【全劇終】《我喺街執咗個失憶嘅女仔返屋企》: 相遇篇：垃圾房的女孩（上）

中五開學前一晚，個天掛緊八號風球。

當全世界學生都喺度趕緊暑期功課嘅時候，我喺度執屋。

點解要執屋？

俾人迫囉。

「你睇吓你啲野亂到吖，點解可以整到間房咁亂？」阿妹抽起我放喺床上面嘅衫褲，一野同我掉晒出房門口。





「得得得，我自己執。」我將地上面嘅衫放返上梳化，然後繼續整理書櫃入面嘅雜物。

「你話冇人睇住你點得吖？」

有時候，我覺得呢個冇血緣關係嘅阿妹似我家姐多啲。

「你執好未呀？」十秒都冇佢又催。

「執好喇。」我將書櫃入面嘅廢紙全部掉落垃圾袋，「我去掉垃圾。」





出咗屋企門口之後，終於靜晒。

我望望電梯大堂個窗，出面竟然停咗雨，反正返到去都係聽阿妹喺度煩，不如直接將袋垃圾掉去街口垃圾站，順便當散步。

於是喺冇雨嘅八號風球之下，我帶住一袋垃圾喺街上面行。

街上寧靜得有啲可怕，我將袋垃圾用力飛入垃圾房，心諗千祈唔好喺我返去嗰陣落雨。

轉身走嘅時候，天上突然劃過一道閃電，身後嘅垃圾房隨即傳出一吓爆炸響聲，我下意識擰轉頭一睇，最埋面個垃圾桶後面好似有個人影喺度郁緊。





唔通係老鼠？

正諗住拿拿聲走嗰陣，裡面隱約傳嚟一把……女仔聲？

「痛…邊個咁大力掉垃圾呀…」

與此同時，一個柔弱嘅女生身影喺垃圾桶後面慢慢爬出嚟。

我嚇一跳：「嘩屌！有人嘅？」

佢慢慢企起身，呢個時候我先睇清楚佢個樣——就係一個正正常常嘅女生，唯一特別嘅地方就係唔知我眼花定係乜野，佢對眼好似戴咗有色隱形眼鏡，係紫色嘅。

可能係頭先嗰吓爆炸（除咗行雷劈中垃圾房之外我諗唔到其他解釋），佢手腳好似有幾個傷口，不過唔深。

「sorry，頭先唔小心掟中你……」





佢抬頭望咗我一眼，咩都冇答。

「你冇嘢吖嘛？」我再問。

我行前兩步，驚見佢眼角流住一行眼淚。

「…要唔要紙巾？」我求其喺褲袋摷咗包紙巾，諗住遞俾佢嗰陣，突然「磅」一聲——

喺個女仔暈低之前，我及時抱住咗佢。

「喂！喂！」我拍一拍佢。

「…肚…餓。」佢勉強吐出兩個字，睇嚟仲有意識，只係唔知咩原因冇食野。