第二個小息,我單人匹馬闖入七樓嘅學生會會室,企喺門口已經感受到佢地嘅待遇同我地呢啲凡人係幾咁唔同。
 
其他班房都係道爛鬼門上面有個長形玻璃窗,唯獨呢間房係雙門設計,喺出面睇你話係禮堂我都信,如果佢唔係大大隻字寫住學生會會室嘅話。
 
我敲敲門,然後推門入去。
 
「嚟咗嗱?」一個男學生坐喺正中央嘅辦公枱前同我講。
 
雖然佢戴住一副金絲眼鏡,但髮型並唔過時,剛過耳嘅中長髮望落就好似女仔頭髮一樣咁柔順,配合帶點秀氣嘅臉孔,令佢散發出一種知性嘅感覺……
 




咪住先,我做乜用咁多行字去形容一個男人生成點嘅樣,更何況佢係疑似幫珀奈影男友視角輯相嗰條友。
 
再嚟過。
 
坐喺辦公枱前嘅係條戴金絲眼鏡嘅粉腸;後面幅牆掛咗個寫住「POWER」嘅牌,我記得係今屆學生會內閣個名。
 
枱上面放咗一個相信係佢嘅名牌座,見到之後我忍唔住笑咗出聲。
 
上面寫住「羅凱撒,Caesar Law」。
 




究竟係點樣得罪老豆老母至會幫你條粉腸改個咁中二嘅名?
 
佢應該察覺到我笑啲咩,於是將個名牌座反轉,然後咳咗兩聲:「你知唔知我今日叫你上嚟嘅目的係乜野?」
 
「唔知喎,不過讀咗咁多年書都未試過入呢間房,係幾靚嘅。」我四周圍望,聽講呢間房係今年先起嘅,所以全部嘢都好新淨。
 
「我叫你上嚟嘅目的係跟進早前你缺席課堂一事,你有冇咩解釋?」佢一副高高在上嘅語氣問。
 
「要解釋嘅話有排講,你亦都唔會信,所以我冇嘢好解釋。」即使我話唔返學係為咗調查小悠身上嘅神秘現象,佢都唔會信,所以解釋嚟都嘥氣。
 




「你應該知道學校為咗營造良好嘅學習氣氛,係好重視同學嘅考勤表現,如果你冇任何解釋嘅話,咁我唯有按照既定嘅罰則,」講到呢句佢停咗一停,「對你施行處罰。」
 
我一路聽都冇咩擔心,反正都係冇得用操場圖書館小食部之類,呢啲地方我平時都唔多去;反而係呢條羅凱撒嘅語氣同用詞都散發住一股濃厚嘅中二氣息,令我好唔舒服。
 
「咁請問係唔俾用操場定唔俾用圖書館?」我有啲唔耐煩。
 
「你嘅語氣都幾狂妄,你知唔知咁已經犯咗校規第114條——不准對學生會內閣成員無禮?我絕對有權再罰你重啲。」
 
「是但你,不過我想問你一樣野。」
 
「雖然你有發問嘅權利,但唔代表我有回答嘅義務。」佢一面從容咁講。
 
「secret講嘅係真嘅?」
 
「哈、哈、哈。」佢仰天大笑三聲,「松葉珀奈係一個煙幕,只係我估唔到佢會愚蠢到真係向我表白。」




 
聽到呢句之後我有種想衝過去打佢嘅衝動,但諗起頭先張廷宇嘅說話,我決定先靜觀其變。
 
「乜野煙幕?」
 
「簡單啲講,佢係我用嚟套取你情報嘅一隻棋子,令我感興趣嘅從來都係你,高田帆。」
 
我冇印象自己做過任何有機會令羅凱撒對我感興趣嘅事,所以只有一個可能性:佢係Gay。
 
直到佢講出以下呢番說話:「但由今日開始,令我感興趣嘅對象又多咗一個——5E班插班生,高小悠。」
已有 0 人追稿