去特別室途中,我同唐夕嵐一句野都冇講。
 
為咗打破尷尬嘅空氣,我開口:
 
「…吖,今日天氣幾好呀可?」
 
佢瞄一眼走廊外嘅藍天:「嗯。」
 
「天氣開始轉涼,睇怕都要帶返件冷衫返學…你呢?今日有冇帶冷衫?」
 




「有。」
 
「不過呢啲天氣真係麻鬼煩,開冷氣又唔係,唔開又熱到出汗,你話係唔係?」
 
「係。」
 
「……」
 
…好似變得更尷尬。
 




話說,佢係咪淨係識得答單字?
 
同我俾啲容易接落去嘅回應啊…
 
呢個時候,出嚟拯救我嘅係我嘅摯友許正峰。
 
「喂,叫你領個學妹都領咁耐架?行快兩步啦,全世界等你呀!」然後語氣180度反轉,再同唐夕嵐講,「至於學妹你,可以慢慢行!唔急!」
 
我加快腳步,偷偷同許正峰講:「喂,我同小悠掉轉,我要學弟得唔得呀?」
 




「點解?」
 
「…我覺得自己唔係好識同佢相處。」
 
許正峰一口拒絕我嘅請求:「嗱,學妹領咗就冇得退換架喇,你不如諗吓點樣喺5次會面入面同佢打成一片,咁成件事咪冇咁尷尬囉。」
 
「哈哈,」我假笑兩聲,「我諗都幾難。」
 
入到去之後,小悠同個肥仔(我諗係佢領嘅學弟)喺度玩緊失傳已久嘅小學雞無聊game:劈手指。
 
兩個人睇起嚟都樂在其中,發出陣陣笑聲。
 
「阿帆,你嚟嗱?」小悠發現我之後,同我揮揮手。
 
「好,我地嘅候選人已經到齊,事不宜遲,我地立即開始內閣評核程序。」羅凱撒拎住支咪講。




 
我望吓間房,今日只有羅凱撒同許正峰(雖然佢已經俾人炒咗,但貌似補選之前佢都會以前副會長身分繼續代表學生會一方)在場。
 
「鑑於今日係第一次會面,所以學生會特登預備咗破冰遊戲俾大家。」
 
然後許正峰接過咪:「嚟緊嘅5分鐘係2人一組傾計時間,之後需要向另一組介紹你嘅前輩/後輩。」
 
「順帶一提,內閣評核亦會同時進行,不過大家儘量自然就可以。」羅凱撒講完之後,撳著枱上嘅計時器,代表傾計環節正式開始。
 
先過咗幾秒,我喺隔離已經聽到小悠同個肥仔雞啄唔斷。
 
或者喺心智年齡上,佢地處於一個比較接近嘅數字。
 
反觀我同唐夕嵐呢邊…
 




佢似乎真係等緊我開口——咁諗嘅同時,佢掛起一抹微笑:「學長你好,今日好高興認識你,我好似仲未知你叫咩名?」
 
同頭先喺走廊嗰陣完全兩回事!
 
果然,係我拋嘅話題太爛…?
 
點都好,答咗佢先:「5E班,全名高田帆,你可以叫我阿飯或者阿帆。」
 
佢一邊聽,一邊mark低。
 
講完一堆自己嘅無聊事之後,我問返佢:「我講完,到你講喇。」
 
「學長想知道我邊方面嘅野?」
 
「…咩都好啦,求其講啲野攝時間。」




 
佢耷低頭諗咗陣,然後掛上營業式笑容:「我係2A班唐夕嵐,興趣係鑽研新知識,認為學習係每個學生嘅本份,喺呢六年入面希望運用自己小小嘅力量為學校帶嚟一分良好嘅改變,多謝。」
 
聽完之後,我只有一個想法——
 
好假的初中生。
 
 
 
已有 0 人追稿