【全劇終】《我喺街執咗個失憶嘅女仔返屋企》: 整電腦（四）

之後見有啲餓，我地就去咗M記食嘢，千惠講咗更多關於茶葉嘅嘢我聽，我一路啜住杯汽水，一路幻想口中嘅係新鮮沖出嚟嘅靚茶。
 
到咗拎機時間，我地就返咗電腦舖，哥哥仔話大致上整好，係啲防毒要再update吓。
 
賣單嗰陣，我示意千惠借張VIP卡嚟，點知佢郁吓膊頭就算。
 
「你唔係而家先嚟話冇吓嘩？」
 
「我求其講咋嘛，點知你就信。」
 




「你…！」
 
返到出商場，我望住空空如也嘅銀包，重重嘆一口氣。
 
「喂，你最後都有折吖！做咩唉聲嘆氣呀？」
 
頭先個哥哥仔話今日做緊特別優惠，所以全單6折。
 
「仲好講！昆我帶埋你嚟！」
 




「你唔可以咁諗嘅咩？晴晴部電腦整返好，你又有6折，仲可以同我行街，簡直係三件好事一齊出現。」
 
「頭兩件我認同，但最尾嗰件有少少保留…」
 
「但你個樣話俾我知你好開心？」
 
「我唔記得自己有做過表示好開心嘅表情？」
 
佢喺電話撳兩撳，然後俾咗幅相我睇：「嗱，證據。」
 




背景係頭先間M記，但我完全冇印象自己有俾人影過：「你幾時影架！？」
 
「你唔知嗰陣囉。」
 
失策，頭先講茶葉講得太興起，俾人偷影都唔知…
 
「你放心，張相我會set做wallpaper架喇。」
 
「…我可唔可以收版權費。」
 
冇幾耐千惠話要返屋企（順帶一提，佢仲講埋自己就住喺呢個商場上蓋），我趁佢走冇幾遠，即刻準備好電話。
 
俾人偷拍呢個仇，我梗係要報啦。
 
點知仲對緊焦嗰陣，已經收到佢嘅訊息。




 
係一張唔知幾時影嘅自拍，另加一句：唔使偷影，送俾你
 
屌，佢點知架！？
 
然後又彈一個訊息，係張cap screen，佢真係將M記張相set做wallpaper。
 
「快啲刪咗佢！」我咁回佢。
 
佢再sd嚟：唔刪喎～～～
 
「……」
 
既然佢咁堅持，我都保留一切收取版權費嘅權利。
 




不過，望住相入面自己個kai樣，我忍唔住笑咗出嚟。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

因為隔離過左２００讚，聽日繼續！