【純愛】想要成為你的一半: 第三十九章
不經不覺間,我和Chloe一起了已經有五個月的時間,雖然偶有爭執,不過也沒怎影響我們之間的感情。
尚記得我們放榜的成績不俗,彼此都成功選取心儀的學科,我進了Polyu BBA,Chloe就進了CU Art,大學生活佔據我們不少的時間,但我們約定好每星期最少見兩次面,不管再忙也好。
其實我對大學生活不太感興趣,玩了個O Camp就作罷,算是認識了幾個同學系的人,關係算不上熟稔,大多數都只是談論學術而已。
大多數空閒的時間,我還是跟呀文和Save一起度過,以及打磨球技,繼續打一些業餘比賽。
相反Chloe就比我活躍多了,上莊,住hall,part time,大學五件事完全做足,認識了很多人,更獲得女神的稱號。
以她這樣外向的性格和出眾的外型,成為風頭躉完全不足為奇,據知追求者也不少,但都被Chloe一一拒絕。
「BB,你入到U都唔玩下,你唔覺得好嘥咩?」有一次Chloe問我。
「呢啲野唔係太啱我,有你地就夠喇。」
「咩你地呀!你唔係得我咋咩,你講,係咪仲有第二個?」Chloe搣了一下我的手臂。
「唔係呀,我係講呀文佢地,我又點會做啲對唔住你嘅事喎。」
「同你講下笑咋,睇下你嚇到面都青埋。」
「我邊度識到其他女仔,反而係你,聽講好多仔溝你,開心死啦。」
「我都無理佢地,講左我有男朋友,你呷醋啊?」
「好正常啫,見到有人追你點都有啲唔開心。」
「放心啦,你要對我有信心。」
「我信得過你,係呢,過幾日得唔得閒黎睇我打波?」
「應該唔得喇,有兩份paper要交,下次吖。」
「咁好啦。」
「你會唔會覺得我太自私,拍拖咁耐都無為你做過乜野,我係咪一個唔合格嘅女朋友?」
「你點會咁諗㗎,愛情從來都唔計較邊個付出多啲,知道我地都愛大家就得,係我心目中你係最好最好嘅女朋友,以後唔準講埋啲咁嘅野呀。」我緊緊擁着Chloe,在她耳邊低語。
「多謝你。」她把頭靠在我的肩膀。
「傻瓜。」我輕撫她的秀髮。