食飯嗰陣,小悠問我隻手做乜咁大個牙印。

一諗起同駱以雪嘅瓜葛,我個頭就痛到冇勇氣講落去。

所以我同小悠講吓笑:「你知唔知呢片山頭原來有喪屍存在?呢個牙印就係頭先俾佢咬到架喇…」

以為小悠咁單純會信十足,點知佢一臉嫌棄咁話:「呢度點會有喪屍呀?你呃我呀?」

「真係架!嗰隻喪屍紥住條懶係飄逸嘅馬尾,係咁追住我唔放。」我一邊諗返駱以雪個樣一邊講。





「仲要紥馬尾?你真係當我低能架咩。」

居然俾一個(疑似)低能嫌棄我當佢低能,我有啲唔忿氣,睇嚟要出絕招。

「嗚…嗚…我啲喪屍毒要發作…」我伸手抓向小悠,成功嚇到佢we娃鬼叫。

我地嘅噪音似乎驚動咗其他人,吸引咗一個不速之客過嚟。

「你中咗喪屍毒呀?要唔要解藥呀?」千惠拎埋餐盤坐咗喺我隔離。





「…你有解藥咩?」

「嘻嘻。」佢突然陰陰嘴笑咁哄埋嚟,呢個距離下隨時好似尋晚咁俾佢突襲…

所以我一秒回復正常聲線:「唔使,我冇嘢喇。」

「唔?你又冇嘢嗱?」

連對面嘅小悠都講:「我都話你呃人架啦,呢個世界邊有咁多喪屍。」





連閃靈現象都可以有,點解唔可以有喪屍…

雖然好想咁講,但礙於千惠在場,我只好乖乖合埋口。

「又喺度呃啲無知少女。」

「又?我幾時有呃過?點睇都似係你呃我呢啲無知少男多啲…」我當然係指…尋晚餐廳件事。

「阿帆你俾人呃呀?」小悠八八掛掛咁問。

「er…」

千惠一臉悠然食住枱面嘅沙律,似係期待緊我會點樣將尋晚件事講俾小悠聽。

「er…大人世界嘅嘢,你都係唔好知好啲。」最後我決定咁答小悠。





講完之後千惠又喺度笑,唔知喺度笑乜。

小悠就望實千惠食緊嗰碟沙律,然後問:「你食咁少夠架嗱?」

「夠架喇,我呢排減緊肥。」

明明尋日孭佢嗰陣幾乎冇重量咁滯,仲學人減肥…

連小悠都講:「但係你都唔肥。」

「我著衫遮住啫,況且…啲男仔唔係覺得愈瘦愈好?」佢望住我講。

好死唔死小悠仲要將個波踢埋嚟:「係咩?阿帆你覺得呢?」





我飲咗啖水求其答:「而家咁咪啱啱好,使乜餐餐食沙律虐待自己。」

之後千惠無啦啦搶咗我碟意粉,仲要用我隻叉食。

「喂,搞咩呀?」

「Sorry, 突然間覺得好肚餓添。」

「…你可唔可以講吓衛生。」我細聲抱怨,雖然已經食飽。

「欸?你唔係話減肥嘅咩?做咩仲食意粉呀?」小悠食住佢嘅第二碟蛋包飯問。

「冇呀,我鍾意嗰個人話我而家啱啱好,所以我唔減喇。」

睇嚟我係咪應該逃離一下現場…





但係,好彩對面嘅係小悠,我非常之慶幸佢係一個(疑似)低能。

因為佢只係笑一笑,然後講咗句:「咁咪好囉。」 
 
已有 0 人追稿