【全劇終】《我喺街執咗個失憶嘅女仔返屋企》: 學生會補選篇：虛假的初中生靜待破殼之時（二）

之後，我地俾人帶咗落校長室。
 
訓導主任將頭先件事報告俾校長聽，校長邊聽邊點頭。
 
「所以，講粗口嗰個係你，唔關夕嵐事？」校長向我確認。
 
由踏入校長室一刻，唐夕嵐一直耷低頭。
 
我望咗佢一眼，然後答校長：「係呀。」
 




「但係我頭先明明好似聽到一把女聲…」訓導主任語帶疑惑。
 
「…我呢排練緊偽娘聲，你唔知咩？」
 
「偽娘？」
 
「總之頭先叫人收皮嗰個係我啦，你唔好問咁多啦搣時。」
 
校長再出聲：「雖然我都唔相信夕嵐會講呢啲粗俗用語，不過循例都要問吓，高同學講嘅係咪真？」
 




唐夕嵐依舊低頭，粒聲唔出。
 
「夕嵐，快啲答啦，你仲要趕住去精英賽嘅練習架。」訓導主任催。
 
但佢都係不為所動。
 
「夕嵐，以往你每次入校長室都係接受表揚，校長都唔係好願意見到你會有因為犯校規而入呢間房嘅一日。」連校長都加把口。
 
「Miss再問多你一次，係咪真係唔關你事？」
 




唐夕嵐慢慢抬頭，視線望向某一角落。
 
然後，輕力點咗吓頭：「…嗯。」
 
「都話唔關夕嵐事架啦！咁呢度冇你嘅事喇，你快啲去練習喇。」訓導主任眉飛色舞。
 
「哈哈，我地學校嘅傑出學生又點會講粗口呢？」校長補一句。
 
唐夕嵐向校長同訓導主任鞠躬，然後離開校長室。
 
「至於你，我同訓導主任而家會討論點樣懲罰…」講完之後，校長同訓導主任開始交頭接耳。
 
喺呢間學校讀咗5年都未入過校長室，估唔到一入就整鑊甘嘅嚟…
 
原地企咗幾分鐘，校長佢地似乎得出討論結果：「咳…我地決定對你……」




 
＝＝＝＝＝＝＝＝＝＝＝＝＝＝＝＝＝＝
 
 
踏出校長室，見到一個意料之外嘅人。
 
「你唔係走咗嘅咩？」我問唐夕嵐，佢挨咗喺校長室轉角嘅一幅牆。
 
佢擰頭：「未走。」
 
「頭先Miss唔係叫你去練乜鬼精英賽？」
 
「係學界語言精英賽。」
 
「…我而家先知，原來學界有個咁嘅比賽，鬥咩架？」




 
「唔好講呢啲，」隔咗一陣佢再問，「佢地罰咗你啲咩？」
 
「哦，一個小過啫。」
 
聽完之後，唐夕嵐一臉驚訝。
 
「咁你唔使咁誇張，我平時都俾人罰慣，一個小過冇乜野。況且係佢地on9啫，收皮都話係粗口。」
 
「…咁佢地有冇取消你學生會補選資格？」佢問。
 
「咁又冇提喎，不過要取消嘅咪由佢囉，反正我本身都唔想選。」雖然俾人取消資格嘅話，我同珀奈聖誕節都冇得去街街，嗚…
 
唐夕嵐冇再講野，我地之間嘅對話好自然完結咗。
 




我突然諗起，唔知小悠同杜朋也買到布甸未。
 
望吓個鐘，我決定去車站揾吓佢地。
 
「咁我走喇，你都快啲去練習啦。」我對唐夕嵐揮手。
 
點知行唔夠兩步，背後傳嚟一陣陣哽咽聲。