【全劇終】《我喺街執咗個失憶嘅女仔返屋企》: 學生會補選篇：班房外的再次相遇

第二日小息，許正峰走嚟我班房，塞咗張紙俾我。
 
「裏面嘅就係你嘅學妹，你千祈要溫柔善待呀。」
 
「…你地，可唔可以唔好再用啲咁奇怪嘅講法。」
 
許正峰聽完一臉疑惑，即係話佢係100％真心非假膠。
 
「冇野喇，你當我冇講過啦。」
 




「記住呀，領完學妹之後就帶佢去多用途特別室集合。」
 
「得喇得喇…」
 
「咪話我唔提你，雖然你決定hea選，但話晒都係學長，記得對學妹好啲呀！學妹係無辜架！」
 
「如果佢唔係麻煩嘅小學雞嘅話，咁我份人都好容易話為嘅…話時話，點解你假設一定係學妹？你唔俾係學弟？」
 
「因為你張紙上面個人名係學生會決定架囉。」
 




「咩話？！」
 
「嗱，小悠嗰個就真係學弟嘞！」許正峰講完俾我睇咗本身應該係俾小悠嘅紙，「喂唔講住！張紙你幫我俾埋小悠吖，我趕住搵阿雪！」
 
冇幾耐上堂鐘響，小悠拎住兩袋燒賣返嚟。
 
「喂，呢個係許正峰叫我俾你，好似話係你要帶嗰個低form個名。」我將頭先張紙交俾小悠。
 
佢一接過就打開：「2A班，杜朋也。哈哈，個名咁可愛嘅，真人一定都咁可愛～」
 




「你以為啦，而家啲低form已經唔同我地年代嗰陣架喇…」我用老海鮮口吻講。
 
「咁阿帆呢？你張紙寫咗邊個名？」
 
「你唔提我都唔記得睇…」我打開手上嘅紙，上面係一個完全陌生嘅人名——
 
2A 唐夕嵐。
 
未聽過。
 
「好喇，快啲執野，準備小測！」Miss崔急促走入班房，我拿拿聲收埋張紙。
 
放學。
 
因為班主任課俾Miss崔纏住，所以遲咗落2A班房。




 
去到嗰陣，小悠已經唔見人，睇怕已經領咗佢嘅學弟。
 
望住爭相湧出班房嘅初中生，一時間我有啲難開口。
 
好在入面個Miss咁啱行出嚟，可能見我太有可疑，於是主動問：「同學，我有咩可以幫到你？」
 
「Miss，我想搵唐夕嵐…」
 
「哦！夕嵐！」Miss向班房裏大嗌，「有大哥哥搵你！」
 
一個留住妹妹頭嘅細路女孭住書包行埋嚟，發出與年齡不符嘅沉實聲線：「你就係學生會候選人？」
 
「係呀，咁我地…」講到一半，我先望清楚佢個樣。
 




「係你？！」我同佢同時指住對方。
 
「上次整跌我啲畫嘅衰人…」
 
「我、我有幫你執返架喎！仲讚你畫得靚！」
 
「…又唔使你讚。」
 
原來上次喺樓梯撞到嗰個女仔（幫佢執野唔該都冇聲嗰個），就係唐夕嵐。
 
亦即係，我嚟緊一個禮拜都要帶住嘅低form。