【全劇終】《我喺街執咗個失憶嘅女仔返屋企》: 休比篇：運動會（六）

從召集處聚集人數可以猜測，今次神秘項目嘅參加者唔多。
 
即係話，拎金牌嘅難度相對下降。
 
我本來係咁諗，直到眼角餘光出現羅凱撒正在做熱身嘅身影。
 
佢快一步向我搭話：「終於都等到你出現。」
 
「你都會落場？」
 




「呢個神秘項目係我引進，我當然要親身參與。」
 
我推翻頭先嘅想法——如果羅凱撒係對手，唔出茅招睇怕都冇機會贏…
 
唔係，係出茅招都唔會贏到。
 
即刻有啲後悔，頭先應承小悠要幫佢贏塊金牌返嚟。
 
但事到如今，唯有硬住頭皮上，最少拎塊銀牌都好。
 




「神秘項目究竟係咩？」我一邊做熱身，一邊問。
 
同時，腦內開始分析如何因應唔同項目，將自己嘅勝算提升到最大。
 
佢一如以往，唔會答人問題：「哼，一陣你咪知。」
 
場上唔見任何障礙物，都唔見一般田賽嘅場地設置。
 
即係話，果然唔係普通嘅比賽項目。
 




正苦惱羅凱撒會玩咩花樣，俾我望到前方200米賽道旁放咗一張長枱。
 
上面有幾個貌似抽獎箱嘅物體。
 
我嘗試將見到嘅畫面同認知裏嘅田徑項目進行比對，結果都係諗唔到抽獎箱同比賽有咩關係。
 
「阿帆！」突然被賽道旁嘅一把聲音吸引。
 
我望過去，發現小悠抱住休比，喺不遠處對我揮手。
 
「你做咩走咗落嚟？唔留喺看台？」我走過去問。
 
小悠搖搖頭：「我同休比知你參加咗借物跑，特登過嚟同你打氣架！」
 
「等等先！借物…跑？」




 
「嗯！神秘項目，借物跑！」
 
「你點知神秘項目係借物跑？」話雖如此，我對呢個名詞聞所未聞。
 
「哦，之前許正峰搵咗我做運動會幫手，個箱入面啲紙我有份寫架，」講完佢不忘摸吓休比，「係咪呀休比？」
 
「嘰嘰嘰嘰！」
 
「箱入面啲紙？仲有，咩係借物跑？」
 
小悠笑兩聲：「其實我都唔知呀，不過許正峰話其實係200米賽跑，不過跑到一半要去紙箱抽一張紙，借到紙上面寫嗰樣嘢就可以跑埋剩低嗰100米。」
 
「咁咪即係麻煩版嘅200米賽跑…」
 




「我覺得阿帆你要咁理解嘅話，都可以嘅。」
 
我下意識嘆一口大氣，畢竟200米賽跑同我想像中嘅拋豆袋相差太遠嘅距離，加上有羅凱撒呢個對手存在…
 
「小悠，我頭先…」我猶疑要點樣開口，拎金牌嘅機會好微。
 
呢個時候，羅凱撒經過我地身邊，小悠好雀躍同佢打招呼兼打氣。
 
「會長！一陣你都要加油！」
 
羅凱撒輕掃休比一吓：「放心，跑步係我強項，所以我先會引入借物跑。」
 
佢地交換一個微笑，羅凱撒就行開咗。
 
望住呢個畫面，唔知點解覺得唔甘心。




 
鄙視頭先嗰個咁快就想放棄嘅自己。
 
「阿帆你頭先想講咩呀？」小悠問。
 
我搖頭。
 
啱啱先應承過小悠要幫佢贏返，一定唔可以喺呢度就放棄。
 
況且，羅凱撒嘅說話提醒咗我——
 
如果單鬥體力嘅話，我贏嘅機會微乎其微。
 
但而家多咗借物呢個決定性因素，好彩嘅話話唔定我可以拎到好成績。
 




甚至，贏過羅凱撒。
 
唔係，應該話，我一定要贏。