「生日快樂!!!」
 
阿妹踏入屋嗰秒,我同小悠一齊大叫。
 
同時,冒住俾阿妹嫌棄嘅風險將手上嘅紙碎灑向佢身上。(呢啲咁on9嘅idea,一睇就知係小悠提議架啦…)
 
結果,阿妹竟然冇厭惡嘅表情,只係有啲不知所措:「…你地搞咩呀?」
 
「幫你慶祝生日囉!」小悠一臉雀躍,「阿帆!蠟燭!」
 




「有。」我將一早預備好嘅蠟燭交到小悠手上。
 
之後佢跳吓彈吓入廚房,應該準備拎個蛋糕出嚟。
 
望住佢咁興奮,真係搞唔清今日究竟係阿妹生日定係佢生日。
 
得返我同阿妹棟喺廳,氣氛一下子唔同晒。
 
沉默幾秒,阿妹開口:「你有份整架?」
 




相信佢係指個廳啲佈置,所以我點頭:「有呀,不過小悠主力。」
 
阿妹笑一聲:「咁多年嚟你好似都冇做過呢啲野。」
 
佢講得啱,以往不論係我定係阿妹生日,最多都係出街食吓飯,唔好講佈置食蛋糕乜乜物物。尤其兩年前開始,更加係咁。
 
今次係我第一次落手落腳去整呢啲野。
 
如果當日冇遇見小悠嘅話,今日嘅我或者照舊同阿妹求其食餐飯就算。
 




「唔單止呢樣,我仲有其他野送俾你。」
 
正想喺書包拎啲卷出嚟,小悠就捧住插滿蠟燭嘅蛋糕走出嚟。
 
我見時機唔啱,即刻收返埋。
 
俾小悠見到我送試卷做禮物,應該會有排恥笑我。
 
所以,我決定等同阿妹獨處時候先送。
 
反正呢份心意已經遲咗兩年,都唔爭在多一陣,去搵個最好時機。
 
之後食蛋糕嗰啲例行嘢省略,我只可以講,嗰個名為#$&#@#@嘅高級蛋糕唔止外觀,連味道都好高級。
 
而個蛋糕,居然出自小悠手中。




 
我考慮打本俾佢開蛋糕店,七三分帳。(我七佢三)
 
不過,唔知呢啲係咪叫反噬,即係好似狗卷棘嘅咒言咁,威力愈大,對施行者傷害愈深,我想講嘅係晚飯之後冇耐,小悠就攰到攤咗喺(我張)床,我話請佢食雪糕都冇反應。
 
我問佢咁嘅狀態怕唔怕會閃靈現象,佢搖頭,話俾佢休息一下就得。
 
夜晚,我趁機拉阿妹出露台傾計,準備將試卷送俾佢。(至於點解係露台,因為我覺得有月色陪襯成件事即刻昇華幾個level)
 
「你又話有野送俾我?」
 
「係呀。」我將收喺背後嘅試卷拎出:「登登!」
 
「測驗卷…?」
 




「錯,呢幾份唔係普通嘅測驗卷,係封印住我呢兩個禮拜…」講講吓一陣強風,好吹唔吹吹走我手上嘅幾張薄紙。
 
「我啲卷呀!」我望落街,啲卷喺樹頂。
 
「等我一陣!好快返!」我鞋都唔換,即刻衝落樓。
 
「哥!」阿妹好似跟埋嚟。
 
落到樓下,先發現喺地面睇,樹嘅高度係差咁遠。
 
不過,啲卷我一定要拎返,唔係就冇意思。
 
「好彩喺張廷宇同小悠度學到啲野…」多得呢兩位親愛嘅朋友,我至識得有樣學樣爬樹。
 
「差少少…」我再踏出多啲,然後手伸盡。




 
得咗,拎得返。
 
跳返落地面,先發現阿妹唔知幾時嚟咗。
 
「你知唔知咁樣好危險架?啲測驗卷有咩咁重要呀?」
 
「好重要架,係我…」
 
阿妹突然面有難色:「等等先!我諗到樣更加重要嘅野要講。」
 
「?」
 
「阿哥…你有冇帶鎖匙?」
 




我將兩邊褲袋反出嚟,入面咩都冇。
 
「你唔係想講,你都冇吖嘛…?」阿妹一世聰明,竟然衰喺條鎖匙度…!
 
「咁你頭先無啦啦跑落街,我梗係跟埋你嚟啦!我點知你會唔拎鎖匙架!」
 
咪住,屋企咪有救星囉。
 
「唔緊要!我地有小悠!」
 
阿妹鬆一口氣:「又係喎。」
 
然而,當你以為某個方法行得通而鬆口氣嗰陣,往往只係立緊flag,呢個道理相信唔需要我再去說明。
 
我地撳到個門鐘爆,小悠都冇應門。
 
畢竟佢喺我離開間房嗰陣已經處於熟睡狀態。
 
「…咁而家點呀?」
 
我望吓個天,月色好靚。
 
或者係個機會俾我同阿妹坐低傾吓計。
 
我苦笑:「睇怕,我地要喺出面瞓一晚。」
 
已有 0 人追稿