啱啱返到屋企,門鐘就跟住響。
 
打開門,小悠拎住一桶(冇錯係一桶)曲奇食緊。
 
我醒起佢今日去咗甜品學會:「嘩,呢桶就係你嘅戰利品?」
 
「芝芝佢地食唔晒呀,所以俾我拎返嚟。」佢一路食一路講。
 
「又關芝芝乜事?」芝芝係張廷宇條女。
 




「芝芝係甜品學會架嘛,你唔知咩?」
 
「我點知?我連芝芝點嘅樣都未見過。」
 
「仲有樣嘢講你都唔信呀!原來今日係芝芝生日喎,所以佢地一早整咗好多甜品幫芝芝慶祝啦…」
 
「即係所謂嘅學會體驗,變左生日會?」
 
「然後呢,佢地原來準備好晒禮物俾芝芝啦,但係我去到先知係芝芝生日,最後你估吓我送咗啲咩俾芝芝?」
 




「冇興趣知…」
 
「唔好咁啦!你估吓先啦!」
 
「都唔慌係好嘢啦。」我細聲講。
 
小悠自己講落去:「我即刻衝落小食部問姨姨買咗一排蘋果綠俾芝芝,佢話好鍾意!」
 
「你會唔會寒酸咗少少…」
 




「我之後會再補一份俾佢架!」
 
居然喺我唔知嘅情況下同芝芝熟到會送生日禮物,小悠真係開始適應學校生活…
 
雖然我有啲在意呢個張廷宇第n任女友嘅真面目…
 
有咩理由連小悠都見過!但我未見過!
 
「你睇你食到?沒收!」我一手搶走小悠手上桶曲奇,再叫佢清理地下嘅餅碎。
 
「喂呀!我未食完呀!」佢試圖喺我手上搶返,當然失敗。
 
「我咪教過你,唔可以淨係食澱粉碳水脂肪蛋白質!菜同生果都要好好食!」講完之後我放咗一塊曲奇入口。
 
嗯,係幾好食嘅。




 
「你好奸矛呀!」
 
不過,頭先小悠提起生日,我突然諗起啲嘢。
 
我打開電話日曆望,阿妹生日差唔多到。
 
「仲好講,人地去甜品學會就整甜品,你呢就去又食又拎。」
 
「你錯喇,芝芝話聽日會教我整蛋糕!」佢居然一臉得戚咁講:「仲要係戚風蛋糕!」
 
「戚風蛋糕?」突然諗起阿妹好似幾鍾意食。
 
「嗯!」
 




今日生日禮物,不如就整個蛋糕送俾阿妹?
 
當係辛苦佢平時做埋老豆老母嗰份又好,定係我呢個做阿哥嘅氹吓佢又好。
 
一於咁話。
 
我將桶曲奇塞返俾小悠:「聽日預埋我。」
 
「吓?阿帆你對整蛋糕有興趣架?」
 
「唔得咩?」我唔同小悠講真正目的住,費事佢戇戇鳩鳩爆響口,加上呢件都係幾羞恥嘅事…總之,整好咗先。
 
已有 0 人追稿