【純愛】想要成為你的一半: 第三十八章
可能是敷冰的緣故,腳踝的痛楚沒當時那麼強烈,但走路還是要一拐一拐。
「BB,你仲好痛吖?」Chloe看到後,馬上衝過來扶着我。
「少少啦,好左好多㗎喇,你唔使咁緊張喎。」
「咩唔緊張,你行到咁樣,我驚你傷到入面,不如去睇鐵打咯?」
「我真係無事,我自己feel到嘅,不過…」
「不過咩?」Chloe神色凝重地說。
「你孭我應該會好啲。」
「玩野咩,我點孭到你呀!」
「唔孭,咁就抱抱啦!」我一下子撲向她懷裏。
「喂呀,好多人望住㗎,一陣先攬啦。」
「唔制。」我扁扁嘴。
「做乜成個細路咁,乖啦乖啦。」Chloe輕撫我的頭。
「我地食咩,好肚餓呀!」
「問我,你無諗好咩?」
「緊係有啦,唔知你想食日本野,鋸扒定放題?」
「放題吖。」
「你真係好肚餓,食左十幾碟喇喎。」
「今日真係用左好多精力吖嘛。」
「夠喇,唔好食咁多生蠔。」Chloe忽然按住我的手。
「吓。」
「食咁多生冷野隻腳難啲好㗎。」
「邊個話㗎,無事嘅。」我打算繼續食。
「唔准!」Chloe的眼神很堅定。
「遵命。」我只好放棄吃生蠔。
「聽話就乖喇。」
Chloe不知是不是有意,有幾次用她的白滑美腿掃過我的小腿。
「啊!」不讓我吃生蠔,就作弄一下她吧。
「做咩呀?」Chloe嚇了一跳。
「你踢到我,啊…隻腳好痛呀。」
「Sorry,我無心㗎。」
「死啦,好似仲痛過係球場嗰陣。」
「點會㗎,最衰都係我啦。」
「你過黎幫我睇下。」
「咁樣我就唔痛喇。」我趁Chloe蹲下親吻她的額頭。
「衰人!你呃我!」
「都唔算,咁我真係仲痛吖嘛。」
「唔睬你呀。」
「玩下啫,對唔住啊。」
「好過份囉,搞到我咁擔心。」Chloe氣得鼓起泡腮。
「唔好嬲啦,欸,你唔好郁。」
「又想點?」
「喂呀!」我把一小片蛋糕點在她鼻上。
「作死呀你!」她馬上還擊,拿起一大塊蛋糕弄到我面上。
「女俠,饒命呀!」我舉高雙手投降。
「你都有今日。」Chloe繼續加強攻勢。
「我知錯啦,咁樣你唔嬲咯可?」
「嘻嘻…今次就咁算,哈哈…你個樣真係好好笑。」
我對着手機照照,才驚覺滿臉都是cream,出手也用不着這樣狠毒。
「頂,真係立即變白,你使唔使咁重手啊!」
「你自己攞黎衰咋,唔怪得人。」
「差啲唔記得添,拍低post上IG先。」Chloe拍完照,馬上跑走。
「咪走呀你,俾我捉到實食左你!」
「你捉到先算啦。」她伸伸舌頭。