【純愛】想要成為你的一半: 第四十七章

「呢幾日我諗得好清楚，我對你已經無左以前嗰種感覺，我嗰日唔應該咁同你講，對唔住呀。」

「唔洗對唔住啵，我都知你係突然間見返我，先可能會有咁嘅錯覺啫，你無錯呀，唔需要自責。」

「同埋我都放低左啦，好多嘢錯過左就係錯過左㗎啦，或者嗰時我地都有踏前一步嘅話，可能…」Rachel開始有點哽咽，然後別過臉去。

「可能呢個先係對我地最好嘅結局呢，就算當時我地一齊左，我地都未必忍受到long d，遲早都會分開，可能搞到關係仲差，算啦唔講啦，都過左去啦，你唔洗咁在意喎。」

「我…無事，只…係一諗起…心入面…就好似有個…遺憾，好可惜咁，有時我會諗如果時光倒流返去，我留低係度，就算我地無拍到拖，繼續青梅竹馬咁相處都好吖。」



「但係我地無可能成世都做到青梅竹馬，可能有一日你或者我唔想再等對方，之後會同其他人一齊，我地就係怕，怕行前左一步，就會做唔返朋友，明明大家都feel到對方係有意思…」

「你講得無錯，我地無可能一直都係咁，人始終會長大，大左好多野嘅睇法又會唔同左，想要嘅愛情同細個可能會唔一樣，人會現實左，唔會再想為呢段關係無止境等落去，之後我同你有左另一半嘅話，根本無可能好似以前咁樣相處。」

「起碼我地都放低左，仲做到朋友，咁都唔錯吖。」

「見到你地咁幸福，我都好戥你地開心。」

「你都得㗎，你條件咁好，實大把仔溝你啦。」我取笑一下她。



「咦~唔好笑我啦，邊有咁誇張啫，我又唔係咩女神，不過真係好多謝你，同你講完個心舒服左好多。」

「我都係呀，同你講完成個人鬆晒，唔洗再煩lu…係喎，你今次係咪唔會再走啦？」

「唔係呀，sem break完左之後又要返去嗰邊，放假都會盡量返嚟，遲啲grad左就唔知啦，可能我會自己搬返嚟，到時就會成日煩住你㗎啦，hehe~」

「唔好啦掛，細個未比你煩夠咩，唔好搞我啦，快啲走，以後唔好再返嚟呀。」

「咁絕情㗎你，話晒都咁多年朋友，你咁樣對我，好傷心囉。」



「講下啫，我唔會咁衰嘅，你以前咁照顧我，我照顧返你又點話啫。」

「講呢啲，俾你搞到有啲感動添。」


我們繼續說說笑笑，時候也不早，於是我便送Rachel回去酒店。


「遲啲你會送我機個可？」她在酒店門口停下腳步。

「會呀，順便見下世伯伯母，咁遲啲見啦。」我打算離去。

「阿風，唔好走住，我仲有啲野想做。」

「嗯？」




她突然跑過來攬住我，我完全反應不過來。

「做咩呀傻女？」

「你就俾我攬一陣啦，一陣就夠啦。」

「你就唔洗講啦，想攬幾耐都得。」我也輕撫她的背部以示回應。