【全劇終】《我喺街執咗個失憶嘅女仔返屋企》: 過去篇:兄妹
中三下學期。
我第一次以監護人身分去阿妹嘅家長日。
因為父母嗰陣冇時間返嚟,所以佢地叫我買套成熟嘅衫,扮係啱啱中學畢業。
阿妹間名校好重視同家長溝通,所以我冇拒絕嘅餘地,唔似我間狗屎垃圾學校,唔去家長日都唔會理你。
於是,我就去u記執咗套四四正正嘅衫,梳咗個平時唔會梳嘅頭,帶住阿妹一齊向佢學校出發。
「…阿哥你夠十八歲架喇?」接過成績表嗰陣,阿妹個班主任Miss問我。
「我啱啱中六畢業,所以個樣望落可能後生啲,不過我成年架喇。」我將阿爸阿媽教我嘅照背出嚟。
「…哦,咁好啦,冇問題嘅話可以走架喇。」我慶幸佢冇追問落去。
出班房嗰陣,我望住阿妹張名次寫住1嘅成績表,認為自己好垃圾嘅感覺再度出現。
阿妹就係咁優秀,唔理我點俾心機都唔會及得上。
甚至夾硬迫自己去打扮做一個大人企喺阿妹隔離,先會意識到自己係佢阿哥。
「…俾返你。」我將成績表俾返阿妹。
「哥?你好似突然間唔開心咁嘅?」
「邊有?快啲行啦,我想返屋企整返個頭。」我快步踏前,點知行唔夠兩步俾人擋住。
「唔該借借。」
我見條友冇反應,就諗住繞過佢,點知我行右條友跟住行右,我行左條友又跟住行左。
阿妹突然衝上嚟拉住我:「我地不如行第二邊…?」
本身心情已經唔好,仲要俾條友焫一焫,我當堂大聲喝出嚟:「行咩第二邊呀?呢條路我地行先架!」
呢個時候擋路條八婆終於開聲:「高朗晴,呢個你條仔呀?」條八婆留住一頭過耳短髮,把聲沉得嚟有中氣,後面仲要有兩個女跟班。
「你地噏乜呀?咩條仔呀?」我對條八婆講。
「哥呀…」阿妹想拉我走,我示意佢唔好出聲。
然後啲八婆得寸進尺:「嘩,睇吓人地家長日可以帶條仔嚟。」
「真係好撚羨慕呀。」
「哈哈哈…」
我衝埋去扯住條八婆個衫領:「你地講完未呀?我係佢阿哥呀!」
或者,當時焫著我嘅唔係啲八婆擋路同串串貢,而係連外人都睇唔出我係我個妹個阿哥呢個事實。
「阿哥?乜孤兒院大都有阿哥嘅咩?」雖然唔知啲八婆點知呢件事,不過睇嚟係每間學校總會有嘅無聊惡霸。
「我地不如走啦…」阿妹好驚咁拉住我。
「走咩走?而家係人地挑機,我地使驚?」我fing開阿妹隻手。
「嘩!阿哥好勁呀!」條八婆繼續挑釁我。
「收聲啦屌你老母!」平時我唔會咁有勇氣當街(仲要係阿妹學校)爆粗,但當時有種衝動要俾啲八婆見識吓我厲害。
因為佢地踢爆阿妹身世,仲要笑佢。
我努力說服自己係咁。
然而,我心底好清楚,我只係想做俾阿妹睇,我呢個阿哥唔會縮沙。
一種想強調阿哥身分嘅逞英雄遊戲。
「好驚呀阿哥,嚟隻揪囉。」講完之後條八婆衝上嚟,我即刻閃開。
之後我同佢大打出手,但嗰一刻我唔知呢個舉動會造成我一生嘅後悔。