經過兩日時間,總算畫完嗰幅和泉紗霧,仲有時間上埋色。
 
今日,係學妹計劃最後一次集合。
 
放學之後,我再次上到學生會室。
 
「由於正選嘅日子好快就會來臨,所以我地會趁今日呢次機會嚟一次綵排,各位候選人陣間會逐個出嚟發表演講…」羅凱撒宣佈。
 
聽講補選嗰日,我地要逐個上台發言十分鐘,然後全校學生就會投票,最後加埋學生會評分,新任嘅副會長同外務秘書就會誕生。
 




雖然之前有研究過吓歷屆學生會政綱,不過呢一刻仍然唔係好知到時應該講啲咩。
 
睇嚟,呢幾日返屋企真係要好好諗一吓…
 
經過抽籤之後,綵排次序係杜朋也—>唐夕嵐—>小悠—>我。
 
「為咗令同學得到更專業嘅回饋,我地特意請咗學生會顧問老師過嚟觀賞今次嘅綵排。」羅凱撒拍拍手,喺門外請咗個禿頭阿sir入嚟,「陸sir,請。」
 
唔知係咪錯覺,陸sir入嚟之後,坐我隔離嘅唐夕嵐一下子坐直咗。
 




然後,綵排正式開始。
 
不過,呢個陸sir好長氣,吓吓回饋超長comment,等咗成粒鐘,都未輪到我出去講。
 
我暗中打咗個呵欠,決定撩吓隔離嘅唐夕嵐傾計。
 
當然,要用個唔會驚動到陸sir嘅方式。
 
我喺紙上動筆:呢個係咪你ig?然後,喺後面寫咗個ac名。
 




我將張紙橫推,推到唐夕嵐眼前。
 
佢望咗一眼,但冇反應,繼續留心聽喺出面演講(9up)緊嘅小悠講嘢。
 
我喺紙加上一句:#埃羅芒阿老師!!! 
 
佢有啲唔忿氣咁睥住我,應該諗緊點解我會知佢ig,我以略帶恥笑嘅表情回應。
 
我繼續寫:是咁嘅,我今日預備咗啲嘢俾你…
 
你喺ig話過有人送和泉紗霧俾你你就咩都應承佢,你唔會走數架可?(btw很想要吧:P)
 
呢個時候,唐夕嵐舉手:「阿sir,我隔離個學長不停性騷擾我。」
 
「…喂!幾時有呀!」




 
陸sir示意小悠暫停演講,然後行埋嚟:「頭先發生咩事?」
 
唐夕嵐指住我寫嗰張紙:「佢喺張紙度寫埋啲奇怪嘢俾我睇。」
 
「俾我睇吓。」陸sir攤大手板,我無奈之下將張紙放到佢手上。
 
佢睇兩睇,問我地:「邊個係和泉紗霧?」
 
見我地都唔出聲,佢突然呼喝:「講呀!邊個和泉紗霧呀?!唔講就兩個一齊留堂!」
 
喺佢威嚇之下,我和盤托出:「…和泉紗霧係佢鍾意嗰個動漫角色,我地講緊畫畫啫阿sir。」
 
「係咪呀?」陸sir轉問唐夕嵐。
 




下一秒,唐夕嵐掛上一副冷漠表情:「唔係,我根本唔知佢講緊乜,亦都唔知邊個和泉紗霧。」
 
已有 0 人追稿