【全劇終】《我喺街執咗個失憶嘅女仔返屋企》: 休比篇：運動會（八）

『可愛嘅寵物』（隔離畫咗隻疑似休比）
 
望住張紙，我噗一聲笑出嚟。
 
居然俾小悠估中，我會抽到佢寫嗰張。
 
不過最令我開心嘅唔係呢樣，而係張紙本身嘅內容。
 
簡直係如有神助嘅感覺。
 




雖然可愛與否呢一點見人見智，但無容置疑係一隻貨真價實嘅寵物。
 
而呢隻寵物，而家就喺小悠掌心之上。
 
與此同時，一個黑影以非一般速度由小悠身後接近。
 
係羅凱撒。
 
佢帶住佢嘅物件越過小悠後，眼見快要回到賽道上。
 




嚟唔切。
 
如果我而家跑過去小悠嗰邊拎休比，一來一回，我就會冇時間追返落後嘅進度。
 
我就會輸。
 
唯有而家即刻向終點跑，我先有機會贏過羅凱撒。
 
但借物跑嘅勝利準則係帶住所需物件一齊衝線。
 




我要諗一個辦法，令我可以即刻往終點動身，休比又會同在。
 
我同羅凱撒嘅距離逐漸變少。
 
要快啲先得。
 
…叫小悠將休比掟過嚟？唔得，會俾人告虐畜。
 
「睇嚟，你仲未搵到你要嘅嘢？」羅凱撒朝向我呢邊叫。
 
明明有機會贏，如果因為拎唔到休比所以輸嘅話，我唔甘心。
 
羅凱撒距離賽道只係得返幾十步之遙；其他選手亦開始搵到要嘅物件，陸續從觀眾席上返回。
 
慌亂之際，一句無關痛癢嘅說話忽然浮現於腦海——




 
「言靈係一個媒介，唯有足夠份量嘅言靈，休比先會呼應召喚。」
 
赤城紫悅講過。
 
嗰陣時，佢的而且確係話呼喚休比嘅時候要心懷敬意，單純以名字稱呼係唔足夠。
 
「例如呢？即係我應該講啲咩先召喚到休比？」
 
「例如…神獸顯現，之類。」
 
事到如今，唯有放手一搏。
 
「休比！！！！！」
 




拜託，一定要傳遞出去。
 
呼叫聲過後，我隱約見到休比從小悠掌心之中抬頭。
 
既然休比都俾咗反應我，我冇理由唔好好配合。
 
所以——
 
我深呼吸一口，用至今為止從未有過嘅聲量大叫：
 
 
 
「神獸顯現——！！！！！」
 
 




 
「嘰嘰嘰嘰嘰嘰嘰嘰嘰！！！！」休比發出一連串令人精神為之一振嘅叫聲。
 
隨即用快如閃電般嘅速度從小悠掌心跳下，奔馳於賽道之上。
 
我稍微蹲下，以迎接休比嘅到來。
 
跑到咁上下，休比奮力一躍，成功降落於我左邊肩膀。
 
「叻仔！返去請你食一箱牧草波波，連埋之前爭你主人嗰箱繽紛樂一齊找數！」
 
「嘰嘰嘰嘰！！」
 
我帶住休比往終點跑去，眼中只剩下一件事：衝線。
 




與此同時，羅凱撒亦重返賽道上。
 
前半段嘅比賽加上頭先喺觀眾席頻撲，羅凱撒嘅體力明顯消耗不少；雖然幾乎一下子追貼我後方，但我花盡氣力將速度提升至極限並維持，成功不被羅凱撒爬頭。
 
…今次，應該可以贏！