【全劇終】《我喺街執咗個失憶嘅女仔返屋企》: 休比篇：運動會（九）

「哼，天真。」
 
我佩服羅凱撒跑緊步都有餘力講廢話，卻被眼前景象驚呆。
 
羅凱撒有如神獸附身一樣，速度忽然再次爆發，趁轉彎時更一舉超越我。
 
甚至有餘裕回頭對我擺出挑釁嘅笑容。
 
就同鬥roller嗰次一樣。
 




我出盡全力，都係鬥唔過呢個萬人景仰嘅學生會會長。
 
最後衝刺階段，場邊開始出現眾人嘅叫囂聲。
 
全場都喺度幫羅凱撒集氣：「會長！會長！會長！」
 
唔知小悠有冇叫埋一份。
 
眼見同羅凱撒嘅差距愈來愈遠，縱然頭先有一刻諗過會贏，終究只係我嘅妄想。
 




肺部因為過度換氣開始產生撕裂感；每一下著地嘅衝擊力令雙腿早已痠軟，甚至感覺到兩手因不停擺動而開始出現不協調。
 
痛，全身每一部分都好痛。
 
我究竟為咗啲咩想要贏羅凱撒？
 
場邊嘅歡呼聲從未歇止：「會長！會長！會長！」
 
因為小悠拎唔到金牌，所以我想代佢幫5E班贏返。
 




呢個被我視為最理所當然，最合情合理嘅原因，喺呢一刻就好似被某種具自我意識嘅不知名情感所拒絕，話俾我聽並唔係咁。
 
唔知幾時開始，跑鞋觸地嘅響聲、場外汽車嘅嘈吵…所有聲音通通消失，只係淨低一句句「會長！會長！會長！」
 
然後，再轉化成某把熟悉嘅聲線—— 




「好煩阿——！！！！！」聲音由喉嚨喊出後，四肢好似重新被灌滿力量一樣，我急起直追。
 
休比一直企穩喺我膊頭，配合我嘅步伐。
 
我唔可以辜負佢嘅努力，更加唔可以令佢主人失望。
 
咩都唔理，只管跑。
 
向住前方跑。
 
……
 
……
 
……




 
等到呼吸稍為順暢一點嘅時候，眼前係一片萬里無雲嘅藍天。
 
衝線之後，我就直接攤咗喺賽道上。
 
甚至懶得去理比賽結果。
 
至於休比，已經唔知去咗邊，或者已經返咗去佢主人度。
 
「阿帆！」一下呼喚過後，視線上方出現熟悉嘅臉孔，以前所未有嘅興奮聲線向我道賀，「你贏咗呀！你拎咗第一名！」
 
「…第一名？」
 
「嗯！第一名！」
 




我稍微精神起來：「你係話，我贏咗羅凱撒？」
 
「嗯！雖然佢同你差唔多同一時間衝過終點，不過你快佢少少，」小悠講到呢度停咗一停，「就同嗰次一樣。」
 
我知道，小悠係講緊喺操場鬥roller嗰次。
 
羅凱撒用小悠係咪加入學生會嚟做賭注，最後我輸咗。
 
但我知道今次會贏，唔完全單靠自己。
 
「我可以贏，都係全靠休比。」
 
「嗯！你知唔知頭先你叫休比做神獸嗰陣，休比即刻好開心！」
 
「……。」




 
「仲有！你頭先大叫神獸顯現嗰陣，真係好有龍貓使者嘅風範！」
 
一種羞窘嘅感覺由腳底湧上：「…同我刪除呢段記憶。仲有點解會有龍貓使者呢個不知名term出現…！」
 
「休比啱啱同我講，龍貓使者即係獲得佢認可嘅人…！」
 
「你9up少陣係咪會死…」
 
「嘻嘻，行啦你仲要去頒獎台。」講完小悠對我伸出手。
 
我猶豫咗一吓，靠己身僅餘嘅體力重新企起：「嗯。」
 
佢好自然咁收返隻手。
 
行去頒獎台嘅中途，我偷偷望向小悠臉上嘅表情。
 
佢同手上嘅休比玩緊，並無一絲異樣。
 
所以，我都唔可以有異樣。
 
頭先小悠對我伸手嘅時候，我會猶疑係因為突然諗起喺比賽過程充斥腦海嘅事。
 
我究竟為咗啲咩想要贏。
 
然後，直到衝線前一刻，我似乎搵到答案——


 
幫某個唔記得晒自己啲嘢嘅蠢才創造佢想得到嘅回憶。
 
因為…我唔想見到佢唔開心。