【全劇終】《我喺街執咗個失憶嘅女仔返屋企》: 再遇

俾張廷宇嘅歌聲折磨近5個鐘頭之後，我出咗房去廁所。
 
我一路行一路諗，點樣可以同珀奈關係更進一步，話晒佢喺ig咁樣暗示法，我點都應該做返啲野，成功嘅話唔定畢業前可以一嚐出pool嘅滋味…
 
入到廁所準備拉開條褲鏈嗰陣，眼角突然出現一道身影。
 
我轉身一望，發現小悠竟然坐咗喺地下。
 
「嘩屌！你嚇死我咩？」我慘叫一聲，即刻著返好條褲，「呢度男廁嚟架！」
 




佢捽一捽眼，好似啱啱訓醒咁：「男廁？」 
 
佢望咗周圍兩眼，雙頰逐漸通紅：「對唔住呀！」講完即刻跑咗出去。
 
我出咗廁所之後捉住佢問：「你點解喺度架？我叫你等我架嘛！」
 
「我有聽話架！頭先我食食吓野，突然間覺得全身冇力，一醒返就見到你…」
 
「又係咁？」
 




「對唔住呀！」佢再次道歉。
 
呢個時候，我最唔想佢出現嘅人出現咗，張廷宇一見到我同小悠，即刻走過嚟八掛：「唔怪得去廁所去咁耐啦，原來收埋咗條女！」
 
「喂，唔係呀！」
 
「返去同佢地講先！」張廷宇成個八婆咁跑返入K房，我即刻跟上去。
 
一開門佢就大大聲講：「喂大家快啲嚟睇啦！原來阿飯帶埋條女嚟呀！」
 




「你可唔可以聽吓人講野…」可惜我嘅否認完全係徒勞，佢地見到小悠之後，仲請埋佢一齊玩。
 
「我地係阿飯班fd呀，你係佢女朋友呀？真係估唔到呀！你唱唔唱歌呀？」班人你一句我一句，小悠好似想解釋都答唔到嘴。
 
今次真係大檸樂，好衰唔衰珀奈喺度，雖然佢個樣好似冇乜野，但我唔知佢諗緊咩。
 
睇而家嘅形勢，唯有散band之後私底下再同佢解釋。
 
我一邊嘆息點解咁老套嘅劇情會發生喺我身上，一邊望向拎住支咪唱歌嘅小悠。