「不過當然,冇人信秋涵講嘅嘢,因為佢選擇咗救人,而令到我地爭啲輸。」
 
「但係你地最後唔係贏咗?」
 
「我都未講完,你插咩嘴?」
 
「…咁你繼續啦。」
 
「秋涵搶到旗之後冇送去指定地點,而係去咗救人,所以最後俾學校話佢犯規,我地係靠之前嘅總分險勝隔離學校,你明唔明呀?」佢好似開始唔耐煩。
 




「明,但係點解…」講到一半已經feel到駱以雪用眼神叫我收皮,所以我收皮。
 
「宿營完咗之後,羅凱撒喺學校周圍講係秋涵累到我地爭啲冇體育館用,最後連啲體育老師都講埋一份,上PE堂仲要玩針對…」
 
「所以,佢就退咗學?」
 
「總之,羅凱撒就係一個咁仆街嘅人。」
 
我估唔到,居然可以喺畢業之前聽到駱以雪講仆街呢兩個字,睇嚟佢真係好撚憎羅凱撒。
 




不過,我好似明白多一樣嘢:「因為秋涵呢件事,所以你就成日校規前校規後?」
 
「…關、關咩事?守校規係每個學生嘅本份。」
 
睇佢個樣,就算唔係100%有關,我都肯定係咁上下架喇,當然我打死都唔會講我會咁估係因為諗起某段火影劇情。
 
「原來…」我伸咗個懶腰。
 
「你原來乜嘢?我都話兩件事冇關咯!」
 




「我覺得秋涵佢唔會後悔。」
 
佢有啲驚訝咁望住我。
 
「雖然喺學校入面規矩的確好重要,但如果我係秋涵,就算以後冇體育館用都好,我都一樣會救嗰個人。」
 
「你係咪覺得自己好型?」
 
「…咩、咩呀?我見頭先個timing咁啱…」
 
「你唔好以為個個都係隔離校個單眼妹,俾你氹兩氹就會投懷送抱。」
 
「雖然我好感謝你冇再用女朋友呢個稱呼…不過第一,我冇氹過佢,第二,關於投懷送抱呢一點,你應該有少少誤會…」
 
「你講完未?我冇興趣知你地啲嘢。」




 
呢個時候,帶隊老師帶住野食同水過嚟。
 
「辛苦晒喇同學仔,你跟我返宿營入面睇直播啦。」之後佢面向我:「而呢位同學仔,請你繼續加油。」
 
「等陣等陣Miss!直播…?」
 
「係呀,比賽過程會透過無人機直播,你唔知咩?」
 
早知頭先死纏爛打都要千惠幫我撕名牌啦。
 
「Miss ,個名牌我可唔可以自己撕…」
 
「自己撕即係犯規,咁你地扣分架喎?」Miss講扣分嗰陣,駱以雪好兇狠咁睥住我。
 




「實不相瞞,我…唔舒服,可唔可以酌情處理?」
 
「你個樣唔似唔舒服喎?」
 
「Miss,我可以證明佢講大話,佢不知幾健康。」
 
「咪就係囉,話晒你係同學生會會長決鬥嘅人,俾啲鬥志出嚟啦!唔講喇我帶以雪返去先。」竟然搬埋上次同羅凱撒輸賭單嘢出嚟講,點夠玩吖…
 
駱以雪走之前,仲要擰轉頭對我奸笑,真係頂佢個肺…
 
我突然諗起一樣嘢,於是叫住Miss:「Miss!我想問高小悠佢俾人撕咗牌未?」
 
Miss閃過一個意味不明嘅笑容:「未。」
 
小悠竟然捱到咁耐,真係出乎我意料。




 
反正都係,我決定去睇吓小悠嘅情況。
 
已有 0 人追稿