【全劇終】《我喺街執咗個失憶嘅女仔返屋企》: 相遇篇：垃圾房的女孩（下）

一路跑返屋企，唔知點解硬係凝住後面有人跟住我。
 
八號風球應該冇咩人會仲喺條街度，所以我嘅理智＋直覺同我講得一個可能性。
 
唔係掛……
 
我心入面數123，然後擰轉頭講：「你跟住我做咩呀？」
 
果然，係頭先個女仔——佢擔住我喺便利店買嗰把遮，粒聲唔出望住我。
 




「…你會病架。」過咗一陣，佢講。
 
「吓？」
 
佢踏前兩步，用嗰把唔係好夠大嘅遮遮埋我。
 
我下意識退後一步，雖然單講外貌，佢係我喜好嗰類，但相信喺呢個情況下，冇咩人會得閒諗呢啲嘢。
 
佢臉上好似閃過一下子失望，然後微微張開嘴，但喺佢準備講啲咩之前，佢個肚已經先一步叫咗出嚟。
 




我諗，佢應該係因為肚餓至會跟住我（？）
 
「你係咪肚餓呀？一係我同你去買啲嘢食嘞？」
 
抱住做爛好人做到底嘅心態，我一手接過佢手上嘅遮，然後帶咗佢入便利店。
 
我用身上僅餘嘅錢買咗個大杯麵俾個女仔：「食個杯麵頂住檔先啦。」
 
佢接過之後，喺手上研究咗一陣，然後撕開面頭塊紙，成套動作話俾我聽佢準備就咁樣食個麵餅。
 




「喂喂喂，加啲滾水先啦！」我梗係阻止咗佢。
 
奇怪嘅女仔——我一路沖杯麵一路思考各種可能性，得出嘅結論係（同頭先一樣）：早走早著。
 
我再度尷尬地揮手：「咁你慢慢食喇，啲錢唔使還返俾我架喇。」
 
點知準備走嗰陣，佢一手捉住我衫尾，請咗一句超展開嘅對白：
 
「你可唔可以話俾我聽，我係邊個？」 
 
「…吓？」我有預感，如果再同佢糾纏落去，我應該會有排煩。
 
「…或者你可以去問吓令堂。」掉低呢句之後我極速離開便利店。
 
跑到返樓下，個女仔終於冇再跟嚟，我鬆一口大氣。




 
「靚仔，做咩跑到索晒氣呀？」門口看更陳伯問。
 
我抖順條氣，為免個女仔真係癲到跟埋嚟，我都係講定先：「如果陣間有個唔識嘅女仔話嚟搵我，你記得唔好理佢。」
 
佢一副胸有成竹嘅樣：「咁你放心都得嘞，唔識嘅人撳鐘我會問清楚佢嚟做咩先嘅。」
 
「唔該…」呢個時候，阿妹打俾我，我行埋一邊聽：「喂？」
 
「你去咗邊度呀？又話去掉垃圾！」
 
我將電話稍微拉遠耳邊：「你冷靜啲先…我頭先出咗去買嘢，而家喺樓下。」
 
「咁你都要同我講聲架？等我行出去又唔見你！」
 




「得喇得喇，我而家返嚟喇，你又話要練開學禮講稿？快啲去練啦…」我尾音都未講完，阿妹就cut咗線。
 
唉。
 
返過去等lift嗰陣，膊頭突然俾人篤咗兩吓。
 
我抱住一絲不祥預感，慢慢擰轉頭——
 
係頭先個女仔。
 
「我屌，又係你…」我深呼吸兩下，然後走返去看更度同佢對質：「陳伯，我咪叫你唔好亂咁開門俾啲陌生人囉。」
 
「……我幾時有阿？」
 
「幾時有？嗰個咩人嚟？」




 
「……嗰度？嗰…嗰度有人咩？」陳伯瞇起雙眼問。
 
個女仔行埋嚟：「冇用架。」
 
「我係問，我隔離呢個人點解入到嚟？」我再問陳伯。
 
「佢見唔到我架。」
 
陳伯一面迷惘，俾咗一個我絕對唔想聽到嘅答案我：「你隔離？你隔離邊度有人？你唔好嚇我阿。」
 
我個心慌咗吓，用盡所有肢體動作向陳伯示意個女仔企緊嗰個位：「佢喎？你睇吓？成個企咗喺度喎？」
 
點知陳伯喺座頭拎咗個十字架出嚟，對住空氣喺咁舞：「我們在天上的父，願你都尊你的名為聖…我打工架咋！唔好搞我呀！」
 




個女仔望住陳伯笑咗一笑，然後喺我耳仔邊講：「都話冇用架啦。」
 
「…鬼。」失去意識之前，我只能吐出呢一個字。