返咗屋企沖咗個涼,換咗件衫之後,我衝咗去張廷宇所講嘅K房。
 
除咗張廷宇同珀奈之外,仲有幾個同學都有嚟,我唔多作介紹,反正平日同佢地都係零交流。
 
況且我好日都唔唱一次K,今次嚟只係為咗珀奈。
 
張廷宇一見到我,就望望隻錶話:「遲咗一分鐘,多謝飯爺一陣埋單。」
 
我想叫佢收皮嗰陣先醒起珀奈在場,所以我唔可以咁粗俗!
 




「大家玩得開心嘅我埋單又點話?」我懶係闊佬咁講。
 
「多謝阿飯!」其他人一同歡呼。
 
「聽講你尋晚入咗醫院?」相隔一個暑假,珀奈同我講嘅第一句野!
 
佢把聲聽起嚟依然係咁吸引,我即刻回應:「冇,身體檢查啫…」始終話自己血糖低/嚇到暈低,實在太冇霸氣。
 
「哦,冇事咪好囉,快啲點歌啦。」佢遞咗個電話俾我,我接嗰陣借啲意掂到佢隻手。
 




本來想睇佢怕醜個樣,但礙於房入面太黑,珀奈好似冇咩反應。
 
我求其點咗啲歌嚟唱,唱咗幾首就坐埋一邊聽歌。
 
珀奈就坐喺我隔離食緊花生。
 
我猶疑緊好唔好趁呢個機會去問吓佢ig嗰張相點解。
 
諗咗兩秒,我決定開個話題先:「張廷宇真係識揀地方,又俾佢book到間咁大嘅房。」 
 




「唔止呀,佢用會員卡埋單有9折優惠,你個銀包可以冇咁傷~」
 
「哈哈…差啲唔記得問你地頭先搭咩車嚟添。」我盤算緊點樣將話題兜去巴士。
 
珀奈神神秘秘咁講:「殊,唔好同人講呀,頭先係張廷宇渣佢阿哥部車載我地嚟,我仲偷偷地post咗上ig。」我一面驚訝,張廷宇個死仔暑假嗰陣話自己考到車牌,我仲以為佢吹水,估唔到係真嘅。不過呢啲都唔重要,重要嘅係,珀奈主動提起ig!
 
我馬上拎部電話出嚟:「係?即刻俾like先。」然後喺ig嘅搜尋記錄一撳就搵到珀奈。
 
佢喺隔離望住我個電話mon:「乜原來你有search過我ig架?」
 
差啲唔記得我一直冇follow佢,今舖真係柒到癲,我唯有打圓場:「…有一次無意中search到。」
 
講完之後我都覺得on9。
 
「不如你follow我吖?我爭一個就夠2000followers。」佢帶點懇求咁講。




 
「可以呀!」講完之後我即刻撳follow ,再show俾佢睇。
 
「ありがとう。」佢對我笑一笑。
 
我用僅有嘅日文程度聽得出呢句係多謝咁解,即刻回返句英文:「You're welcome. 」
 
呢個時候旁邊傳嚟張廷宇唱告白氣球嘅歌聲:
 
「親愛的~愛上你~從那天起~甜蜜的很輕易~」
 
雖然走晒音,不過真係啱晒而家我同珀奈嘅氣氛。
 
已有 0 人追稿