【全劇終】《我喺街執咗個失憶嘅女仔返屋企》: 學生會補選篇：後無退路

經過一晚嘅沉澱，我依然解釋唔到自己尋日喺體育館做乜鳩。
 
我係指，應承參選學生會嘅事。
 
明明係件終極苦差。
 
最慘係當選嘅話，要同羅凱撒同駱以雪共事，我係唔會俾中學生涯白白斷送喺佢兩個手上，所以我決定一朝早返學校做一件事。
 
上七樓——反口！
 




哈，我連理由都諗好：「經一晚深思熟慮之後，發覺自己未能勝任」，相信羅凱撒都吹我唔漲。
 
我懷住滿滿自信，推開學生會室大門。
 
點知，原來有人比我早入去。
 
「小悠？」
 
佢見到我一臉驚喜：「阿帆！你嚟得啱喇！入嚟先講！」
 




砰，學生會室門合上。
 
除左小悠之外，羅凱撒、駱以雪、許正峰，仲有一個唔識嘅男同學（相信係淨低嗰個學生會成員）坐咗響度。
 
「咁樣兩位高中嘅候選人就正式齊集，我地可以開始講解參選嘅詳細事項。」羅凱撒拎住一疊野講。
 
「等等…！我上嚟係有野同你地講！」
 
「咩事緊要得過參選？」駱以雪聽落唔係太高興。
 




「我就係想講，經過尋晚之後我諗得好清楚，我要退…」
 
個選字都未講，羅凱撒就傾前身：「三個缺點，罪名：浪費學生會資源。」
 
「…咩鳩呀？」
 
「加多一項：喺校園講粗口。」
 
屌！
 
「由你尋日自動話要參選嗰一秒起，學生會就將全副心力放喺你身上。」
 
「你都識得講我尋日先參選，你地投放咗啲咩心力喺我身上呀？！」
 
「副會長。」羅凱撒示意駱以雪。




 
駱以雪拎咗一疊野出嚟：「呢份係學生會漏夜幫你做嘅助選計畫書。」
 
我望吓疊野，成尺厚。
 
「你一個唔該話退選，對唔對得住校長，全校老師同同學？最重要嘅係通宵完成計劃書嘅學生會成員。」羅凱撒托眼鏡。
 
俾佢咁樣一講，我居然覺得唔好意思。
 
呢個時候，許正峰走埋嚟我耳邊：「喂你唔好同會長抗衡啦，乖乖地hea住選完咪算囉…」
 
面對一係選，一係四個缺點，其實都冇得我揀。
 
「…係咪講詳細事項？係就快啲，我趕住返落去上堂。」
 




「哼，」羅凱撒冷笑一聲，開始講解參選嘅野。