【全劇終】《我喺街執咗個失憶嘅女仔返屋企》: 入學手續

我趁今日星期六，就帶小悠去學校搞入學手續。
 
行到門口，我突然醒起一樣嘢：「等等先，你都冇身分證，點搞入學呀？」
 
點知小悠一臉輕鬆咁講：「包喺我身上！阿帆你喺門口等我啦。」
 
莫非，佢準備運用啲咩法寶變張身分證出嚟？定係諗住用超能力洗校長腦…
 
如果係真嘅話，咁今次真係發達喇…屋企多隻多啦a夢，我以後嘅人生應該會一帆風順。
 




半個鐘之後，小悠喺學校出返嚟，手持一張學生證：「搞掂！阿帆你睇吓！」
 
我望向佢手上嘅學生證——無花無假，同我嗰張係一模一樣，分別就在於個名同張相唔同。
 
「…高小悠？」我讀出小悠學生證上面嘅全名。
 
「係！」
 
「原來你姓高架？我唔知嘅？」
 




佢解釋：「頭先學校啲人問我姓咩，咁我嗰陣淨係諗到阿帆你個名，咪話自己姓高囉。」
 
我第一次見識到，原來改名都可以咁求其。
 
「你諗清楚架嗱？冇得後悔架喇喎？」
 
「嗯！我唔會後悔架！」小悠莫名地雀躍。
 
我都唔好意思再講啲咩，就話：「你鍾意就得喇…呢袋咩嚟架？」我指小悠出學校之後就一直挽住嗰袋嘢。
 




「呢袋？係頭先順便買埋嘅校服。」
 
「我地學校嘅效率真係高…」入學、學生證、校服一條龍服務，至少喺我中一嗰陣係冇嘅，證明咗一樣嘢——時代果然係會進步，掛？
 
諗緊淨低半日去邊度hea嗰陣，張廷宇又搵我，但今次唔係叫我去唱k，而係send咗條咁嘅嘅訊息嚟：
 
阿飯，我要離開呢個世界，bye。