放學前嘅班主任課,突然有全校宣佈:「中五級全體同學,放學後請到籃球場;重覆一次,中五級全體同學,放學後請到籃球場。」
 
就連Miss崔都好似知比試嘅事咁:「加油!搏盡無悔!好,各位同學再見。」佢應該係同我打緊氣,我估…
 
執好嘢之後,張廷宇走嚟搭我膊頭:「你真係唔投降?趁而家仲有機會…」
 
我一野fing開佢:「係fd嘅就幫我打氣…要我不戰而敗,不如殺咗我。」雖然尋日諗住出茅招嘅我都冇資格講呢句。
 
「有骨氣!一於撐你撐到底!」
 




「多謝。」我拍拍佢膊頭。
 
「…係喎,小悠呢?今日全日唔見佢嘅?」張廷宇望向小悠個位,但嗰度一早冇人。
 
「好似話羅凱撒叫佢體驗吓學生會有咩做,我諗可能喺七樓掛?」
 
「哦,咁我地落去先啦,一陣遲到又記缺點。」
 
落到去周圍早就堆滿人,就連樓上走廊都幾乎企滿晒,睇嚟唔止中五,仲有其他級嘅人都趁今次機會食花生。
 




我行近籃球場,啲人好似摩西分紅海咁自動讓路,我一直行到正中間,羅凱撒早就企咗響度。
 
「差啲以為你唔嚟添,正準備開咪搵你。」
 
「唔好講咁多廢話,你要鬥咩?拿拿聲完咗佢俾我返屋企。」 我求其放低個書包。
 
羅凱撒冷笑一下,拎咗對roller鞋出嚟:「換咗佢。」 
 
呢個時候,我先注意到球場外嘅跑道放咗啲雪糕筒。
 




「今次嘅比試,我請咗體育老師陳sir做我地嘅評判。」講完之後羅凱撒讓咗個位俾陳sir。
 
「而家我會開始講解規則!」
 
簡單嚟講,所謂嘅比試係圍住籃球場繞一圈,最快返回起點為之贏——當然,過程著住roller鞋進行。
 
我地學校由上年開始,好似話拎到隔離體育館嘅使用權,為咗善用場地,所以就喺體育堂加入踩roller,聽聞呢個建議係學生會有份提出嘅。
 
返正題,我換咗對鞋之後,就同羅凱撒去咗起點,準備開始嗰陣,佢突然舉手:「等陣,既然在場咁多觀眾,我想增加今次比賽嘅互動性。」
 
「可以。」個陳sir諗都唔諗就答。
 
「多謝陳sir。」羅凱撒奸笑一吓,然後提高聲線:「支持我贏今次比賽嘅,不論你係屬於邊一班,都請企喺近校門嗰邊。」
 
條友又唔知想玩咩花樣。




 
場邊嘅花生友大概思考緊呢番話嘅意味,呢個時候佢補充:「為咗答謝大家,我贏咗之後會向支持我嘅同學派發一個優點。」
 
佢講完之後,四周圍傳來竊竊私語。
 
「你同意嘛?陳sir。」羅凱撒表面上詢問,其實只係通知作為老師嘅陳sir。
 
「同…同意。」
 
「係咁?你地會點揀?」佢再一次發問。
 
優點——雖然除咗學期尾印落成績表之外都冇咩用,但其實佢有一個好重要嘅功能:抵消缺點,即係話如果冇缺點喺身嘅話,優點就好似一個擋箭牌一樣,即使犯下過錯都唔驚俾學校記缺點。
 
所有人似乎都被呢一點深深吸引住,一個一個走近校門嗰邊。
 




「對唔住阿飯,你當我為咗個優點…」就連張廷宇都喺我使出右勾拳之前,快步跑咗去支持羅凱撒嗰邊。
 
呢個時候,我同場邊嘅小悠對上眼,原來佢一直企咗喺度,亦係少數仲未走過另一邊嘅人。
 
你唔會走,係唔係?
 
——我透過眼神向小悠傳遞出想法,雖然唔知佢get唔get到。
 
我見到佢有挽留其他人,但喺優點誘惑前都顯得冇咩用,最後留喺原地嘅只係淨低佢一個。
 
「睇嚟你人緣麻麻喎。」羅凱撒做出準備動作。
 
「3、2、1,go!」陳sir一聲令下,我同羅凱撒各自向前滑行。
 
 
已有 0 人追稿