「你約咗芝芝喺邊度等?」
 
「佢屋企開嘅麵包店。」
 
「乜原來芝芝屋企開麵包店?」
 
「吓?阿帆你竟然唔知?間麵包店係最近先試業嘅,剪綵嗰日我都有去~」
 
「…人地屋企剪綵又關你事。」
 




「係芝芝講架!佢原本諗住請我做佢舖頭嘅試食專員,不過因為我仲讀緊書,所以算喎~」
 
「唔怪得佢平時成日叫你去甜品學會試食…」我好似諗到小悠畢業之後嘅路向…
 
「嗯!為咗多謝佢,所以我特登整咗個蛋糕送俾佢!我連聖誕卡都寫埋架喇!」
 
望住小悠手上份聖誕禮物,我苦笑。
 
我地各自有想要送禮物嘅對象,不過我好清楚,小悠嘅心意最終會傳達到俾芝芝,而我握住呢份,只會繼續留喺我手上。
 




「阿帆你份禮物係送俾邊個架?」咁都俾小悠發現到我拎住個小紙袋。
 
「…邊個話係禮物?都話我頭先出去買嘢。」
 
「哦,個袋咁靚,我仲以為係禮物添。」
 
「…先唔係。」
 
巴士又駛多一陣,小悠突然拍吓我:「阿帆,我地落車喇。」
 




落車之後行咗十分鐘,我地上咗一間位於工廈裏面嘅麵包店——招牌上面仲貼住紅紙。
 
好快就會同芝芝見到面…
 
我捉住小悠問:「你覺得我今日著成點?會唔會太求其?」
 
「芝芝唔係會介意人地衣著嘅人嚟架。」
 
「咁話晒佢都係張廷宇女朋友,點都要尊重吓嘅。」
 
講完之後,小悠先幫我望兩眼:「阿帆你做咩落街買嘢都著全套新衫呀?」
 
「…今日聖誕節,我想著新衫唔得咩。」我求其吹。
 
「得呀!芝芝一定會對你有好印象!」小悠俾咗個讚我,「咁我撳門鐘喇!」




 
我深呼吸:「…好。」
 
門鈴響起。
 
二十秒過後,我同小悠依然企咗喺門口。
 
「…唔通芝芝行開咗?」小悠又撳一次。
 
都係冇人應。
 
突然,響起電話嘅通知聲。
 
小悠睇咗一陣電話,就同我講:「哈哈,原來因為我遲到,所以芝芝頂唔順肚餓,去咗街口麥當勞食嘢,佢叫我地去搵佢~」
 




聽完小悠咁講,我好似明白咗少少點解佢兩個會做到朋友。
 
「咁我地行啦。」我轉身離開。
 
「嗯!」
 
嚟到街口麥當勞。
 
我同小悠推門入去。
 
聖誕節嘅夜晚,幾乎每張檯都坐滿咗一家大細。
 
「芝芝!芝芝!」沿途小悠叫住芝芝個名。
 
我制止佢:「喂!你咁樣芝芝會好老尷架,你不如問吓佢坐喺邊個位啦。」




 
「你講得啱。」小悠講完拎個電話出嚟,「原來芝芝正在輸入中!」
 
「佢點講呀?」
 
「佢話,頭先食完脆香雞翼太辣,所以去咗兩個街口之外嘅便利店買佢飲開嗰隻牛奶…」
 
「咁我地喺度等佢返嚟?」
 
小悠搖頭:「芝芝話佢已經食完架喇,叫我地直接去便利店搵佢。」
 
「嗰頭叫我地嚟麥當勞,呢頭又話食完?!有冇食得咁快呀?!」
 
「阿帆你唔知咩?芝芝參加過脆香雞翼競食比賽,仲要拎咗冠軍。」小悠居然一臉理所當然咁講。
 




「…我唔想知呢啲嘢,我地都係快啲去便利店啦。」
 
就嚟到便利店嗰陣,小悠嘅電話又響起。
 
「…今次又咩事?」
 
「芝芝話,呢間便利店冇佢飲開嗰隻牛奶,所以…」
 
我制止佢講落去:「夠喇!!叫佢買完牛奶嚟返呢間便利店搵我地啦!!」 
 
「…哦哦!」
 
「…呢個芝芝,企定定等埋我地先去唔得嘅。」我抱怨,雖然話就話十二月,但咁樣喺街度走嚟走去,額頭都開始冒汗。
 
「除咗麵包之外,芝芝對於牛奶嘅牌子同溫度都好執著,唔係間間便利店都有佢飲嗰隻牛奶架。」
 
「夠喇!我唔想再知呢啲嘢呀!」
 
我而家最想嘅,只係見芝芝一面,關於佢嘅為人同嗜好,我暫時未有興趣。
 
等咗冇幾耐,小悠突然喺度叫:「係喎!我差啲唔記得!」
 
「…又點呀?」
 
「芝芝近排牙痛,佢唔應該食咁多炸嘢,陣間見到面我要提吓佢至得…咦,我好似見到芝芝嚟緊!」
 
我立即打起精神:「邊度邊度?!」
 
小悠指向大街上嘅茫茫人海。
 
「邊個係芝芝?」
 
「嗰個呀!見唔見到呀?」
 
「佢出現得咁突然,搞到我有啲緊張添…」
 
「唔使緊張,芝芝好 nice架!小學嗰陣拎過幾年校內最親切小學生獎。」
 
「…咁你都知?不過,你可唔可以講得具體啲?我都未係好get到芝芝究竟喺邊個位…」
 
「紅色衫後面!」
 
「好多個紅色衫喎!」
 
「嗰邊嗰個呀…芝芝話佢今日著住金色衫,好易認架咋!」
 
金色衫…
 
我快速搜尋視線範圍。
 
突然,我喺茫茫人海之中捕捉到一絲金色嘅光芒。
 
「芝…!」先講到一半,嗰道金色光芒突然往反方向離去,速度快如流星。
 
「咩事突然間走咗去?」 
 
小悠望完電話之後講:「芝芝最鍾意嘅歌手突然出現快閃busking,佢去打完卡就會過嚟!」
 
「…你確定,佢真係當你朋友?」
 
「芝芝話過,喺佢經歷緊低潮嘅時候,呢個歌手嘅歌拯救過佢…」小悠忽然一臉沉重。
 
「OK!我地喺度等佢!」

由頭先開始,硬係覺得個身好似輕咗。
 
我不經意摸吓褲袋,發現裏面空空如也。
 
「我個電話!我跌咗個電話!」
 
「吓?咁我地周圍揾吓?」講完之後,小悠嘅電話今晚第唔知幾多次響起,佢睇兩睇,「不過芝芝話佢過緊嚟,叫我唔好走開。」
 
「唔使喇,你喺度等芝芝,我去搵吓部電話。」
 
「但係芝芝話佢趕時間,收完我份禮物就要走,咁樣嘅話你咪見唔到芝芝囉?」
 
我拍拍小悠膊頭:「唔緊要,芝芝永遠活喺我心入面。」
 
「…阿帆。」
 
「我走喇。」
 
同小悠闊別之後,我沿返頭先條路,尋找嗰部陪咗我幾年嘅電話。
 
其實我好清楚,電話本身根本唔重要,重要嘅係裏面近百條錄音。
 
係我同珀奈之間嘅回憶。
 
我握緊手裏面嘅聖誕禮物。
 
曾幾何時,我每日拎起部電話嘅理由,就係等待珀奈嘅訊息。
 
「高田帆?我係hana呀,見你呢幾日都冇返學,你ok嘛?」
 
我返到頭先待過嘅麥當勞,冇發現。
 
「我幫你拎咗啲功課呀,不如我上你屋企俾你好唔好呀?」
 
麥當勞到麵包店嗰段路,冇發現。
 
「高田帆?我聽啲同學都係叫你阿飯,不如我由今日開始都叫你阿飯好唔好呀?嗯?阿飯?」
 
麵包店所在嘅工廈,冇發現。
 
「阿飯,等你返嚟之後,我地正式做個朋友吖?而家我喺度自我介紹一次先?我叫松葉珀奈,matsuba​ hana,你可以叫我hana,唔…仲有咩呢?係喇!同你一樣,今年都係中三!」
 
連開頭落車嘅地點我都搵過,依然冇發現…。
 
我呆站路中心,一時三刻諗唔到仲可以去邊。
 
又係嘅,咁大部電話,應該好快俾人執咗。
 
…都係返去啦。
 
「哥哥?」有個細路拉住我件衫。
 
「…咩事呀?」
 
「今日聖誕節,點解你會喊嘅?」
 
我摸吓眼角,原來唔知幾時濕咗。
 
我搖頭:「…你想唔想要聖誕禮物?」
 
「想呀!」
 
我笑,將手上嘅紙袋遞上:「送俾你。」
 
「多謝哥哥!」同我揮完手,個細路跑返去阿媽度。
 
沿住條路,返去頭先同小悠分別嘅地方。
 
佢一個人企咗喺度,手上嘅聖誕禮物已經冇咗。
 
「你送咗份禮物俾芝芝喇?」
 
「嗯,佢啱啱走咗喇,下次有機會再帶你見佢!」呢個時候佢轉身,「咦?阿帆你買嗰袋嘢呢?」
 
「…揼咗喇,仲有部電話都搵唔返。」
 
「點解呀?」
 
「唔好講呢啲啦,難得今日聖誕節。」
 
我地好自然向住返屋企嘅方向走。
 
行咗幾步,佢又叫我:「阿帆,我有嘢未同你講。」
 
「嗯?」
 
「就係,聖誕快樂!」
 
「…結果,我都係要成晚對住你,不過——」我微笑,「聖誕快樂。」
 
「阿帆你今年嘅聖誕真係慘,竟然跌咗個電話…」佢語帶恥笑。
 
「係呀,或者係時候買過部新嘅。」
 
同裏面嘅回憶講再見。
 
「你要買電話呀?你知唔知芝芝頭先送咗咩禮物俾我呀?」小悠突然好雀躍。
 
「又關芝芝事?佢送咩俾你呀?」
 
「蘋果禮品卡!價值200蚊!你知唔知呀?原來芝芝十年前開始已經係蘋果用家!」
 
「你究竟仲知道芝芝幾多嘢…」
 
「如果你想買電話,就拎去用啦!」
 
「…唔需要!」

====================================
同大家講句遲來的中秋節快樂。

其實呢篇番外篇概念源自漫畫《sket dance》裏面其中一話:A班的中谷同學。

如果大家覺得我寫得幾好睇嘅話,歡迎去睇埋更好睇嘅原著;如果大家覺得今集九唔搭七,更加要去睇吓原著。

當然,鼓勵大家用正當途徑…

就係咁!

聽日,新章開始!
已有 0 人追稿