眨眼間,休比已經俾人拐咗3日。
 
呢段期間,小悠雖然扮到冇嘢咁,日日放學照去玩,但一到夜闌人靜,佢就會顯得特別落寞。
 
我可以做嘅,就只有盡快帶休比返嚟。
 
好彩嗰個擄走休比嘅犯人有守承諾,每日update休比嘅情況俾我知。
 
至於休比,或者喺五星級酒店好食好住,仲精神過喺屋企嗰陣。
 




不過,我相信呢啲都係暫時性,佢返嚟之後一定會好快忘記嗰個擄走佢嘅人。
 
「約定之日既臨,我會依照諾言將休比歸還——」望住呢句啱啱收到嘅訊息,我忽然醒起一個唔係太重要嘅問題。
 
佢叫咩名?
 
我撳入去佢嘅profile page,發現名稱寫住——
 
赤城紫悅。
 




…日本人?
 
唔怪得,佢俾我嘅地址係一間酒店嚟。
 
點都好,放學之後我照佢所講嘅時間,自己一個嚟到約定嘅酒店裏面,一間位於頂樓嘅房。
 
我按照佢俾嘅暗號,敲咗三吓房門。
 
兩秒之後,一個闊別三日嘅身影將門打開,依舊係一頭及腰長髮,以及引人注目嘅浴衣打扮。
 




「…你好呀,赤城小姐。」我嘗試有禮貌咁講。
 
「你好,高田帆。」佢示意我入房。
 
「你點知我個名?!」我詫異。
 
「喺呢三日裏面,休比講咗好多嘢俾我知。」
 
「你嘅意思係…係休比同你講我個名嘅?」
 
佢冇答我,只係將休比從床上捧起:「按照約定,將休比還返俾你。」
 
休比眼仔碌碌望住我,三日冇見似乎冇穿冇爛。
 
「你識同休比溝通…你係動物傳心師?」我順便檢查休比嘅身體,睇吓佢有冇被植入不明晶片之類。




 
佢輕笑兩吓,似係恥笑我頭先嘅發問:「我唔係咩動物傳心師,只係,休比比你想像嘅有靈性。」
 
「雖然我知道佢係好有靈性,但有靈性到曉講嘢嘅話,又真係吹大咗少少…」都係嗰句啦,唔通休比真係神獸咩…
 
佢表情突然不滿:「休比俾你養,真係浪費晒。」
 
「嚴格嚟講養佢嘅係另有其人,我只係代佢嚟接返休比…冇咩事嘅話,我走先喇。」我將休比放入籠,準備轉身。
 
「唔爭在同你講埋,休比佢好似唔係幾鍾意你。」
 
?!
 
「有冇發覺,叫佢個名嗰陣佢唔再理你?」佢一講正中我痛處。
 




我停下腳步:「…唔通休比真係識講嘢?如果唔係點解你會知?」
 
「呢樣係其次,但你有冇諗過背後原因?」
 
「…應該係我之前少咗同佢玩,佢唔認得我?」
 
佢搖頭:「未必係咁,可能係發生咗一啲事,令到休比唔再信你,又或者係唔鍾意你。」
 
「但我諗唔起我做過啲咩令佢唔再信我?」
 
「有時候,原因未必出喺你身上,甚至由頭到尾你都係唔知情嘅一方…」
 
「…你可唔可以講白啲?」呢種係咁兜圈嘅講嘢方式,忽然令我有種強烈嘅熟悉感…
 
佢話峰一轉:「你想唔想重新建立同休比嘅互信關係?」




 
「想呀,梗係想啦。」
 
「咁你就要表達出對休比嘅敬意。」
 
「…點樣表達?」
 
「想休比回應你嘅話,試吓唔好淨係叫佢個名,要當係一個召喚儀式。」佢氣定神閒咁講。
 
……。
 
「哦,好啦,我返去會試吓架喇。」我棒讀。
 
「言靈係一個媒介,唯有足夠份量嘅言靈,休比先會呼應召喚。」
 




…睇嚟,我又惹到一個怪人。
 
已有 0 人追稿