【全劇終】《我喺街執咗個失憶嘅女仔返屋企》: 聯校宿營篇：二人晚餐（下）

我行出位攞咗兩碟甜品，返嚟食咗兩啖，全程維持一個表情。

「…你頭先講咩話？」我想確認多次自己有冇聽錯。

「我話我鍾意你呀。」

做咗十幾年人，俾女仔兜口兜面告白都係第一次，所以我唔係好識反應：「…但係，我地識咗一日都冇喎？」

「鍾意一個人同識咗佢幾耐有關係架咩？呢啲係講感覺。」





雖然佢講得啱，但我依然諗唔明：「…我…我唔記得自己做咗啲咩…令你有呢種感覺？」

佢帶點恥笑咁講：「睇你緊張到，唔通係第一次有人同你表白？」

我飲咗好大啖水，用二十秒為過去嘅人生創作出豐富嘅感情經歷：「…梗係唔係啦！呢啲情況…我由幼稚園開始已經遇唔少…你唔係第一個。」

「咁答覆呢？」

「…咩答覆呀？」





「你鍾唔鍾意我？」

我差啲俾口入面啖蛋糕哽死：「…咳！咳！你會唔會太直接？」

「你答就得嘞，鍾意定唔鍾意？」

呢個勢，睇怕都冇得答係朋友嗰種鍾意呢類老套野架喇，所以都係直接了當啲好：「唔鍾意，但如果係做朋友嘅話，我非常之樂意…」

「我明喇。」睇嚟佢係一個明白事理嘅人。





我呼一口氣，將最後一啖蛋糕放入口。

再望吓千惠，佢用手示意我嘴邊污糟咗。

「邊度呀？」我左抹右抹都抹唔到有嘢。

佢拎起一塊餐巾，慢慢行嚟我身邊，真係盲嘅都知佢想點…所以我退後一步：「ok！我自己嚟…！」

「好呀。」講完佢將餐巾遞俾我。

但同頭先一樣，抹極佢都話仲有，我開始覺得佢喺度玩嘢。

「屌你係咪玩嘢呀？」

「哈哈哈…哈哈哈…」呢個女仔嘅笑點真係好低。





為咗發洩我俾佢玩嘅怨恨，我細力推咗佢額頭一吓。

佢叫咗一聲，然後撳住貼咗紗布嗰隻眼。

「Sor！係咪整親你傷口？我冇心架…」我即刻上前道歉。

講都未講完佢突然哄埋嚟，喺我嘴角旁邊錫咗一吓。

呆咗兩秒，我先識俾反應：「…你…你頭先又話明？」

「我係明呀，但冇話過放棄，只要你一直係A，我都會諗辦法令你鍾意我。」

…我要改一改頭先嗰句：佢唔係一個明白事理嘅人。





我擰咩面飲咗啖水，費事俾佢見到我面紅紅個樣。

但似乎無補於事，佢一臉睇穿晒我咁款：「你睇你塊面紅到，第一次俾人kiss？」

「…梗…梗係唔係啦！」

「不過你要早啲習慣吓，」講完之後佢行嚟我耳邊，chok咗把媚惑聲：「因為頭先只係第一步。」

望住我緊張到唔知講咩個樣，佢又嘻嘻咁笑咗幾聲。

…點解？點解去個宿營，都有咁多麻煩嘢（？）發生…？