一段助跑過後,小悠用背向式姿勢俐落地跨過橫桿。
 
睇到張廷宇目瞪口呆:「…犀利。」
 
的確係接近完美嘅動作,只不過…
 
「…佢尋日都係咁樣跳?!」我捉住張廷宇膊頭問。
 
「咩奇怪問題?跳高嚟嚟去去都係咁跳架啦,唔係你想點樣跳?」
 




「點樣跳唔係問題,問題係…件衫呀!」
 
跨過橫桿嘅時候,小悠身上嘅PE衫因為地心吸力而掀起一半,令腹部暴露於空氣之中。
 
我低聲說道:「尋日一定俾羅凱撒個死仆街睇蝕晒…」
 
「你講咩話?」
 
我無視張廷宇,走上前去。
 




小悠啱啱喺軟墊上企起身:「阿帆!你睇唔睇到呀?我尋日都跳唔到呢個高度架!我破咗自己紀錄!」
 
「雖然係…但你都要識得保護自己,尤其對住羅凱撒呢啲奸險小人。」
 
「…你講咩呀?」
 
我將身上嘅冷衫除下,綁喺小悠腰間:
 
「下次記得著返件打底衫。」
 




張廷宇突然走過嚟插嘴:「你使唔使咁誇?你個女露少少肚啫,唔講仲以為你係封建時代嗰啲老竇…」
 
小悠聽完喺度笑。
 
「收聲!佢面對嗰個係羅凱撒,我點知佢會唔會…!」
 
「會唔會咩呀?」小悠問。
 
「仲有,你綁件咁嘅衫喺佢度,你叫人點跳呀老竇?」
 
「……。」被張廷宇提一提,我駁唔到,「總之!如果下次羅凱撒喺度,你自己小心啲啦。」
 
講完之後,我準備將件衫從小悠身上解下,但被佢輕輕握住:「唔使,我就連埋件衫一齊跳。」
 
張廷宇喺隔離講:「咪玩啦!綁住件咁累贅嘅冷衫點樣跳?」




 
小悠原地跳咗幾吓:「其實都唔係好累贅!張廷宇你諗吓,如果我綁住件衫都跳到,咁到正式嗰陣更加一定會跳到!」
 
「…你又好似啱喎。」
 
然後,小悠又回到橫桿嘅不遠處,準備做出助跑動作,不過今次腰間多咗我件冷衫。
 
「…嘿!」動作依然俐落,但橫桿卻掉落墊上。
 
「…果然,綁住件衫嘅話,要再跳高啲先過到。」小悠自言自語過後,又再回到起點。
 
「你睇吓你個女幾聽你話,你呢個老竇好欣慰啦…」
 
我亮起拳頭,嚇到張廷宇耍手擰頭:「講笑咋…講笑咋…」
 




不過,四圍望吓先知原來除咗我地之外,陸續有其他人嚟體育館呢度練習。
 
「係喎,你參加咗咩項目?」我問張廷宇。
 
「我呢就參加咗最簡單嘅100米,芝芝呢就參加咗最啱佢嘅擲鐵餅!」
 
我暗地吐槽:「我又冇問芝芝…」 
 
「咁你呢,飯飯?」
 
「我?運動會嗰日你咪知。」
 
話時話,雖然之前分析過所謂嘅神秘項目應該係拋豆袋之類嘅簡單嘢,不過為免立flag,都係聽日搵唐夕嵐問清楚好啲。
 
 




 
已有 0 人追稿