【全劇終】《我喺街執咗個失憶嘅女仔返屋企》: 休比篇：暖包爭奪戰

我拼命抵受由腳部傳來嘅疼痛感。
 
因為平日缺乏鍛練，會演變成咁樣都係無可厚非。
 
不過，唔可以喺呢度放棄。
 
…應該話，點可以喺呢度放棄？
 
電光火石之間，我同羅凱撒對到眼。
 




全能型天才，羅凱撒。
 
此時此刻，佢依舊以一副悠然姿態傲視眾生。
 
心裏昇起一陣不甘感覺。
 
事到如今，唯有放手一搏。
 
我望向幾步之遙嘅小悠，以及佢膊頭上嘅休比。
 




「休比！！！」
 
拜託，一定要傳遞出去——
 
彷彿回應我嘅呼喚聲，休比嘅眼神一下子變得銳利。
 
我嘴角一揚，緩緩吐出四字——
 
 
 




 
 
 
「神獸顯現！！！」
 
＝＝＝＝＝＝＝＝＝＝＝＝＝＝＝＝＝
 
二月份嘅第二個星期日，氣溫跌破10度，聽講寒冷嘅天氣仲會持續一排，各式各樣嘅禦寒物品開始被搶購一空。
 
就連想喺街買個暖包暖吓手都難。
 
不過，有冇暖包對我地屋企嚟講其實冇咩影響，因為我地有大大隻可以代替暖包嘅毛茸茸動物。
 
只係，一隻休比係唔足夠俾三個人分。
 




「包剪揼！」我、小悠同阿妹嘅聲音重疊，並各自伸出手。
 
我出剪，阿妹同小悠就出包。
 
「好嘢！！！」我發出勝利嘅歡呼聲。
 
小悠一副唔忿氣嘅樣，明顯對剛才包剪揼嘅結果不滿：「搞錯呀！一定係你出貓！」
 
「收皮啦，輸咗唔認數呀？猜多次吖笨。」
 
佢藐嘴，然後例牌搵阿妹求救。
 
好彩阿妹係個明白事理嘅人，佢徹底無視小悠嘅扭計：「算啦，我願賭服輸，今日就唔同你爭休比。」
 
「我幾時都話阿妹係最優秀嘅…」我指桑罵槐，「唔似得有啲人啦～自己輸咗瀨人出貓。」




 
「咩呀！明明我先係休比嘅主人！」小悠抱實休比講。
 
「喂！講好咗邊個猜贏就可以得到休比架喎！」
 
「你睇吓休比幾痴我？佢根本唔想去你度。」
 
見到小悠懶係得戚咁，我決定出絕招——
 
記得休比啱啱嚟我地屋企嗰陣，只要叫佢個名，佢就會跳上我膊頭。
 
「休比！」我張開雙手迎接休比。
 
冇反應。
 




「休比！」我再叫。
 
「休比！come！過嚟我度！」
 
點知隻死仔完全冇反應，繼續匿喺小悠懷中。
 
「哥，你最近發唔發覺你叫休比個名佢唔再理你？」阿妹直搗問題核心。
 
「點會咁架！！」我抱頭大叫。
 
「哈！一定係因為阿帆成日話要食咗休比，所以佢唔睬你！」小悠乘機串我一鑊。
 
「我幾時有？！」
 
「總之！你心裏面唔夠尊敬休比！只係當佢係食物！所以佢唔理你！」




 
面對小悠老屈嘅指控，我決定驗證一吓——休比究竟係唔睬任何人，定只係唔睬我：「阿妹，不如你試吓叫吓休比個名，睇佢有冇反應？」
 
「…吓？但係我都未試過叫佢…佢點會認到我呀？」阿妹推搪。
 
「唔怕架！休比佢好有靈性架！」小悠對阿妹講。
 
阿妹猶疑多陣，之後有啲生硬咁叫：「…休比？」
 
「…嘰嘰嘰嘰！」休比發出超萌叫聲，然後從小悠懷中跳過去阿妹膊頭上。
 
阿妹一副既驚訝，又開心嘅表情。
 
「點解會咁架？？！」雖然我知道阿妹係人見人愛，但有咩理由…淨係我叫先冇反應？！
 
「休比！休比！」我再試。
 
結果…當然冇理我。 
 
不過，頭先猜包剪揼我贏咗係一個事實！我唔會放棄我應該得到嘅權利。
 
咁啱，呢個時候小悠收到訊息，佢拎出嚟望一望，然後講：「我差唔多夠鐘出門口喇。」
 
冇錯，佢又約咗芝芝食甜品。
 
「放心啦，休比就交俾我。」我拍拍心口。
 
小悠好似唔係好信得過我：「阿妹，你可唔可以幫手睇住休比？」
 
「…sorry呀，其實我陣間都要出去補習。」阿妹有啲為難咁講。
 
「喂！你咩意思呀？你真係驚我食咗休比咩？！」我呼喝小悠。
 
「休比唯獨是唔睬你，我點知你會唔會對佢懷恨在心…！」
 
「點睇都係休比對我懷恨在心多啲…」雖然我都唔知自己做錯咗啲咩得罪休比。
 
「俾休比你都得！」大概係趕住出門口，唔想再同我糾纏落去，小悠指向我：「不過我返嚟嗰陣一定要見到休比完完整整！」
 
嘖，休比可以點樣唔完整——我心諗。但當然唔可以講出口：「梗係啦！聽晒你話啦好未？」
 
「…記得呀！」小悠不情不願地將休比交到我手上。
 
「知喇，你快啲出門口仲好啦，芝芝話唔定一早到咗喇。」休比（暖包），GET！
 
過咗一陣，小悠同阿妹都先後出門口，屋企終於得返我同休比二人世界。
 
果然唔可以睇小休比嘅皮下脂肪，簡直係冬天嘅恩物。
 
將面埋向休比嘅瞬間，係我呢日最幸福嘅時刻：

「…今日你係屬於我架喇。」