學生會選舉當日。
 
學校為我地預留咗午休時間,每人上台講幾分鐘,之後全校就會投票。
 
喺小食部食lunch嗰陣,我已經感受到小悠對一陣嘅選舉充滿鬥志。
 
「只要過埋今日,以後小食部就會有炸豬扒丼食!」佢食住腿蛋麵講。
 
「超,你一定選到架咩?」我串佢。
 




「你唔可以睇輕大家對炸豬扒丼嘅愛!」
 
「係你對炸豬扒丼嘅愛咋吓嘩⋯」我白眼都費事反,拿拿聲食完個飯盒,仲要預早去禮堂準備。
 
不過,有件幾奇怪嘅事。
 
就係頭先開始,間唔中就有啲唔識嘅人(清一色男同學)走過嚟同我講:
 
「一陣選學生會加油」,又或者係「支持你」。
 




明明我都冇拉過票,真係唔知佢地點解識我,仲要同我講加油。
 
而呢個疑問喺我去到禮堂後台之後得到解答。
 
「我地學生會已經根據嗰次綵排入面嘅演講內容,為大家印好宣傳單張,並且已向同學派發,請大家把握最後機會,陣間…」羅凱撒講到一半,我停佢:
 
「等陣!你話咩綵排嗰次呀?」
 
「我係話,綵排嗰次大家嘅演講內容,亦即係你地嘅政綱,我地已經印成傳單派咗俾全校同學。」
 




嗰次綵排我俾唐夕嵐焫著,成個演講過程處於暴走狀態…
 
即係話,學生會居然將我嗰日嘅鳩噏當真,仲要印傳單派!
 
而家全校都知我要啲女仔cosplay成和泉紗霧至可以返學!!!
 
「係咪有咩問題?」羅凱撒問。
 
「有冇槍…我想原地自殺…」唔怪得頭先一堆男嘅走嚟同我加油,應該係期待女同學cosplay嘅一眾小宅男。
 
「唔好再講無謂嘢喇,好好準備你嘅講稿,一陣嗰幾分鐘,」講到呢度佢托眼鏡,「可能係你中學生涯唯一發光發亮嘅時刻。」
 
羅凱撒講完,旁邊突然出現一把喊聲。
 
「嗚嗚嗚嗚嗚哇!!!!」原來係杜朋也,佢喊得好淒涼,「我唔想選!!!我唔選學生會喇!!!!」




 
小悠唔知喺邊拎咗個漢堡包俾佢:「朋也你唔好咁啦,請你食漢堡包?」
 
杜朋也接過,但冇收聲跡象:「選完學生會,我就見唔到小悠架喇!!!」
 
我笑咗:「仲以為你喊咩,你想見佢上嚟五樓咪得,你驚佢走咗去咩。」
 
小悠摸杜朋也個頭:「阿帆講得啱!你嚟五樓搵我咪得囉!」
 
「嗚嗚嗚嗚哇!!!唔同架!!!選完之後我地冇得日日見架喇!!!」
 
「一係咁吖,我應承你每個星期都同你去食布甸?」
 
「真嘅?」佢喊聲收細。
 




「嗯!」
 
杜朋也笑返,伸手抱住小悠,仲要將頭埋喺佢心口位置。
 
我喺千分之一秒間將小悠拉返嚟我身邊:「肥仔你去準備吓啦,一陣你第一個上去講呀。」
 
杜朋也睥我一眼,就去咗練稿。
 
「自己又唔注意吓…」我細聲抱怨。
 
「嗯?」
 
「頭先杜朋也咁樣攬埋你度,你都唔避開?」
 
「點解要避開呀?」




 
「…佢男架!」
 
「咁又點呀?佢細路仔嚟咋嘛。」
 
「細路仔?唔好玩啦…form2已經識打飛機架喇…」
 
結果,小悠一臉懵然咁問:「打飛機?」
 
我雙手掩面:「冇嘢喇,你當我鳩噏啦…」
 
注意到嗰陣,先發覺羅凱撒帶住意味不明嘅笑容望住我同小悠。
 
「望咩呀望?」
 




「哼,我想同你地講,」經過我地身邊嗰陣,佢望咗小悠一眼,「加油。」
 
小悠聽到之後,泛起微笑:「多謝你。」
 
望住佢地心領神會嘅表情,硬係覺得羅凱撒唔係講緊選學生會呢件事…不過九成係我錯覺。
 
 
 
已有 0 人追稿