【全劇終】《我喺街執咗個失憶嘅女仔返屋企》: 休比篇：運動會（十二）

我快步趕向看台嘅另一邊，見到嘅畫面係——

企喺原地嘅小悠，同埋逐漸遠去嘅某個紫長髮背影。
 
一陣不安感油然昇起。
 
不過，與其獨自懷抱疑問，不如趁機會問清楚。
 
所以我準備問小悠點解會同赤城紫悅一齊。
 




但喺我開口前，小悠已經對我揮手：「阿帆！」
 
「嗨。」我回應，猶疑應該點問。
 
點知佢仲快我一步：「你知唔知呀？我頭先識咗一個叫做紫悅嘅女仔，你估吓佢係咩人？」
 
「…羅凱撒識得嘅人？」
 
佢搖頭：「除咗呢樣。」
 




我拉佢到一旁細細聲講：「我咪同你講過，嗰個人就係之前跟蹤我地嗰個囉。」
 
「你聽我講先啦，我終於知道點解紫悅會跟住我地，阿帆你冇估錯，佢嘅目的真係休比。」
 
「我都話啦！但係…你點知佢目的係休比？」
 
「因為紫悅同我講，佢係一個研究龍貓嘅學者，成日會遊走於世界各地去觀察唔同地方嘅龍貓！」
 
佢講完之後，我感覺自己額頭多咗三條直線。
 




「…乜世界上真係會有呢種人咩。」
 
「點會冇呀？頭先佢先同我分享咗好多養龍貓嘅經驗！」
 
「咁你知唔知，佢頭先親自嚟問我佢可唔可以帶走休比？」
 
「呢樣佢都同我講咗喇，帶走唔係真係指帶走，係好似之前嗰次咁，俾休比跟佢住幾日。」
 
「佢講你就信架嗱？」
 
「總之結論就係！紫悅唔係你想像中咁係一個可疑嘅人。」
 
「你肯定？」
 
「嗯，倒不如話我好羨慕紫悅有得去唔同地方睇晒全世界嘅龍貓…」小悠雙手捧臉，一臉陶醉。




 
「你實在太容易相信一個人…」
 
「係喎，阿帆你搵我呀？」小悠恢復平常表情問。
 
我嚇一跳，掛住赤城紫悅嘅事，爭啲忘記本身嘅目的。
 
「…嗯，不過你等我一陣。」講完之後我從袋裏拎返塊獎牌出嚟。
 
雙手各握一邊，使盡力氣想要分成兩半。
 
「你喺度做咩呀？」
 
我繼續用力掰，不過塊牌都係紋風不動。
 




「你咁樣會整花架。」
 
「頭先場比賽，」我抬頭，「如果唔係抽到你寫嗰張紙，又如果你同休比唔喺附近，我一定唔會拎到塊牌，」
 
講到呢度，我搲一吓頭：「所以，象徵式分返一半當係多謝你，仲有！補償返你喺跳高冇咗嗰塊牌…」
 
冇幾耐，小悠噗一聲笑出嚟。
 
「所以我由一開始就話，阿帆你真係一個好人。」
 
「!？」
 
「呢塊牌係你自己努力換返嚟，唔需要分俾任何人。」
 
「只不過…」




 
小悠接過我手上嘅獎牌，珍而重之地拭擦著：「要講多謝嗰個人應該係我，因為你又幫我創造咗一個回憶。」
 
然後，佢將塊牌掛到我身上。
 
「由聯校宿營，去到選學生會，再去到我地相遇嘅第一百日，嚟到而家運動會。正因為有阿帆喺度，我至會慢慢變成一個有回憶嘅人。所以，多謝你。」
 
小悠雙手繞到我頸後，幫我整理好掛帶。
 
身體傳來確實觸感，甚至能從中感受到來自於小悠掌心嘅溫度。
 
係一道溫暖嘅感覺。
 
全身血液突然被呢股莫名暖流包圍一樣，讓人稍一失了分寸。
 




斜陽嘅柔光照到落小悠身上，令佢睇起嚟同平時有幾分唔同。
 
唔經唔覺，原來已經黃昏。
 
校方似乎已經開始清場工作：「喂嗰邊嗰兩個，快啲去執嘢喇。」
 
「係——！」小悠收回雙手，眼見要轉身離去，「我地返去啦？」
 
「…嗯。」
 
行唔夠兩步，許正峰嘅廣播聲又傳到耳裏：「一年一度嘅運動會終於完滿落幕！各位同學今年有冇創造新嘅回憶呢？尤其對中五嘅同學嚟講。因為學校嘅垃圾規定，我地出年已經冇得再玩運動會喇…嗚…」
 
我望向外面一片被染上橘黃色嘅天空。
 
呢個時候，走在前面嘅小悠催促我行快啲。
 
我慢步跟上前。
 
中學生涯最後一個運動會，就此告一段落。
 
不過，我清楚知道內心某種感情正要萌芽。