾意你一個㗎咋，從來都係，我下次會同佢講清楚。」 

Chloe沒回應我。 

「咁你係咪唔嬲啦？」 

「仲好嬲喎，你瞞住我咁多野！」Chloe加快腳步走。 

「BB，我以後唔會㗎喇，原諒我啦！」 

「唔！得！」 



Chloe登上巴士，我打算跟上去。 

「唔好跟住黎，以後唔睬你㗎。」 

我只好止步，目送她離開。 

 

到底我該做些甚麼才能得到她的原諒呢？