【全劇終】《我喺街執咗個失憶嘅女仔返屋企》: 聯校宿營篇：暴力副會長（上）

「終於俾我搵到一個。」駱以雪走近我地呢邊，從眼神睇得出佢目標係阿妹。
 
如果我冇記錯，阿妹個名牌值16分，俾人撕一撕嘅話，佢個隊就要扣8分。
 
加上呢個駱以雪眼神兇狠，我本能擋喺阿妹前面，細細聲同佢講：「我擋住佢，你趁而家走。」
 
「咁你自己小心啲。」阿妹講完就跑走咗。
 
「高田帆你癲咗？走去幫隔離學校啲人？」
 




「羅凱撒冇同你講咩？我一早講明只會瞓覺，邊個阻我瞓覺我就同佢死過。」
 
「咁你慢慢瞓，唔好阻住我。」之後駱以雪繞過我，想追上阿妹。
 
我一手拉住佢：「我而家訓唔著喇喎。」
 
「放手，你想點？」佢喺度掙扎，氣力比我想像中大，阿妹對住佢應該冇咩勝算，所以我更加唔可以俾佢追到阿妹。
 
「上次你用排球掟我嗰單嘢都未同你計，最起碼都講返聲對唔住先啦。」我求其諗啲野拖住佢。
 




「嗰次你的確係犯咗校規，我點解要同一個犯校規嘅人道歉？」
 
「你開口埋口都係校規，唔悶架咩？」
 
佢發力甩開我，然後講：「你呢種一有機會就挑戰校規嘅人，冇資格同我講野。」
 
眼見佢準備追向阿妹嘅方向，我忽然靈機一觸。
 
雖然唔知有冇用，不過都要試吓。
 




「喂喂喂？聽唔聽到？」我對住手上隻錶講。
 
駱以雪見到之後，果然停低咗。
 
原因應該係頭先開始之前，學校要求我地將所有智能電話、手錶交出，表面係防止有人出貓，實際上應該驚我地整爛又入佢地數啫。
 
不過呢啲都冇所謂，最重要嘅係而家企喺駱以雪眼前嘅，係一個犯規嘅人。
 
為咗令佢唔好放過我，我加多兩錢肉緊：「喂？係呀而家啲錶真係好方便，竟然有得講電話，哈哈哈！頭先學校仲話想我交隻錶出嚟，我梗係睬佢都傻…」而我手上嘅，只不過係一隻有啲似apple watch嘅普通錶。
 
但駱以雪依然信到十足：「…高田帆！」
 
「喂！唔講住喇，俾麻煩人發現咗呀…」我趁機向跑第二度；都唔知讚自己好戲定話駱以雪太天真好，佢竟然真係追上嚟。